Məlum olduğu kimi, oktyabrın 19-da “Milli Şura”, 20-də isə bir qrup feminist qadın Bakıda icazəsiz aksiya keçirməyə cəhd etdi. Hər iki qanunsuz aksiya cəhdində polis yüksək peşəkarlıq göstərdi. Müxtəlif təhrikedici və provokasiya xarakterli addımların atılmasına rəğmən, polis işçiləri buna uymadı. Aksiya zamanı lentə alınan bir sıra görüntülər də bunu sübut etdi.
Kadrlardan aydın görünür ki, polis əməkdaşları qabaqcadan dəfələrlə xəbərdarlıq olunmasına baxmayaraq, ictimai asayişi pozmağa çalışan şəxsləri saxlayır, onların şəhərin mərkəzində qarşıdurma yaratmağa hesablanmış təxribat cəhdlərinin qarşısını alırlar. Hətta qanunsuz aksiyanın bəzi iştirakçıları xidməti vəzifəsini yerinə yetirən polis əməkdaşlarını təhqir edərək onlara hücum çəkir, iğtişaş yaratmağa çalışırlar. Lakin bütün bu təxribatçı cəhdlərə, hücumlara rəğmən, asayiş keşikçiləri mümkün qədər təmkinli davranmaqla üzərlərinə düşən vəzifəni yüksək peşəkarlıqla yerinə yetirdilər.
Vətəndaşların təhlükəsizliyini qoruyan Azərbaycan polisi bu dəfə də proseslərdən üzüağ çıxdı. Heç bir provokasiyaya getməyərək öz qanuni vəzifələrini yerinə yetirdi. Bununla polis işçiləri növbəti dəfə nümunəvi davranış sərgilədilər. Göstərdilər ki, qanunun aliliyi hər şeydən üstündür. O baxımdan qanunsuz radikal aksiya iştirakçıları ilə polisin qanuni davranışlarını və bu məsələdə nümayş etdirdiyi yüksək peşəkarlığı ekspertlər necə dəyərləndirirlər?
“Polis nümunəvi davranış sərgiləyərək öz qanuni vəzifə borcunu yerinə yetirdi”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, hər iki aksiyada polisin sərgilədiyi davranış Azərbaycan polisinin yüksək peşəkarlığının göstəricisi idi: “Nəzərə alsaq ki, hər iki aksiya qanunsuz idi, o zaman bunun necə böyük məsuliyyət kəsb etdiyini təsəvvür etmək çətin deyil. Dünyanın bütün ölkələrində polis asayişin müdafiəsində çox fəal iştirak edir. Əminəm ki, belə icazəsiz aksiyaya cəhd başqa ölkədə olsaydı, o zaman polis qat-qat sərt davranardı. Müqayisə üçün baxsaq görərik ki, Avropanın ən inkişaf etmiş ölkələri olan Fransa və İspaniyada polisin aksiya iştirakçılarına münasibəti necədir. Görüntülərə baxanda məlum olur ki, bu ölkələrdə polis aksiya iştirakçıları ilə çox kobud davranır. Aksiya iştirakçılarına kobudluq edilərkən ətrafda prosesləri izləyən mediadan da çəkinmirlər. O dərəcədə insanlara qarşı böyük kobudluq göstərilir.
Azərbaycan polisi hər zaman ölkədə ictimai asayişin qorunmasında çox fəal iştirak edib. Ölkə vətəndaşlarının rahat həyat şəraitinin təmin edilməsində önəmli rol oynayır. Son qanunsuz aksiyalarda müxtəlif vasitələrlə istədilər ki, ölkə polisini provokasiyaya çəksinlər. Bu minvalla istəyirdilər ki, polisi zor tətbiq etməyə məcbur etsinlər və bunu xaricdəki havadarlarına göstərsinlər. Ancaq bu cəhdlərin hamısı fiaskoya uğradı. Polis nümunəvi davranış sərgiləyərək öz qanuni vəzifə borcunu yerinə yetirdi. Həqiqətən də bu, Azərbaycan polisinin böyük uğuru idi”.
Vidadi ORDAHALLI
