19 oktyabr aksiyasının radikallar üçün rüsvayçı təzahürləri...
Məlum olduğu kimi, oktyabrın 19-da özünü demokratik qüvvələrin “Milli Şura”sı adlandıran qurumun üzvləri Bakının mərkəzində qanunsuz aksiya keçirməyə cəhd ediblər. Sayları təxminən 220 nəfərədək olan radikallar bir neçə qrup halında “28 May” metrostansiyasının önündəki meydana daxil olmağa çalışıblar. Əraziyə cəlb olunan polis əməkdaşları tərəfindən hüquqazidd hərəkətlərin genişlənməsinin qarşısı alınıb, nəticədə qanunsuz aksiyanın təşkilatçıları və fəal iştirakçıları daxil olmaqla bir neçə nəfər saxlanıb.
Radikal müxalifətin oktyabrın 19-da Bakıda qanunsuz mitinq keçirməyə cəhd etməsinin məqsədi ölkədə gərginlik, qarşıdurma yaratmaq idi. Ancaq bu dəfə də onlar biabrçı məğlubiyyətlə üzləşdilər. Ən azından ona görə ki, aksiyaya ictimai dəstək olmadı. Həmin qüvvələr, həmişə olduğu kimi, bu dəfə də uğursuzluğa düçar oldular. Xalq tərəfindən boykot edildilər.
Azərbaycan demokratik, hüquqi dövlətdir, ölkə qanunlarla idarə olunur. Hansı mövqedə olmasından asılı olmayaraq, hər bir fərdin hüquq və azadlıqları təmin edilir. Mövcud qanunlarla və Konstitusiya ilə qorunur. O cümlədən, ölkədə sərbəst toplaşmaq azadlığı hüququ tam təmin edilir. Bakı Şəhər İcra Hakimiyyəti sərbəst toplaşmaq azadlığının təmin edilməsi və reallaşdırılması üçün də müvafiq yerlər ayırıb. Ancaq radikal müxalifət nümayişkaranə şəkildə bundan imtina etdi. Çünki bilirdilər ki, ora getsələr, daha da biabırçı duruma düşəcəklər. Təbdirlərinə ən yaxşı halda min-iki mindən artıq adam qatılmayacaq. Ona görə də məkan, yer məsələsini növbəti dəfə bəhanə gətirərək, qarşıdurma, gərginlik yolunu tutdular. Qanunsuz aksiyaya cəhd etməklə, digər vətəndaşların hüquqlarını pozdular. Bu isə onları daha da biabır etdi və radikal müxalifətin iç üzünü ortaya qoydu.
Bütün hallarda, 19 oktyabr aksiyasının radikallar üçün rüsvayçı təzahürlərini ekspertlər necə dəyərləndirirlər?
- “Ölkə ictimaiyyəti onların səsinə səs vermədi, bütün bu olanları, Əli Kərimli başda olmaqla, qaragüruhun hamısını pislədi”
Məsələyə münasibət bildirən millət vəkili Aydın Hüseynovun sözlərinə görə, radikallar, həmişə olduğu kimi, bu dəfə də biabırçı məğlubiyyətlə üzləşdilər: “Çünki xalq onları dəstəkləmir. Onların təşkil etdiyi aksiyalara qoşulmur. Radikal müxalifət oktyabrın 19-da keçirdiyi qanunsuz aksiya ilə növbəti dəfə ictimai asayişi və qanunu pozdu. O da məlumdur ki, radikal müxalifətə mitinq keçirmək üçün müvafiq yer ayrılıb. Ancaq onlar ayrılmış yerə getmədilər və kiçik qrupla şəhərin mərkəzində hay-küy qopardılar. Bu da təbii ki, yolverilməzdir. Azərbaycanın bütün sahələr üzrə inkişaf etdiyini, nüfuzunu durmadan artırdığını, dünya birliyində söz sahibinə çevrildiyini görürük. Bunu gözü götürməyən radikallar təxribat yaratmaq istəyirlər. Onların məqsədi Azərbaycanın imicinə zərər gətirmək, ölkədə olan sabitliyi pozmaqdır. Məlumdur ki, radikallar bu tapşırıqları xaricdəki havadarlarından alırlar. Lakin, həmişə olduğu kimi, bu dəfə də uğursuzluğa düçar oldular. Azərbaycan ictimaiyyəti onların səsinə səs vermədi, bütün bu olanları, Əli Kərimli başda olmaqla, qaragüruhun hamısını pislədi. Nəticədə radikal müxalifət növbəti dəfə rüsvayçılıqla üzləşərək biabır oldu”.
Vidadi ORDAHALLI
