Siyasi şərhçi, “Bakı Xəbər” qəzetinin Baş redaktoru Aydın Quliyev müxalifətin oktyabrın 19-da Bakının mərkəzində keçirməyə çalışdığı icazəsiz aksiya və onun ətrafında qurulan siyasi oyun çabalarını özünün facebook səhifəsində şərh edib. A.Quliyev yazır:
Milli Şuranın 19 oktyabr aksiyasından bir-iki saat əvvəl bəzilərinin yekə-yekə televiziya adlandırdığı feys yayımçıları camaatı qızışdırmaq üçün əllərindən gələni edirdilər. Fotoşop edərək Milli Bankın ətrafını elə bir şəklə salmışdılar ki, sanki həqiqətən "iynə atsaydın yerə düşməzdi". Əslində isə ... Bölgələrdən biriləri feys yayımçısına zəng vurub deyirdilər ki, "bəs filan rayondan, şəhərdənik, mitinqə gəlmək üçün avtovağzala getdik, lakin polis bizi Bakıya getməyə qoymadı. Guya rayonlardan mitinqə gəlmək istəyənlərin alnında "mitinq" yazıldığı üçün polis onları tanıyıb. Yalana baxın.... Biri deyir ki,filan rayonda evimi polis mühasirəyə alıb. Guya həmin rayonda da nəinki cəbhəçi var, hətta çoxlu polis qüvvələrini onun evini mühasirəyə almağa vadar edəcək qədər güc və nüfuz sahibi imiş. Yenə yalana baxın... Biri lap ağını çıxartdı. Deyir ki, gözümün qabağında 10 yaşlı qız uşağının başını dubinka ilə dağıtdılar. Biri isə dedi ki, 5-6 yaşlı uşağı da həbs edib avtobusa basdılar. Bu yerdə feys yayımçısı "dəhşətə, zülmə baxın" deyərək elə kədərləndi ki, sanki camaat onu süni kədərləndirən bu telefon xəbərlərinin planlı uydurmalar olduğunu başa düşmür. 5-6 yaşlı uşağı necə həbs eymək olar, ay millət? Başı dubinka ilə dağldılan o 10-11 yaşlı qızın meyiti necə oldu bəs? Bu sayaq quraşdırılmış komik uydurmaların üstündən keçirik, ən azı ona görə ki, xalqın düşüncəsinin belə şeyləri uyduran nadanların təfəkküründən çox dərin olduğunu bilirik. Bir az qorxulu mətləblərə Avropada yaşayan bəzi radikal azərbaycanlıların zənglərində rast gəldik. Bir "avroazərbaycanlı "(ifadə şəxsən mənim özümə məxsusdur) özünü çox usta hesab edırək dedi ki, mitinqi yaxşı hazırlamayıblar, filan küçədə polislər toplaşdığı üçün filan küçə ilə filan meydana girib mitinq etmək olardı. "Dahiyanə" şəkildə əlavə etdi ki, növbəti aksiyaları daha ağıllı planla hazırlayacaqlar. Fikir verirsənmi, ay millət? Hələ heç soruşmuram ki, həmin meydana girib də nələr etməyə ümidlisiz, beş-üç nəfər həyatdan bezmişin qaçaraq birtəhər hansısa meydana girməyi ilə bir milyon Bakı sakininin ora doluşacağını düşünürsünüzsə, belə plan müəlliflərinin ağlının yox, ağılsızlığının dərəcəsinə heyrətlənmək lazım gəlir. Sadə səbəbdən - o meydanda bir milyon adamın görmək istədiyi parlaq LİDER - ŞƏXSİYYƏT yoxdur axı... Qayıdaq Bakının küçələrini Dəməşqin, Bağdadın, Sənanın, Beyrutun küçələri kimi əməliyyat meydanına çevirmək istəyən avroazərbaycanlıya... Bu gün Bakı küçələrini əliyalın radikalların əməliyyat meydançası kimi nəzərdə tutanların eyni yerdə silahlı əməliyyat planlarına da malik olduqlarına şübhə yoxdu. Görürsünüzmü, Bakının başında hansı niyyətlərlə oyun quranlar var.? Nədi, nə deyil, məsuliyyətsizlik üzündən 1993-cü ildə hakimiyyətdən qovulmuş bir qrup səriştəsizin hakimiyyət ambisiyası bitib-tükənmək bilmir. Müxalifətsiz cəmiyyətlərdə uzunmüddətli və dayanıqlı inkişafın mümkünsüzlüyünü hamı qəbul edir. Azərbaycan da bu yolla gedir və getməlidir. Ancaq Bakının küçələrində "əməliyyat planları" quran müxalifətdənsə, ümumiyyətlə müxalifətsizlik durumunun fəsadlarını yaşamaq daha asan olar. Ancaq indiki Azərbaycan da sivil müxalifətsiz deyil, sadəcə hələ başı "radikal-əməliyyatçı müxalifətə" qarışdığı üçün xalq onlara lazımı diqqəti ayıra bilmir. Azərbaycanın daha güclü, sivil, hakimiyyətlə ancaq qanun çərçivəsində davranan, bir bəyanatla çox işlər görə bilən, xalqın ürək qızdırdığı müxalifəti formalaşacaq. Xalqı küçə-bacada əməliyyatlara cəlb etmək istəyənlərin isə axırı yoxdu. Bir vaxtlar - daha dəqiqi 20 il əvvəllərə qədər şəxsən mən özüm də hakimiyyətlə razılaşdırılmamış şərtlər daxilində aksiyaları əsas və həlledici üsul sayanlardan biri idim. Təkrar edirəm, 19-20 il əvvələ qədər. O zaman dövr indikindən kardinal fərqli idi. Dövlətçiliyimiz üçün kənardan ciddi bir təhlükə yox idi, hələ Misir, Suriya, Liviya olaylarının əlamətləri qəti üzə çıxmamışdı, böyük neft gəlirləri hesabına Azərbaycan hələ bəlli yırtıcıların nəzərində didib-parçalamalı yağlı tikəyə çevrilməmişdi, ölkənin içində icazəsiz aksiyalara meyl göstərənlər daha çox müstəqil idilər, onları alətə çevirmək istəyində olan beynəlxalq güclü qüvvələr də yox idi, üstəlik, cəmiyyətin müəyyən hissəsi belə mübarizə formasına laqeyd deyildi və dəstək verirdi, əhalinin maddi mənafelərinə uyğun böyük islahat paketləri hələ həyata keçirilməmişdi, dövlət hakimiyyəti indiki qədər güclü deyildi və sair. İndi bütün bu amillərin hamısı tam tərsinə çevrildiyi üçün radikal icazəsiz aksiyaların ölkəni xaosa sürükləmək təhlükəsindən baçqa heç bir effekti olammaz... Buna isə imkan verməyəcək qədər güclü daxili qüvvə var...
