Məhəmməd Əsədullazadə: “... Dağlıq Qarabağ münaqişəsi üzrə aparılan danışıqlarda Azərbaycana bundan sonra dəstək veriləcəyi deməkdir”
26 il əvvəl erməni işğalçılarının Xocalıda törətdikləri dəhşətli qətliama təəssüflər olsun ki, beynəlxalq qurumlar, dünya ictimaiyyəti öz etirazını bildirmədi. Bunun müxtəlif səbəbləri var. Ən başlıca səbəbi isə o zaman erməni lobbisinin Azərbaycana yönəlik həyata keçirdiyi informasiya blokadası siyasəti idi. Həmçinin, dünyada mövcud olan ikili standartlar buna öz təsirini göstərib.
Ancaq zaman keçdikcə, Azərbaycanın öz müstəqilliyini möhkəmləndirməsi, beynəlxalq əlaqələrin genişlənməsi soyqırımın dünyada tanıdılması ilə bağlı bir sıra işlərin görülməsinə gətirib çıxardı. Bunun nəticəsi olaraq Xocalı faciəsi bir sıra ölkələrdə, o cümlədən ABŞ-ın 20-dən çox ştatında soyqırımı kimi tanınıb.
Artıq bunun beynəlxalq qurumlar tərəfindən tanınması istiqamətində də görülən işlər öz bəhrəsini verir. Təsadüfi deyil ki, Avropa Parlamentində (AP) yeni yaradılmış “Azərbaycanın Dostları Klubu”nun üzvləri tərəfindən Xocalı soyqırımının 26-cı ildönümü ilə bağlı bəyanat qəbul edilib. Bəyanatın qəbul edilməsi ilə bağlı təşəbbüs Avropa Parlamentinin Latviyadan olan deputatı, AP Xarici əlaqələr komitəsinin üzvü və “Azərbaycanın Dostları Klubu”nun həmsədri Andrey Mamikins tərəfindən irəli sürülüb. Bu bəyanat Xocalı qətliamı ilə bağlı Avropa Parlamenti çərçivəsində qəbul edilmiş ilk sənəddir. Bəyanatda Azərbaycan xalqının 1992-ci il 25 fevraldan 26 fevrala keçən gecə Xocalıda törədilmiş amansız cinayətlə üzləşməsi, nəticədə 613 mülki şəxsin, o cümlədən 106 qadın, 63 uşaq və 70 yaşlı insanın həyatını itirməsi, yüzlərlə insanın ağır yaralanması və 1275 nəfərin əsir götürülməsi faktı öz əksini tapıb. Sənəddə AP üzvləri Xocalı qətliamı nəticəsində həyatını itirənlərin yaxınlarına başsağlığı dilədiklərini, ailələrinin dərdlərinə şərik olduqlarını bildirir və Xocalı faciəsi kimi insanlıq əleyhinə yönəlmiş cinayətlərin bir daha baş verməməsi üçün Xocalı qətliamının xatırlanmalı olduğunu vurğulayırlar.
Onu da qeyd edək ki, Xocalı faciəsi ilə bağlı bəyanat ümumilikdə Avropa Parlamentinin 13 ölkəni (28 ölkədən) və 6 siyasi qrupu (8 qrupdan) təmsil edən 22 üzvü tərəfindən imzalanıb.
Nəzərə alsaq ki, sözügedən bəyanat Xocalı qətliamı ilə bağlı Avropa Parlamenti çərçivəsində qəbul edilən ilk sənəddir, o zaman ekspertlər belə bəyanatın qəbul olunmasının əhəmiyyətini necə dəyərləndirirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, Avropa Parlamenti tərəfindən belə bir bəyanatın verilməsi Azərbaycanın uğurudur: “Avropa Parlamentinin Xocalı soyqırımı ilə bağlı bəyanatı Azərbaycana verdiyi siyasi dəstəyin nəticəsidir. Məsələ ondadır ki, Avropa İttifaqı ilə Azərbaycan arasında siyasi əlaqələrin dinamik inkişafı nəzərə çarpır. Azərbaycan Avropanın enerji təhlükəsizliyində xüsusi yer tutduğu üçün, bu kimi dəstək Avropa Parlamenti səviyyəsində Azərbaycana verilir. İttifaqın xarici əlaqələr və təhlükəsizlik üzrə komissarı Federika Mogerininin ölkəmizin suverenliyi və ərazi bütövlüyü ilə bağlı tam bəyanatı göstərir ki, Avropa artıq Azərbaycana bir çox məsələlərdə dəstək verəcək. Bəli, Xocalı soyqırımı Ermənistan tərəfindən Azərbaycana qarşı etnik soyqırım siyasətidir. Bu soyqırımın Avropada tanınması və bu məsələnin Aİ tərəfindən diqqətdə saxlanması Dağlıq Qarabağ münaqişəsi üzrə aparılan danışıqlarda Azərbaycana bundan sonra dəstək veriləcəyi deməkdir. Fikir versək görərik ki, əvvəlki illərdə Xocalı haqqında Avropa bizi heç eşitmək istəmirdi. Ancaq aparılan diplomatik işin nəticəsi olaraq bu gün Avropa Parlamenti soyqırımla bağlı bəyanat yayır. Xocalı soyqırımının bir müddətdən sonra Avropa məkanında soyqırım kimi tanınması gerçəkləşəcək. Avropa Parlamentində Azərbaycan dostları qrupunun bu təşəbbüsü, aparılan kampaniya ölkəmizin Ermənistan üzərində informasiya sahəsində əldə etdiyi qələbənin göstəricisidir. Bu kimi təbliğat və siyasət davam etdikcə, Azərbaycana qarşı erməni lobbisinin əks fəaliyyətinin qarşısı alınır. Xarici İşlər Nazirliyi və diaspor təşkilatları Xocalı faciəsinin Avropada soyqırım kimi tanıdılması istiqamətində fəal iş aparmalıdırlar”.
Vidadi ORDAHALLI
