Məhəmməd Əsədullazadə: “Kompensasiya tələbi ilə azərbaycanlılar çıxış etməlidirlər”
“Hər bir erməni qaçqının Azərbaycandan orta hesabla 110 min dollar tələb etməyə haqqı var”. Bu həyasız və sərsəm fikirlərlə qondarma “DQR”in keçmiş “xarici işlər naziri” Aram Melikyan çıxış edib.
“Qaçqınlar və beynəlxalq hüquq” təşkilatının siyasi məsələlər üzrə məsləhətçisi olan bu bədnam siyasətçi həmin məbləğin yalnız hər bir qaçqın erməninin mülkiyyət hüququnun bərpası və digər məsələlər üçün nəzərdə tutulduğunu bildirib. Onun aləmində ermənilərə dəymiş maddi zərərlərə görə kompensasiya ayrıca hesablanmalıdır. Separatçı qurumun keçmiş təmsilçisi Ermənistan hökumət qurumlarının bu məsələ ilə ciddi məşğul olacaqları təqdirdə Azərbaycandan qısa müddətdə on milyardlarla dollar qoparmağa ümidlidir.
Həyasızlığın dərəcəsinə bax ki, Melikyan guya Azərbaycandan 500 min erməninin qovulduğunu iddia edir. Halbuki, Azərbaycan ərazilərini işğal edən Ermənistan 800 min nəfəri yerindən-yurdundan didərgin salıb. Bundan başqa, 200 min nəfərdən artıq soydaşımız Ermənistanda öz dədə-baba yurdlarından didərgin salınıb. Ermənistanın Azərbaycan ərazilərini işğal etməsi, yaşayış məntəqələrini məhv etməsi, yüz minlərlə insanı evindən çıxarması azmış kimi, indi də Azərbaycandan kompensasiya tələb etmək fikrinə düşüblər. Halbuki, mövcud reallıq ondan ibarətdir ki, işğala Ermənistan yox, Azərbaycan məruz qalıb.
Ən nəhayət, onu da qeyd edək ki, son hesablamalara görə, Ermənistanın torpaqlarımızı işğal etməsi nəticəsində Azərbaycana 820 milyard dollara yaxın ziyan dəyib. O baxımdan kompensasiyanı Azərbaycan yox, Ermənistan verməlidir. İşğala Azərbaycan ərazisi məruz qalıb, Ermənistan yox.
Bütün hallarda, ermənilərin sözügedən sərsəm ideya ilə çıxış etmələrini ekspertlər necə şərh edirlər?
Məsələyə münasibət bildirən politoloq Məhəmməd Əsədullazadənin sözlərinə görə, bu, növbəti erməni həyasızlığıdır və heç bir əsası yoxdur: “Ermənistanın Azərbaycana qarşı işğalçılıq siyasəti nəticəsində bir milyondan artıq ölkə vətəndaşı məcburi köçkün şəraitində yaşayır. Bu illər ərzində məcburi köçkün kimi yaşayan azərbaycanlılar Ermənistana qarşı hər hansı bir geniş təzminat davası açmayıb. Halbuki, məcburi köçkün olan vətəndaşlarımız Ermənistana qarşı bu iddianı qaldırmaq hüququna malikdirlər. Qondarma rejimin eks təmsilçisinin guya erməni qaçqınlarının Azərbaycandan təzminat kimi tələbi isə absurd və heç bir hüquqi əsasa malik olmayan iddiadan ibarətdir. Təbii ki, ermənilər bu əsassız tələbi irəli sürməklə, aparılan Qarabağ danışıqlarını yenidən fiaskoya uğratmağa çalışırlar. Danışıqların mahiyyətinə zidd olan tələblər irəli sürülür. Azərbaycan ermənilərin bu kimi tələblərinə qarşı hesab edirəm ki, hüquqi addımlara başlayaraq, öz məcburi köçkünlərinin beynəlxalq məhkəmədə Ermənistana qarşı təzminat qaldırmasına şərait yaratmalıdır. Bu gün Dağlıq Qarabağda yaşayan ermənilərin heç bir təzminat tələbi ilə çıxış etməyə haqqı yoxdur. Belə bir tələblə azərbaycanlılar çıxış etməlidirlər. Çünki azərbaycanlılardan fərqli olaraq, onlar ərazilərdən qovulmayıblar. Qərbi Azərbaycandan deportasiya edilənlər, həmçinin, Dağlıq Qarabağ və ətraf rayonlardan olan məcburi köçkünlər eyni tələbi Ermənistana qarşı irəli sürməlidirlər. Bu gün azərbaycanlıların mülkləri ermənilər tərəfindən talan edilib, etnik təmizləmə aparılıb. Görünür, ermənilərin bu açıqlamaları mahiyyətdən kənar danışıqlar aparmaqdır”.
Cəmilə QARAYEVA
