Daşdəmir Əliyev: “Azərbaycan rəhbərliyinin verdiyi bütün bəyanatlar ölkənin maraqları ilə uzlaşır”
Məlum olduğu kimi, Azərbaycanın müdafiə naziri general-polkovnik Zakir Həsənov ölkəmizdə səfərdə olan Avropa İttifaqının Cənubi Qafqaz və Gürcüstandakı böhran üzrə xüsusi elçisi Toivo Klaarın başçılıq etdiyi nümayəndə heyəti ilə görüşü zamanı sərt bəyanat səsləndirib.
General-polkovnik Z.Həsənov cəbhə xəttində iki silahlanmış ordunun daim üz-üzə dayandığını qeyd edərək müharibənin hər an başlaya biləcəyini istisna etməyib. Nazir qeyd edib ki, beynəlxalq qurumlar Dağlıq Qarabağ münaqişəsinin fəsadlarının araşdırılması ilə deyil, onu yaradan səbəblərin köklü surətdə aradan qaldırılması ilə məşğul olmalı və münaqişənin bütövlükdə həllinə səy göstərməlidirlər.
Ermənistan tərəfi bu çıxış ətrafında şou yaratmaq istəyir. Onlar müdafiə nazirinin bu bəyanatını beynəlxalq dairələrə Azərbaycanın müharibəyə meylli olması kimi təqdim etməyə çalışırlar. Qeyd edək ki, Ermənistan bundan əvvəl ölkəmizin başçısı İlham Əliyevin hakim partiyanın qurultayında səsləndirdiyi fikirlər ətrafında da analoji ajiotajı yaratmağa cəhd etdi. Həmin vaxt İlham Əliyevin “biz tarixi torpaqlarımıza qayıdacağıq” kimi açıqlamasını Ermənistan özlərinə qarşı ərazi iddiası kimi yozmağa başladı. Halbuki, İlham Əliyev həmin fikri işlədərkən bizim Göyçə, Zəngəzur kimi tarixi mahallarımızın adını çəkmişdi və ordan didərgin düşən soydaşlarımızın həmin yerlərə mütləq qayıtmalarının zəruriliyinə işarə etmişdi. Ermənilərin ölkə başçısının fikirləri ətrafında yaratmaq istədikləri beynəlxalq ajiotaj cəhdi heç bir səmərə verməyəndən sonra onlar eyni cəhdləri müdafiə nazirinin açıqlaması ətrafında etməyə can atırlar. Onların bu fəaliyyəti hansısa səmərə verə bilərmi?
Ekspert Daşdəmir Əliyevin sözlərinə görə, istər ölkə başçısı, istərsə də müdafiə naziri çox doğru olan mövqe sərgiləyiblər: “Cənab Prezident bizim tarixi torpaqlarımıza qayıtmağımıza haqqımızın olduğunu çox doğru olaraq vurğulayıb. Çünki ölkə başçısının adını çəkdiyi həmin torpaqların Ermənistan tərəfindən qəsb edilməsinin üstündən o qədər də uzun zaman keçməyib ki, unudulsun. Onların buna irad bildirməyə heç bir haqqı yoxdur. Müdafiə naziri də vəziyyəti çox dəqiq ifadə edib. Doğru olaraq bildirib ki, indiki vəziyyət müharibənin başlaya biləcəyini istisna etmir. Bəs nə deməlidir? Ermənistan işğal altında saxladığı torpaqlardan geri çəkilmirsə, onların başqa cür necə cavabı verilə bilər? Azərbaycan hər zaman bəyan edir ki, sülh danışıqları səmərə verməyəcəyi təqdirdə, biz hərbi yolla torpaqlarımızı işğaldan azad edəcəyik. Bu, işğala məruz qalan bir ölkə kimi bizim haqqımızdır. Azərbaycan rəhbərliyinin verdiyi bütün bəyanatlar ölkənin maraqları ilə uzlaşır. Ermənistandan fərqli olaraq, taleyüklü problemlə bağlı bizim rəsmilərin hamısı vahid mövqedən çıxış edirlər. Bu baxımdan da Ermənistanın etdiyi səylərin heç biri səmərə verən deyil. Çünki biz ədalətə, haqqa söykənərək fikir bildiririk”.
Məhəmmədəli QƏRİBLİ
