Vüqar Qədirov: “Rusiyalı şərqşünasın təklifini uğurlu saymaq olar”
Rusiya Elmlər Akademiyasının Şərqşünaslıq İnstitutunun baş elmi işçisi İrina Zvyagelskaya bildirib ki, Azərbaycana danışıqlar arenası kimi ehtiyac yarana bilər.
Ekspertin sözlərinə görə, indi əlavə neytral danışıqlar arenasına ehtiyac yaranıb: “Azərbaycanın region üzrə tərəfdaşları ilə, xüsusilə də Rusiya, Türkiyə, İran və İsraillə, digər sözlə, Suriya prosesinə cəlb olunan ölkələrlə tolerant dialoq aparmaq bacarıqlarını nəzərə alsaq, Azərbaycanın danışıqlar arenası kimi təşəbbüslərinə tələbat ola bilər”.
İ.Zvyagelskaya əlavə edib ki, bu kontekstdə Astananın təcrübəsi faydalıdır: “Azərbaycan regiondakı geostrateji mövqeyini nəzərə almaqla danışıqlar arenası qismində öz potensialını artıra bilər”.
Azərbaycana verilən bu yüksək önəm nə ilə bağlıdır?
Ekspert Vüqar Qədirovun sözlərinə görə, belə qənaətə təsadüfən gəlinməyib: “Bunu bir çox amillərlə izah etmək mümkündür. Rəsmi Bakı dəfələrlə bəyan edib ki, ölkəmizin xarici siyasəti çoxşaxəlidir. Bu siyasət dünyada gedən proseslərə təsir imkanları olan hər bir beynəlxalq təşkilatla əməkdaşlığı, ölkələrlə qarşılıqlı münasibətlərin qurulmasını və inkişafını özündə ehtiva edir. Azərbaycanın Qərbi Avropa dövlətləri ilə münasibətləri xüsusi əhəmiyyət daşıyır. Eyni zamanda, Azərbaycan Şərqlə müxtəlif sahələrdə səmərəli əməkdaşlıq əlaqələri qurmağa çalışır. Azərbaycan yürütdüyü dövlət siyasətində bəşəri dəyərlərin bərqərar olmasına dəstək verir. Hətta deyərdim ki, dünyada bu işin aparılmasında lokomotivlik edir. Bura multikulturalizm, tolerantlıq, birgə yaşayış kimi mövzuları aid edə bilərik. Eyni zamanda, Azərbaycan fərqli sivilizasiyaların birləşdiyi bir ölkə modelini ortaya qoyub. Dünyəvi ölkə olsa da, dini dəyərlərin təbliğinə, inkişafına dəstək verir. Diplomatik müstəvidə də bu siyasəti davam etdirir. Bir çox ikili və üçtərəfli əməkdaşlıq formatlarının təşəbbüskarı olub. Eyni zamanda, dünyanın qüdrətli ölkələri arasında uğurlu vasitəçilik missiyasını həyata keçirməyi bacarıb. Buna misal kimi Türkiyə ilə Rusiya arasında yaranan diplomatik sərinlik zamanı ölkəmizin tutduğu uğurlu və səmərəli rolu göstərə bilərik.
Azərbaycan Suriya məsələsinin çözümü ilə bağlı əlindən gələn bütün səyləri göstərib. Biz BMT-dəki fəaliyyətimizdə bunu bir daha sübut etdik. Bütün bu sadalananlar ölkəmizin doğrudan da güvənilə biləcək bir arena rolunu oynaya biləcəyini göstərir. Xüsusilə də Suriya münaqişəsilə bağlı bu format daha uğurlu alına bilər. Çünki münaqişədə maraqlı sayılan hər bir ölkə ilə Azərbaycanın isti və qarşılıqlı etimada söykənən münasibətləri var. Bu baxımdan da rusiyalı şərqşünasın təklifini uğurlu saymaq olar”.
Məhəmmədəli QƏRİBLİ
