Qabil Hüseynli: “Ümumiyyətlə, ölkədə mövcud olan vəziyyət beynəlxalq müşahidə missiyalarının Azərbaycana gəlişi üçün münbit zəmin yaradır”
Nüfuzlu beynəlxalq təşkilatların Azərbaycanda aprelin 11-nə təyin edilən prezident seçkilərinə yönəlik fəallığı artmaqdadır. Müşahidələr göstərir ki, əvvəlki dövrlərdən fərqli olaraq, beynəlxalq qurumlar, təsisatlar seçkini müşahidə etməyə daha çox maraq göstərirlər. Eyni zamanda, bu istiqamətdə birgə əməkdaşlıq imkanlarını nəzərdən keçirirlər. Görünən odur ki, buna maraq getdicə artır.
Məlum olduğu kimi, bu çərçivədə ATƏT-in Demokratik Təsisatlar və İnsan Hüquqları Bürosu (DTİHB) Azərbaycandakı seçkiqabağı vəziyyəti öyrənmək üçün öz qiymətləndirmə missiyasını Bakıya göndərəcək. Fevralın 21-22-də Bakıda olacaq ATƏT DTİHB-nin missiyasının səfərin yekunlarına dair hesabatı iki həftə ərzində hazırlanacaq. Qeyd olunur ki, ATƏT təmsilçilərinin Bakıda aparacağı danışıqların nəticələrindən asılı olaraq, DTİHB seçki prosesini izləmək üçün Azərbaycana müşahidə missiyası da göndərə bilər. Belə ki, missiya müvafiq məlumatları toplayacaq və prezident seçkilərinin müşahidə edilməsi üçün missiyanın göndərilib-göndərilməyəcəyinə və onun mümkün formatına dair tövsiyələr hazırlayacaq.
O da məlumdur ki, Azərbaycanla ATƏT-in sözügedən qurumu arasında əvvəllər müəyyən məsələlərlə bağlı bəzi fikir ayrılıqları da olub. Elə məqamlar olub ki, seçkilərin müşahidə olunmasına qurum maraq göstərməyib. Hər halda, ATƏT DTİHB-nin məlum təşəbbüslə çıxış etməsi bu istiqamətdə münasibətlərin inkişafının ifadəsi kimi sayıla bilərmi?
Sözügedən məsələni dəyərləndirən politoloq Qabil Hüseynli hesab edir ki, buna o kontekstdən yanaşmaq olar. Onun fikrincə, Azərbaycan hökuməti ilə ATƏT arasında 11 aprel seçkilərinə yönəlik əməkdaşlığın baş tutmasında problem yoxdur: “ATƏT missiyasının Bakıya gözlənilən səfəri müsbət məqam kimi qiymətləndirilə bilər. Bu onu göstərir ki, Azərbaycanda keçiriləcək prezident seçkiləri Qərbin diqqət və maraq dairəsindədir. Ona görə də hesab edirəm ki, Azərbaycan hökuməti ilə ATƏT-in müvafiq strukturu arasında seçki əməkdaşlığının baştutma ehtimalı yüksəkdir. Bu əməkdaşlıqla bağlı əsas məqamlar razılaşdırılarsa, o halda ATƏT-in müşahidə missiyası formalaşdırılaraq, Azərbaycana gəlməsində problem yaranmaz. Ümumiyyətlə, ölkədə mövcud olan vəziyyət beynəlxalq müşahidə missiyalarının Azərbaycana gəlişi üçün münbit zəmin yaradır. Etiraf edək ki, hazırda Prezident İlham Əliyevin timsalında hakimiyyət namizədi potensial rəqiblərindən müqayisəolunmaz dərəcədə öndədir. Belə bir vəziyyətdə seçkilərin beynəlxalq standartlar əsasında keçirilməsində və əcnəbilərin seçki prosesini izləmələrinə şərait yaradılmasında problem olmamalıdır. Zənnimcə, Azərbaycan rəsmiləri ilə ATƏT təmsilçilərinin bu istiqamətdə apacaqları müzakirələr müsbət nəticələnəcək. Azərbaycanda prezident seçkilərinin yüksək səviyyədə, demokratik keçiriləcəyi bu əməkdaşlığa zəmin yaradır”.
Cəmilə QARAYEVA
