Vüqar Qədirov: “Ardıcıl məğlubiyyətlərinizi əhatə edən 25 illik bir dönəm sizə səfərbər olmaq üçün bəs etmədi?” Əli Orucov: “AMİP hər zaman seçkilərə hazır olan partiyadır”
Azərbaycanda keçiriləcək növbədənkənar prezident seçkilərində namizədlərin irəli sürülməsi prosesinə fevralın 20-də start veriləcək. Prezidentliyə namizəd olmaq istəyən şəxslər sənədlərini səsvermə gününə ən çoxu 50 (20 fevral) və ən azı 30 gün qalmış saat 18.00-dək Mərkəzi Seçki Komissiyasına (MSK) təqdim etməlidirlər.
İrəli sürülmüş namizədlərin qeydə alınması üçün namizəd və ya siyasi partiyanın, siyasi partiyalar blokunun səlahiyyətli nümayəndəsinin seçki sənədlərinin MSK-ya təqdim edilməsi üçün ayrılan müddət martın 12-də başa çatacaq.
Azərbaycanda növbədənkənar prezident seçkiləri aprelin 11-nə təyin olunub.
Maraqlıdır ki, bəzi müxalifət partiyaları seçkinin vaxtının irəli çəkilməsini müxtəlif amillərlə izah etməyə çalışırlar. Daha doğrusu, vaxtın azlığını əsas gətirərək, hazırlaşmağa imkanlarının olmadığını bəhanə edib indidən məğlubiyyətlərini kompensasiya etmək istəyirlər. Çox maraqlı məntiq ortaya çıxır. İddiaların mahiyyəti budur ki, hakimiyyət müxalifəti məhz vaxt seytnotuna salıb məğlub etmək üçün seçkini ertələdi. Müxalifətin daha öncəki on illər boyu kifayət qədər seçki vaxtı olsa da, ciddi nəticə göstərə bilmədiklərini nəzərə alsaq, bu gün səslənən arqumenti nə qədər əsaslı saymaq olar?
Politoloq Vüqar Qədirov qəzetimizə açıqlamasında bildirdi ki, seçkilərin növbədənkənar keçirilməsilə bağlı çoxsaylı şərhlərə rast gəlmək olur: “Onların arasında bunu qlobal amillərlə izah edəndən tutmuş, daxili faktora əsaslandığını iddia edənlər də var. Ən maraqlı münasibəti isə müxalif cameənin bəzi təmsilçilərinin dilindən eşitdik. Onlar iddia edirlər ki, guya hakimiyyət bu addımı onların seçkilərə yaxşı hazırlaşmaq imkanını əllərindən almaq üçün edib. Adama sual edərlər: siz 1993-cü ildən indiyə kimi hansı seçkini udubsunuz və ya ardıcıl məğlubiyyətlərinizi əhatə edən 25 illik bir dönəm sizə səfərbər olmaq üçün bəs etmədi? Göründüyü kimi, onların bu iddiasında heç bir məntiqi izah tapmaq mümkün deyil. Bu baxımdan müxalifətin vaxt azlığı ilə bağlı gətirdiyi bəhanələrin heç bir ciddi əsası yoxdur. Onlar indidən bilirlər ki, seçkinin əsl favoriti İlham Əliyevdir. Ona görə də müxtəlif bəhanələrlə bu estafetdən yayınmaq istəyirlər”.
Azərbaycan Milli İstiqlal Partiyasının (AMİP) Siyasi Şurasının üzvü Əli Orucov isə hesab edir ki, növbədənkənar seçkilər bizim üçün çox gözlənilməz qərar oldu: “Seçkilərə qısa müddət ərzində hazırlaşmaq təbii ki, asan deyil. Amma AMİP hər zaman seçkilərə hazır olan partiyadır. Buna baxmayaraq, yaxın müddətdə partiyanın müvafiq qurumları hadisələri dəyərləndirib qərarını verəcək”.
Məhəmmədəli QƏRİBLİ
