Qabil Hüseynli: “Seçkilərin vaxtının irəli çəkilməsi Ermənistan və Rusiyada keçirilən seçkilərlə bağlıdır” Zahid Oruc: “Seçki oktyabrda keçirilsəydi...” Əli Əliyev: “Sərəncam imzalanıb, qrafikə uyğunlaşmalıyıq”
Prezident İlham Əliyev “Növbədənkənar Azərbaycan Respublikası Prezidenti seçkilərinin elan edilməsi haqqında” Sərəncam imzalayıb.
Sərəncamda deyilir: “Azərbaycan Respublikası Konstitusiyasının 101-ci maddəsinin I hissəsini rəhbər tutaraq, Azərbaycan Respublikası Seçki Məcəlləsinin 179-cu maddəsinə uyğun olaraq qərara alıram:
1. Növbədənkənar Azərbaycan Respublikası Prezidenti seçkiləri elan edilsin.
2. Azərbaycan Respublikasının Mərkəzi Seçki Komissiyası növbədənkənar Azərbaycan Respublikası Prezidenti seçkilərinin 2018-ci il aprelin 11-nə təyin olunmasını və Azərbaycan Respublikasının Seçki Məcəlləsində müəyyən edilmiş qaydada keçirilməsini təmin etsin”.
Növbədənkənar prezident seçkilərinin keçirilməsi hansı zərurətdən irəli gəlib və bunun ölkəmizə nə kimi faydası olacaq?
Politoloq Qabil Hüseynli qəzetimizə açıqlamasında bildirdi ki, bununla Azərbaycan olduqca ciddi bir manevr edib: “Hesab edirəm ki, seçkinin bir neçə ay qabağa çəkilməsi sırf beynəlxalq faktorlarla bağlıdır. Bəzi şərhlərdə bu, yanlış olaraq daxili faktordan irəli gələn narahatlıqla izah olunur. Ancaq bu versiyanı ağlabatan hesab etmirəm. Seçkilərin vaxtının irəli çəkilməsi Ermənistan və Rusiyada keçirilən seçkilərlə bağlıdır. Bilirsiniz ki, həmin iki ölkədə keçiriləcək prezident seçkiləri arasında çox qısa bir zaman var. Ona görə də Azərbaycan üçün vacib əhəmiyyət kəsb edən Dağlıq Qarabağ probleminin həlli daha da uzadıla bilərdi. Əvvəl hər iki ölkədə keçirilən seçkilər bəhanə gətiriləcəkdi. Sonra ilin axırında Azərbaycanda keçiriləcək prezident seçkilərini gözləməyi bəhanə edəcəkdilər. Bu gedişlə biz həmin bəhanələrə son qoymuş oluruq. Eyni zamanda, öz manevr imkanlarımızı da artırırıq. Həm də prezident seçkilərindən sonra ölkədə ciddi kadr islahatının aparılacağı qənaətindəyəm. Təbii ki, bu seçkilərin favoriti İlham Əliyevdir və onun yeni komandanı formalaşdırmaqda da vaxt udacağı ortaya çıxacaq. Bir sözlə, seçkiləri irəli çəkməklə Azərbaycanın itirdiyi nəsə olmur, əksinə, qazandıqları çox olacaq”.
Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Zahid Oruc da Prezident İlham Əliyevin sərəncamı ilə növbədənkənar prezident seçkilərinin aprelin 11-nə təyin edilməsini yüksək qiymətləndirir: “Hesab edirəm ki, bu, Azərbaycanın ali qanununun - Konstitusiyasının norma və prinsiplərinə tam uyğundur”.
O qeyd edib ki, bu, meydan davaları, küçə savaşları, vətəndaş toqquşmaları ilə müşayiət olunan və ya xaricdən hər hansı qüvvənin ssenarisi əsasında, onların dirijor çubuğu ilə gerçəkləşdirilən hadisə deyil: “Biz ötən on illər ərzində seçicilərin iradəsi ilə hakimiyyət institutlarının formalaşdığının şahidi olmuşuq. 2016-cı ildə keçirilən ümumxalq səsverməsində Prezidentin səlahiyyət müddəti 5 ildən 7 ilə artırıldı. Belə bir situasiya meydana çıxırdı ki, prezident və parlament seçkiləri 2025-ci ildə yaxın aylara təsadüf edir. Bu da siyasi dayanaqlılığa mənfi təsir göstərə bilər. Bu, Qərb təcrübəsidir. Düşünürəm ki, bu məqamlar nəzərə alınıb. Bu il keçiriləcək prezident seçkilərində iddiaçılar iştirak imkanlarını saxlayırlar. Seçki oktyabrda keçirilsəydi, ölkədə 25 ildir özlərini hakimiyyətdən kənar saxlayanlar, elektoral bazanı itirənlər, siyasi tənha durumuna gəlib çatanlar seçkiyə fərqli durumda daxil olacaqdılar? Burada hansı hazırlıq məsələsindən söhbət gedə bilər? Yəni vaxtın tez və ya gec olması vəziyyəti dəyişmir. Bu qərarın verilməsinə həm ölkənin təhlükəsizlik maraqları, həm ölkənin siyasi gələcəyi, həm də hakimiyyət orqanlarının formalaşmasındakı zaman ardıcıllığı təsirini göstərib”.
Müxalif Vətəndaş və İnkişaf Partiyasının prezidentliyə namizədi Əli Əliyevin sözlərinə görə, növbədənkənar seçkiyə gediləcəyi gözlənilən idi: “Mən bu seçkini gözləyirdim. Təxminən 2 ay əvvəl bildirmişdim ki, mart ayında və ya apreldə növbədənkənar seçkinin ola biləcəyi ehtimalı var. Qəfil növbədənkənar seçki əlbəttə ki, bizim planlarımıza təsir edən qərardır. Çünki iş planımız 9 aylıq tərtib olunmuşdu. İndi həmin həcmi 2 aya icra etməliyik. Resurslar da o müddətə hesablanmışdı. Lakin heç nə etmək olmaz. Sərəncam imzalanıb, qrafikə uyğunlaşmalıyıq. Hazırlıqsız yaxalanmamız faktdır və vazkeçilməzdir”.
Əli Əliyevin fikrincə, bu hadisəyə müxalifət adekvat olmağı bacarmalıdır, təmaslar sürətlənməlidir: “Müxalifətin təmasları intensivləşdirməsi, xalqla işləməsi zəruridir. Əks halda biz diktə olunan qaydalarla növbəti məğlubiyyətə doğru iri addımlarla qaçacağıq”.
Məhəmmədəli QƏRİBLİ
