Kənan Qubadzadə: “Heydər Əliyev hakimiyyətə gələnə qədər gənclik müəyyən şəxslərin hakimiyyət uğrunda ambisiyalarının iştirakçısına çevrilmişdi”
Tarixən hər bir xalq özünün xoşbəxt gələcəyə olan ümidlərini, ilk növbədə, gənc nəsillə bağlayır. Gənc nəslin yetişdirilməsi hər bir ölkə üçün ən başlıca məsələdir.
Həmçinin, dünyanın istənilən ölkəsində gənclər də sosial-iqtisadi inkişafın aparıcı qüvvələrindən biri, cəmiyyətin islahatları hərəkətə gətirən zümrəsi və yaşlı nəslin davamçısı hesab olunur, gənclər cəmiyyətin ən dinamik zümrəsi olmaqla ictimai-siyasi, sosial-iqtisadi və mədəni həyatında fəal iştirak edir, ölkədə baş verən bütün proseslərin mərkəzində dayanırlar. Nəsillər dəyişir, ölkələr inkişaf edir. Ancaq ənənələr, milli dəyərlər gənc nəslin vətənpərvərlik ruhunda tərbiyə olunması onun mənsub olduğu xalqın rifahının və ölkənin çiçəklənməsinin rəhnidir.
Bu gün Azərbaycan gəncliyi ictimai həyatın bütün sferalarında yüksək fəaliyyəti ilə seçilir və siyasi, iqtisadi, humanitar, sosial tədbirlərin həyata keçirilməsində mühüm rol oynayır. Gənclərin fəaliyyəti üçün dövlətin yaratdığı geniş imkanlar nəticəsində bu təbəqə cəmiyyətin avanqard qüvvəsinə çevrilib. Məhz bunun nəticəsidir ki, Azərbaycan tarixinin hər bir mərhələsində olduğu kimi, müstəqillik dövründə də gənclər aparıcı sosial-siyasi qüvvəyə çevrilib, müstəqilliyimizin qorunub saxlanması, möhkəmləndirilməsi və dövlətçiliyin inkişaf etdirilməsi prosesində yaxından iştirak edərək tarixi nailiyyətlərə imza atıblar.
Maraqlıdır, müasir Azərbaycan gəncini 90-cı illərin əvvəllərindəki gənclərdən fərqləndirən cəhətlər nədir?
“Gənclər Mərkəzi” İctimai Birliyinin icraçı direktoru Kənan Qubadzadə “Bakı-Xəbər”ə açıqlamasında qeyd etdi ki, 90-cı illərin gəncliyi ilə indiki gənclik arasında fərqlər çoxdur: “90-cı illərin gəncləri daha maraqlı idilər. O vaxt Azərbaycan yeni müstəqillik əldə etmişdi. Gənclər dövlət quruculuğu prosesində çox yaxından iştirak etmək istəyirdilər. Ona görə də gənclər üçün hər bir iş, addım kifayət qədər əhəmiyyətli və yeniliklərlə dolu idi. Həmçinin, o dövrün gəncləri daha çox ideyalar və təkliflərlə çıxış edirdilər”.
Həmsöhbətimiz onu da bildirdi ki, mərhum prezident Heydər Əliyev hakimiyyətə gələnə qədər gənclik müəyyən şəxslərin hakimiyyət uğrunda ambisiyalarının iştirakçısına çevrilmişdi: “O dövrdə hakimiyyətlə cəmiyyət qarşıdurmasının təməlində də gənclik dururdu. Xatırladım ki, 1993-cü ilin avqust ayında Heydər Əliyev parlamentdə gənclərlə görüş keçirdi, gənclərin dövlət quruculuğunda rolu müzakirə edildi. Heydər Əliyev prezident seçiləndən sonra ilk addımlardan biri kimi Gənclər və İdman Nazirliyini yaratdı. Gənclər siyasəti prioritet siyasətə çevrildi. Bu siyasət Prezident İlham Əliyev tərəfindən uğurla davam etdirilir”.
K.Qubadzadə onu da əlavə etdi ki, Azərbaycan gəncliyi bu illər ərzində xeyli uğurlara imza atıb. Gənclər dövlət quruculuğu prosesində aktiv iştirak edirlər.
“Gənclər Mərkəzi” İctimai Birliyinin icraçı direktorunun sözlərinə görə, hazırda gənclərimiz mədəniyyət, incəsənət, idman, elm, təhsil, texnologiya və başqa sahələrdə öz istedadlarını və qazandıqları uğurları layiqincə nümayiş etdirirlər: “Əgər əvvəllər istedadlı Azərbaycan gənci öz potensialını üzə çıxarmaq üçün şəraitin olmamasından haqlı olaraq gileylənirdisə, indi vəziyyət tam başqadır. Hər bir perspektivli Azərbaycan gəncinin yetişməsi üçün ölkəmizdə dövlət tərəfindən lazımi şərait yaradılıb”.
Günel CƏLİLOVA
