Vüqar Qədirov: “Ancaq etiraf etmək lazımdır ki, Azərbaycanın özünün də bu sahədə ciddi təcrübəsi mövcuddur”
Rusiya Xarici İşlər Nazirliyinin sözçüsü Mariya Zaxarova Azərbaycanın daxili işlərinə müdaxilə ilə bağlı açıqlama verib. O deyib ki, daxili işlərə müdaxiləni müəyyən etmək, ictimaiyyətə çatdırmaq və bunu olduqca ətraflı etmək lazımdır.
Keçirdiyi brifinqdə Mariya Zaxarova “Rusiya və Azərbaycan daxili işlərinə qarışılması və prezident seçkiləri öncəsi göstərilən təzyiqlə necə mübarizə aparmalıdırlar” sualına cavabında isə deyib ki, bu çox ciddi məsələdir: “Eləcə də daxili işlərə müdaxilə ilə bağlı məlumatları müvafiq ixtisaslaşmış beynəlxalq strukturlara təqdim etmək lazımdır, hansı ki, bu strukturlar sadəcə müəyyən etməklə deyil, belə müdaxilələrə reaksiya verməklə məşğuldurlar. Burada resept sadədir”.
Rusiya rəsmisinin bu tövsiyəsini necə qiymətləndirmək olar?
Ekspert Vüqar Qədirovun sözlərinə görə, Mariya Zaxarovanın bu kontekstdə Azərbaycanın adını çəkməsi təsadüfən olmayıb: “Brifinqdə ona məhz Azərbaycanla onun təmsil etdiyi ölkənin adını çəkərək sual veriblər. Buradakı qanunauyğunluq onunla bağlıdır ki, bu il həm Rusiyada, həm də Azərbaycanda prezident seçkiləri baş tutacaq. Sualın qoyuluşunda bu iki ölkənin adının məxsusi olaraq çəkilməsi bu amilə bağlıdır. Təbii ki, cavabdakı məqamlarla razılaşmaq olar. Ancaq etiraf etmək lazımdır ki, Azərbaycanın özünün də bu sahədə ciddi təcrübəsi mövcuddur. Hətta bu məsləhət olmasa belə, biz hansı addımların atılmasının zəruriliyini dərk edirik. Azərbaycanda bundan əvvəl keçirilən prezident seçkiləri zamanı da ölkənin daxili işlərinə müdaxilə, nəticələri təhrif edən açıqlamaların verilməsi halları olub. Ancaq gəlin etiraf edək ki, bunların sayı və təsir dairəsi çox az olub. Azərbaycan ciddi arqumentlərlə həmin iddiaları darmadağın edib. Yadımdadır, son prezident seçkilərində bir nümayəndə heyəti gəlmişdi. Onlar seçki ilə bağlı tənqidi hesabat təqdim etdilər. Bu bir müddət əvvəl Ermənistandakı prezident seçkilərini izləyən missiya idi. Maraqlıdır ki, iki namizədə güllə atıldığı, onlardan birinin ağır yaralandığı bir seçki mühiti onlar tərəfindən yaxşı kimi dəyərləndirilmişdi. Biz bu iki müqayisəni ictimailəşdirdik, hətta beynəlxalq təşkilatlara belə göndərdik. Nəticənin Azərbaycana yox, onlara pis təsiri oldu. Onlar öz beynəlxalq reputasiyalarına xələl gətirmiş oldular. Bu baxımdan da seçkilərə müdaxilə ilə bağlı bütün qurumlar, mətbuat, QHT-lər səfərbər olmalıdırlar ki, bizə xaricdən hər hansı bir təzyiq olmasın. Zəngin təcrübəmiz olduğu üçün, bunun öhdəsindən layiqincə gələ biləcəyik. Bununla bərabər, xanım Zaxarovanın təklifini də dəyərləndirməyə dəyər”.
Məhəmmədəli QƏRİBLİ
