Diaspor Sarkisyanı devirmək üçün hərəkətə keçdi
Prezident və baş nazir seçkiləri yaxınlaşdıqca Ermənistanda Serj Sarkisyan və komandasına qarşı duyulan narazılıq özünü daha qabarıq həddə büruzə verməkdədir. Belə görünür ki, təkcə erməni cəmiyyəti yox, həm də ölkədəki proseslərə böyük təsir imkanlarına malik diaspor qüvvələri Serj Sarkisyana qarşı aktiv kampaniyaya start vermək, bununla onun hakimiyyət başında qalmasına mane olmaq niyyətindədir.
Nüfuzlu diaspor nümaynədlərinin bir-birinin ardınca Sarksiyana qarşı verdikləri açıqlamalar da qeyd edilənləri təsdiq edir.
Diaspor diqqəti bu məqamlara çəkir ki, iqtisadi tənəzzül, aclıq və səfalət özünü təcrid vəziyyətinə salmış Ermənistanın real mənzərəsidir. Ölkədə sosial layihələr həyata keçirilmədiyindən, əhalinin həyat səviyyəsi hər ötən gün ağırlaşır. Məhz bu durumda büdcəni xarici ianələr hesabına doldurmağa çalışan Ermənistan hökuməti indi də ölkə diasporunun hədəfindədir. Artıq məlumat verildiyi kimi, bu günlərdə Avropa Erməniləri Assosiasiyaları Forumunun sədri Aşot Qriqoryan investorları ayıq-sayıq olmağa və Ermənistana sərmayə qoymamağa çağırıb. O, diaspor üzvlərinə, nə qədər ki ölkə rəhbərliyində Serj Sarkisyan və Karen Karapetyan var, Ermənistana getməməyi məsləhət görüb. Ermənistanda uğursuz investisiya təcrübəsindən danışan diaspor təşkilatının rəhbəri bildirib ki, hökumət əhaliyə daim yalan danışır. Onların fırıldaqçılığına görə Ermənistanda investisiya yatırmağa maraq göstərən insanlar oradan qaçır. Bildirilir ki, diaspor ölkəyə kifayət qədər pul xərcləyib, biznes planlar hazırlanıb, lakin bütün səylər boşa çıxıb. Sərf olunan pullar təyinatı üzrə istifadə edilməyib. Belə olsaydı, Ermənistan iqtisadiyyatı tənəzzülə uğramaz, əhali isə normal şərtlər altında yaşayardı.
Bundan əvvəl isə rusiyalı erməni əsilli iş adamı Levon Markos da Serj Sarkisyana açıq məktub ünvanlayaraq, Ermənistan hakimiyyətinin korrupsiya sxemi barədə maraqlı məlumatlar səsləndirib. Levon Markos Ermənistan iqtisadiyyatına təxminən 300 milyon dollar sərmayə yatırıb və prezidentin xahişi ilə müflisləşmiş müəssisələri alıb. Lakin sonradan bütün biznesi Markosun əlindən alınıb, özü isə beynəlxalq axtarışa verilib. Levon Markos qeyd edir ki, vaxtilə Serj Sarkisyana inanıb və Ermənistan iqtisadiyyatına böyük məbləğdə vəsait qoymaq qərarına gəlib. Bu məqsədlə o, Rusiyadakı bəzi perspektivli və rəqabət qabiliyyətli layihələrini dayandırıb: “Bundan başqa, mən Rusiya banklarından həcmli kreditlər götürdüm və bütün bu vəsaitləri Ermənistan iqtisadiyyatına yatırdım. Çünki səmimi olaraq çətin vəziyyətə düşmüş vətənimə kömək etmək istəyirdim. Sizin vədlərinizə inanaraq, bir neçə müflisləşmiş müəssisəni aldım. Bir sıra digər sənaye obyektləri əsasında mən sənaye yönümlü bir neçə layihə hazırladım. Onların ümumi dəyəri Moskva auditorları tərəfindən 300 milyon ABŞ dolları həcmində qiymətləndirilirdi. Həmin layihələr Ermənistanın iqtisadi inkişafına ciddi impuls verə bilərdi. Bunlardan bəziləri start mərhələsində idi. Lakin sonradan iş yerindən tərpənmədi. Heç bir konkretlik yox idi – yalnız sabun köpüyü və boş sözlər… Sarkisyan, siz düzgün hərəkət etmədiniz. “Vətənin xilası” yalanı ilə siz mənə müflisləşmiş bankı “soxuşdurdunuz” və həmin vaxt hamı həmin bankdan pul qoparmaqla məşğul idi. Aldığım obyektləri quldurluqla ələ keçirdiniz və yaxınlarınıza – Samvel Aleksanyana və Qagik Xaçatryana verdiniz. Siz mənim obyektlərimdən gələn gəlirləri qanunsuz olaraq mənimsəyirsiniz. Bu gün mənə müraciət edən bir çox həmvətənlərim ürək ağrısı ilə Ermənistanda törədilən qanunsuzluqlardan və özbaşınalıqdan danışır. Sizin qurduğunuz korrupsion-quldur sistem öz qara işini görməkdədir. Son illərdə sizin komandanız 34 iri erməni iş adamını talayıb”. Hesab edilir ki, bu qəbildən olan halların açıqlanması, erməni disporunun Sarksiyanı hədəfə alması indiki iqtidar üçün ciddi problemlər yaradacaq.
Ölkədə isə hazırda böhran, aclıq və səfalət hökm sürür. Bütün bunların kökündə hökumətin yürütdüyü işğalçılıq siyasəti dayanır. Hakimiyyət illərdir ki, Dağlıq Qarabağ kartından öz maraqları üçün istifadə edir. Bu fonda o da üzə çıxarılıb ki, hökumət Qarabağ konflikti fonunda Ermənistana köçən ermənilərdən istifadə edərək xarici təşkilatlardan külli miqdarda pul alır. Bu məsələni araşdıran “epress.armenia” xəbər portalı ortaya maraqlı faktlar çıxarıb. Məlum olub ki, Ermənistan hökuməti bütün səfirliklərə Azərbaycandan gələn ermənilərin ölkələrinə buraxılmaması tapşırığını verib. Abovyanda məskunlaşan Stella Arutunyan bu xüsusda qeyd edib ki, Ermənistanda girov kimi yaşayırlar. Bir vaxtlar Azərbaycanda yaşadıqları həyat tərzindən burada əsər-əlamət yoxdur. Yerli ermənilər onlara düşmən münasibəti bəsləyir: “Siz belə şərtlər altında yaşasaydınız Ermənistan vətəndaşı olmaq istərdinizmi? Burada bizə yer yoxdur. Ermənistan hökuməti bütün səfirliklərə təlimat verib ki, vaxtilə Azərbaycandan köçənləri ölkədən buraxmayın. Çünki biz qazanc mənbəyiyik. Ermənistanda qaçqınların həyat səviyyəsinin yaxşılaşdırılması üçün beynəlxalq təşkilatlardan maliyyə yardımı alırlar. Amma indiyə qədər kimsə bu pulların hara getdiyini araşdırıbmı? Hanı bizə tikdikləri evlər? Ümumiyyətlə, belə evlər mövcuddurmu? Mən bu şəraitdə necə yaşayım? Mətbəx yox, hamam yox, işləməyə yer yox, polis qorxusu daim başımızın üstündə... Ermənistan parlamentində deputatlar bizim problemlərimizi qaldırmağı lazımlı hesab etmir. Ötən il “Qırmızı xaç” cəmiyyəti yataqxanalarda yaşayan bizim kimilərin vəziyyətinin yaxşılaşdırılması üçün 5 milyon ayırdı. Hanı bu pullar?!”. Arutunyan Serj Sarkisyanı satqın adlandırıb: “O öz şəxsi qazancı, öz ailəsi, öz cibi haqda daha çox düşünür, nəinki əsgərlər və camaat haqqında”. Bütün bunlar fonunda hesab edilir ki, baş nazir olmaq istəyən Sarksiyanı həqiqətən də çox ciddi problemlər gözləyir.
Tahir TAĞIYEV
