Əli Əliyev: “Sanksiyaların tam gücü ilə tətbiqinə inanmıram, ancaq istənilən halda, bu, Rusiyada silkələnmə effektinə səbəb oldu”
ABŞ Xəzinədarlığı gələcək sanksiyalar üçün potensial hədəflər sayılan, prezident Vladimir Putinlə sıx əlaqələri olan rusiyalıların siyahısını açıqlayıb. “Kreml hesabatı” adını almış siyahıda 114 aparıcı rusiyalı siyasətçinin və 96 “oliqarx”ın adlarının olduğu bildirilir.
Onların Putinlə əlaqələr hesabına sərvət və hakimiyyətə yiyələndiyi qeyd olunur.Qeyri-rəsmi olaraq, siyahıya “Putin siyahısı” adı verilib. Siyahıya biznesmenlər Alişer Usmanov, Roman Abramoviç, Suleyman Kerimov və “Kaspersky Lab”ın yaradıcısı E.Kasperskyin adları salınıb. Amma prezident Donald Tramp administrasiyası Konqresə bildirmişdi ki, indiki məqamda Rusiyaya yeni sanksiyaları qoymayacaq. D.Tramp sözügedən qanunu “ciddi qüsurlarına” görə tənqid etsə də, bu qanunvericilik aktını könülsüz şəkildə imzalayıb.
“Kreml hesabatı” Konqresə yanvarın 29-da təqdim olunub. Siyahı yanvarın 30-na keçən gecə açıqlanıb. ABŞ Xəzinədarlığı siyahı ilə yanaşı açıqladığı bəyanatda bildirir ki, həmin şəxslər buraya sərvətinə və “Rusiya rejiminə yaxınlığına görə” salınıb.“Reuters” informasiya agentliyi yazır ki, siyahıya salınma onların sanksiya, yaxud hər hansı başqa məhdudiyyətlə üzləşməsi demək deyil. Siyahı həmin şəxslərin sanksiyaya qoyulmaqdan ötrü kriteriyalara uyğun gəldiyini göstərir. Rusiyanın baş naziri Dmitri Medvedyev, bütün nazirlər, o cümlədən xarici işlər naziri Sergey Lavrov, Kremlin sözçüsü Dmitry Peskov da sanksiya siyahısına salınıb.
Bu sanksiyalar Rusiyaya hansı təsirləri göstərəcək?
Vətəndaş və İnkişaf Partiyasının sədri Əli Əliyev qəzetimizə açıqlamasında bildirdi ki, Rusiyaya qarşı yönələn bu addımın bir necə hədəfi var: “ABŞ 210 nəfər yüksək vəzifəli Rusiya məmurlarına, baş nazirə, müavinlərinə, Prezident Aparatının başçısı və köməkçilərinə, dövlət şirkətləri rəhbərlərinə sanksiya tətbiq etmək istəyir. Onların xaricdəki hesabları, əmlakları, biznesləri ciddi yoxlanacaq. Bunun Rusiyaya birinci növbədə psixoloji təsiri olacaq. Söhbət adları “Forbes”in siyahısında olan çoxlu sayda iş adamından gedir. İkinci təsir isə dövlət postu tutan məmurlara hesablanıb. Putinin komandasında olan yüksək vəzifəli adamların da adının siyahıda olması göstərir ki, ABŞ Rusiya ilə bu dəfə zarafat etmək niyyətində deyil. Bununla Rusiyanın siyasi elitası da təzyiq altında fəaliyyət göstərməyə məcbur olacaq. İş adamlarının reputasiyası zədələnəcək. Belə zədəli reputasiya ilə isə onların pul qazanmaq imkanları məhdudlaşacaq. Ölkələrə səfər etmək, bank əməliyyatları həyata keçirmək mümkün olmayacaq. ABŞ-ın başlıca hədəflərindən biri də Rusiyanın daxilində narazılıq yaratmaqdır. Milyarder iş adamlarının çıxılmaz vəziyyətə salınması, bir növ, buna hesablanıb. Bu addım “elitanın” Putinə qarşı baş qaldırmasına səbəb ola bilər. Kifayət qədər maliyyə resurslarına nəzarət edən həmin iş adamları Rusiyanın daxilində həm də söz sahibidirlər. Onların bir neçəsinin Putin hakimiyyətinə narazılıq bildirməsi kifayət edər ki, Rusiyada kütləvi narazılıqlar baş qaldırsın. Trampın Konqresdəki son çıxışı bir daha sübut etdi ki, ABŞ-ın yeni administrasiyası Moskva ilə münasibətləri nizamlamaq haqda fikirləşmir. Trampın 1 saat 20 dəqiqəlik çıxışının böyük hissəsi Rusiya və onun müttəfiqlərinin tənqidinə və hədələnməsinə həsr edildi. Xüsusilə də İran barədə sərt fikirlər bildirildi. Sanksiyaların tam gücü ilə tətbiqinə inanmıram, ancaq istənilən halda, bu, Rusiyada silkələnmə effektinə səbəb oldu”.
Məhəmmədəli QƏRİBLİ
