Məhəmməd Əsədullazadə: “Hesab edirəm ki, bu sanksiyalar Lavrovun danışıqlarda iştirakına maneə yaratmayacaq”
Məlum olduğu kimi, ABŞ Maliyyə Nazirliyi hazırladığı “Kreml hesabatı” adlı sanksiya sənədini Konqresə təqdim edib. Sanksiya məruzəsi Rusiya prezidentinin yaxın ətrafı, iri sahibkarlar və dövlət şirkətlərini əhatə edib. Sənədə 210 nəfərin adı daxil edilib. Onlardan 114-ü Rusiya Federasiyasının yüksək vəzifəli məmurları, 96 nəfər isə dövlət şirkətlərinin rəhbərləri, o cümlədən iri oliqarxlardır.
Siyahıya Rusiyanın baş naziri Dmitri Medvedyev, Nazirlər Kabinetinin üzvləri - xarici işlər naziri Sergey Lavrov, energetika naziri Aleksandr Novak, nəqliyyat naziri Maksim Sokolov, sənaye və ticarət naziri Denis Manturov, rabitə naziri Nikolay Nikiforov, Domodedova və Vnukovo hava limanlarının rəhbər şəxsləri də daxil edilib. Siyahıda Rusiya Prezident Adminstrasiyasının rəhbəri Anton Vayno və dövlət başçısının köməkçisi Vladislav Surkov, habelə Rusiya prezidentinin mətbuat katibi Dmitri Peskov da var.
Bununla yanaşı, “LUKoil” şirkətinin prezidenti Vahid Ələkbərovun, “Rosneft”in İdarə Heyətinin sədri İqor Seçinin, “Qazprom” Səhmdar Cəmiyyəti İdarə Heyətinin sədri Aleksey Millerin, general Boris Qromovun, milyarder iş adamları Əlişir Usmanovun, Roman Abramoviçin, Süleyman Kerimovun, Vladimir Potaninin, Pyotr Avenin, Arkadiy və Boris Rotenberqlərin, Gennadi Timçenkonun, Oleq Tinkovun və “Kasper laboratoriyası”nın qurucusu Yevgeni Kasperskinin də adları siyahıda var. Hələlik sanksiyaların nədən ibarət olduğu tam açıqlanmayıb.
O da məlumdur ki, Dağlıq Qarabağ münaqişəsinin həlli ilə məşğul olan ATƏT-in Minsk Qrupu həmsədrlərindən biri də Rusiyadır. ABŞ həm də Rusiya xarici işlər naziri Sergey Lavrova qarşı sanksiya tətbiq etməyə hazırlaşır. Bəs bu halda ATƏT-in Minsk Qrupu çərçivəsində həmsədrlərin Lavrovla əməkdaşlığına necə baxılacaq?
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, sanksiyalar Lavrovun iştirakına mane olmayacaq: “Əvvəla bu siyahıya fikir verdikdə görürük ki, Rusiyanı idarə edən əsas şəxslərin sanksiya paketində yer alması Vaşinqtonun Moskvaya qarşı açıq iqtisadi təzyiqidir. Rusiyada martın 18-də gözlənilən prezident seçkiləri öncəsi ABŞ-ın “Kreml hesabatı” adlanan, ictimaiyyətə bəlli olan siyahını elan etməsi təsadüfi deyil. Bu, Putinə qarşı təzyiq mexanizmidir. Bununla Vaşinqton Rusiyanın maliyyə dayaqlarını zəiflətməyi və Kremlə yaxın olan maliyyə oliqarxlarını Putinə qarşı qaldırmağı düşünür. Bu misli görünməmiş sanksiyalar siyahısı ABŞ-la Rusiya arasında gərginliyi artıracaq. Ancaq bu heç də Rusiyanın aqressiyasının qarşısını almayacaq. Qeyd edək ki, Putin seçkidən sonra ABŞ-ın bu siyasətinə qarşı revarans götürəcək. Şərqi Avropada, xüsusilə Ukraynada vəziyyəti mürəkkəbləşdirməklə öz hərbi təsirlərini Polşa və Baltikyanı ölkələrə artıracaq. Bununla ABŞ-ın hərbi sahəyə daha çox maliyyə ayırmasına səbəb ola biləcək hərbi avantüralara getməsi istisna edilmir. Vaşinqtonun bu sanksiyalar paketi nəticəsində Rusiyanın beynəlxaq konyukturada mövqeyinin zəifləməsi bir neçə il çəkə bilər. Azərbaycan üçün məsələnin digər tərəfi isə adı sanksiyalar siyahısında olan Sergey Lavrovla bağlıdır. Dağlıq Qarabağ münaqişəsinin tənzimlənməsi üçün yaradılan Minsk Qrupunun həmsədrlərindən biri də Rusiyadır. Bu məsələdə də aparıcı fiqurlardan biri xarici işlər naziri Sergey Lavrovdur. Hesab edirəm ki, bu sanksiyalar Lavrovun danışıqlarda iştirakına maneə yaratmayacaq. Onsuz da bu müzakirələr Lavrovun iştirakı ilə Moskvada aparılır. Ancaq təbii ki, ABŞ-la Rusiya arasında dərinləşən konfliktdə hər iki həmsədr dövlətin birgə çalışması sual doğurur. ABŞ Lavrova sanksiya tətbiq edirsə, o, Tillersonla Qarabağ münaqişəsini necə müzakirə edə bilər?! Hesab edirəm ki, ən pis halda bu sanksiyalar danışıqlarda Rusiyanın mövqeyini bir qədər zəiflədəcək”.
Vidadi ORDAHALLI
