ABŞ-ın Maliyyə Nazirliyi Konqresə Rusiya əleyhinə misli görünməmiş sanksiyalar paketi təqdim edib. Baki-xeber.com xəbər verir ki, Maliyyə Nazirliyi 2017-ci ilin avqust ayında Donald Tramp tərəfindən imzalanan sanksiyalar haqqında qanun çərçivəsində Vladimir Putinlə əlaqəsi olan siyasətçi və oligarxların adlarını siyahıya daxil edib.
"Kreml hesabatı" adlı sənəddə ümumilikdə 210 şəxsin adı var. Siyahıda olanlar Rusiyanın 114 yüksək rütbəli rəsmisi, dövlət şirkəti sahibləridir, 96 nəfər isə oliqarxdır. Demək olar ki, bütün Prezident Administrasiyası və Rusiya Hökumətinə daxil olan şəxslər sənədə salınıb. Hətta baş nazir Dmitri Medvedyev, xarici işlər naziri Sergey Lavrov, müdafiə naziri Sergey Şoyqu, energetika naziri Aleksandr Novak, Federasiya Şurasının sədri Valentina Matviyenkonun adı da həmin siyahıya salınıb. "Kreml hesabatı"nda Rusiyanın digər 19 nazirinin də adı var. Sənəddə Rusiya baş nazirinin birinci müavini İqor Şuvalov, müavinlər Sergey Prixodko, Aleksandr Xloponin, Vitali Mutko, Arkadi Dvorkoviç, Olqa Qolodes, Dmitri Kozak və Dmitri Roqozinin də adları yer alıb.
Sənədə, həmçinin, Rusiya hökumətinin, prezident aparatının, Dövlət Dumasının, Federasiya Şurasının, Təhlükəsizlik Şurasının əsas üzvlərinin də adları salınıb. Eyni zamanda sənədə Rusiya Prezident Aparatının rəhbəri Anton Vayno, administrasiya rəhbərinin birinci müavinləri Aleksey Qromov və Sergey Kiriyenko, müavinləri Maqomedsalam Maqomedov, Vladimir Ostrovenko, prezident Putinin mətbuat katibi Dmitri Peskov və prezident protokolunun rəhbəri Vladislav Kitayevin də adları daxil edilib.
Sanksiya siyahısına düşənlər arasında etnik azərbaycanlı milyarderlər - Araz Ağalarov, Fərhad Əhmədov, Vahid Ələkbərov da var. "Kreml hesabatı"nda Alişer Usmanov, Roman Abramoviç, Oleq Deripaska, Süleyman Kərimov və Yuri Milnerin adları da qeyd olunur. İndiyədək onların adı sanksiyalar siyahısında yox idi. Siyahıda "Laboratoriya Kasperskogo" İT şirkətinin banisi Yevgeni Kasperski, bankçılar German Qref, Andrey Kostin, Pyotr Aven və Oleq Tinkovun adları ilə yanaşı, "Norilsk nikeli" şirkətinin həmtəsisçisi Vladimir Potanin də var.
Bu yaxınlarda Pyotr Aven deyib ki, Alfa-Bank müdafiə sənaye kompleksinə aid müəssisələrə xidmət göstərməyəcək. Görünür ki, bu da onun adının siyahıya salınmasına təsir göstərməyib.
Bundan başqa, siyahıya prezident Putinin dostları sayılan Gennadi Timçenko, Arkadi və Boris Rottenberqlərin də adları salınıb. Onlara qarşı artıq ABŞ-ın sanksiyaları tətbiq olunmaqdadır. Sənəddə “Rosneft” şirkətinin başçısı İqor Seçin və Putinin çoxdankı tərəfdaşı, "Qazprom"un rəhbəri Aleksey Millerin də adını görmək olar.
Siyahının özü sanksiya səciyyəli deyil. İndiyədək sanksiyalar altında olmayanlarla qarşı məhdudiyyətlər tətbiq edilməyəcək və onlarla əməkdaşlığa görə cəzalandırma da nəzərdə tutulmur. Yəni bu şəxslər avtomatik olaraq aktivlərin dondurulması və viza məhdudiyyətləri kimi heç bir sanksiya tədbirləri ilə üzləşməyəcək. Lakin “Bloomberg” agentliyi yazır ki, ABŞ və Aİ-dəki bank və təşkilatlar adları siyahıda olanlarla biznes aparmaqdan çəkinə bilər.
"Kreml hesabatı" adlı sanksiyalar paketinin detalları hələlik tam açıqlanmayıb.
Sənədə münasibət bildirən Dmitri Peskov isə deyib ki, "Kreml hesabatı" Rusiyada keçiriləcək seçki kampaniyasına təsir etmək üçün birbaşa və açıq cəhddir. Peskov bildirib ki, ABŞ-ın “Kreml hesabatı”na daxil edilmiş siyasətçilər və iş adamları faktiki ABŞ-ın düşmənləri elan olunub: "Bütün bunlar ABŞ-ın düşmənlərinə qarşı müqavimət haqqında qanuna əsasən edilir. Siz mətni və bu sənədin başlığını oxusanız, görərsiniz ki, faktiki olaraq, həmin şəxslər ABŞ-ın düşmənləri adlandırılıb. Yanaşma belədir".
O, siyahının yayılmasını görünməmiş hadisə adlandırıb, lakin eyni zamanda, sənədi təhlil etmədən ona qiymət verməkdən çəkinib: “Sənədi hələlik anlamaq çətindir. Ona görə də üzərində işlənməlidir ki, hansısa motivasiyanın olub-olmaması və oraya daxil edilmə və ya edilməmənin səbəbləri araşdırılsın. Hələ ki, cavabdan çox sual var”.
Xatırladaq ki, ABŞ Konqresi "Amerikanın əleyhdarlarına qarşı sanksiyalar vasitəsilə müqavimət" (Countering America's Adversaries Through Sanctions Act - Caatsa) haqqında qanun layihəsini avqust ayında təsdiq edib. Bu, qanun hökumətdən müvafiq siyahının hazırlanmasını tələb edir. Açıqlanan son siyahı da məhz buna əsaslanır.
Caatsa Moskvanın Ukraynanın şərqindəki rolu ilə bağlı və 2016-cı ildəki prezident seçkilərinə iddia edilən müdaxiləyə görə Rusiyanın cəzalandırılmasını nəzərdə tutur.
Bu qanun amerikalıların Rusiyadakı energetika layihələrinə yatırımlarının həcmini məhdudlaşdırır, ABŞ şirkətlərinin Rusiyada biznes fəaliyyətini çətinləşdirir.
ABŞ hökumətinə əsasən, Caatsa qanununa görə, Rusiya ilə bır sıra xarici şirkətlər arasında nəzərdə tutulan çoxmilyardlıq sövdələşmələr artıq ləğv olunub.
Onu da qeyd edək ki, 2014-cü ildə Krımın ilhaqı və Ukraynanın şərqindəki münaqişədə Rusiyanın roluna görə Aİ və ABŞ Rusiyaya qarşı sanksiyalar elan edib.
Tahir TAĞIYEV
