Ermənistanda dövlət idarəçiliyində əsaslı dəyişikliklərə hazırlıq getdiyi bir vaxtda aparıcı postlarda kimlərin əyləşməsi ətrafında mövqe toqquşmalarının artması, ziddiyyətlərin dərinləşməsi müşahidə edilməkdədir. Serj Sarkisyanın rəhbərlik etdiyi hakim Respublika Partiyası prezident postuna Armen Sarkisyanı gətirməklə bu vəzifəni əlində saxlamaq istəyini meydana qoyub. İndi onlar üçün əsas məsələ Serj Sarkisyanın baş nazir postuna yiyələnməsi və bu vəzifədə idarəçiliyi həyata keçirməsidir. Amma real vəziyyətin təhlili göstərir ki, bu məsələ erməni iqtidarı üçün o qədər də asan olmayacaq. Çünki Serj Sarkisyanın baş nazir vəzifəsinə yiyələnməsinə kəskin etirazlar mövcuddur.
Bu arada Ermənistan parlamentinin vitse-spikeri Arpine Ovannisyan baş nazir seçkilərinin aprelin 17-si keçiriləcəyini açıqlayıb. Hakim partiya bu vəzifəyə Serj Sarkisyanın namizədliyini irəli sürmək niyyətini gizlətmir. Amma qeyd olunduğu kimi, cəmiyyətdə, müxalifət qüvvələri sırasında Sarkisyanın namizədliyinə qarşı kəskin etirazlar mövcuddur. Politoloq Armen Qriqoryan bunun səbəblərini onunla izah edir ki, Serj Sarkisyanın prezidentlik müddətinin 10 ilində ölkə yalnız tənəzzülə gedib. O, Sarkisyanın Ermənistana rəhbərlik etdiyi illəri “böhran dövrü” adlandırıb. Politoloq bildirib ki, bu dövrü Ermənistan üçün uğurlu adlandırmaq olduqca çətindir. Onun sözlərinə görə, Sarkisyanın idarəçiliyi dövründə Ermənistanın xarici borcu 1,5 milyard dollardan 6,3 milyard dollara yüksəlib. Ermənistan iqtisadiyyatın geriləməsində rekord qazanıb. Belə ki, milli iqtisadiyyatda 14 faiz geriləmə müşahidə olunub. Ölkəni birdəfəlik tərk edənlərin sayı davamlı olaraq artır. Politoloq diqqətə çatdırıb ki, 10 ildə nə iqtisadi, nə də siyasi sahələrdə hər hansı müsbət meyl müşahidə edilib.
Digər politoloq Lilit Avakyan isə “Armtimes” saytında bu xüsusda yazır ki, Sarkisyan hakimiyyəti əldən verməmək üçün yeni plan hazırlayaraq ölkəni parlament tipli respublikaya çevirib özünü baş nazir elan etmək istəyir: “Parlament tipli respublikanın prezident tipli respublikadan əsas fərqi ondadır ki, burada hakimiyyət bölgüsü zamanı baş nazirə daha çox səlahiyyət çatır. Odur ki, Sarkisyan bundan səmərəli istifadə etməyə çalışır. Ermənistan ictimaiyyətinin etirazlarına baxmayaraq, Sarkisyan ələbaxan prezident axtarır. Amma Ermənistana, ümumiyyətlə prezident lazım deyil. Prezidentlik institutu onsuz da güc-bəla ilə doldurulan Ermənistan büdcəsinə əlavə yükdür. Sarkisyanın prezident olduğu dövrdə prezidentin lazımsız vəzifə olduğu bütün çılpaqlığı ilə özünü göstərdi.Taleyüklü məsələlərin həlli zamanı prezident ya ölkədə olmayıb, ya da susub. Məsələn, 2013-cü ilin iyununda ölkədə nəqliyyat xidmətlərinin qiyməti 50 faiz artdı və onsuz da ağır sosial vəziyyətdə olan əhalinin durumu daha da pisləşdi. Bütün xalq ümidini prezidentə bağladı ki, bəlkə o nə isə bir iş görər və qiymətlər 50 yox, heç olmasa 25 faiz artar. Lakin Sarkisyan heç nə olmamış kimi istirahətə yollandı. 2016-cı ilin iyun ayında silahlılar İrəvandakı polis şöbəsinə hücum edib oranı tutanda da dövlət başçısından səs çıxmadı. Bütün dünya İrəvanda baş verən silahli insidentdən danışdı, amma ölkə prezidenti bir kəlmə də olsun danışmadı. Həmin vaxt ictimaiyyəti baş vermiş silahlı hadisədən daha çox prezidentin susması maraqlandırırdı. İnsanlar bir-birinə sual verirdi: Görəsən prezident niyə susur?
2016-cı ilin aprel ayında da prezident susdu. Həmin vaxt Azərbaycan ordusu Lələtəpəni və Cocuq Mərcanlını azad etdi və erməni hərbçiləri görünməmiş itkiyə məruz qaldı. Yenə də bütün dünya cəbhə xəttində baş verən hadisələrdən danışdı. Lakin prezident və silahlı qüvvələrin ali baş komandanı aprel döyüşlərinə münasibət bildirmədi. Çünki S.Sarkisyanın deməyə sözü yox idi. Məhz onun apardığı siyasət nəticəsində Ermənistan bu günə düşüb”.
Belə bir vaxtda maraq doğuran məsələ odur ki, baş nazir seçkilərinin nə vaxt keçriləəjyinə dair açıqlamanın verildiyi gün Serj Sarkisyan Fransaya səfər edib. Erməni siyasi şərhçi Aykazn Qaqriyan bunun da birbaşa baş nazir seçkiləri ilə bağlı olduğunu qeyd edir. Onun sözəlrinə görə, Ermənistanın birinci şəxsləri, Moskvadan asılı olmalarına baxmayaraq, Parisdə xaç suyuna salınırlar: “Levon Ter-Petrosyan da, Robert Köçəryan da, Serj Sarkisyanın özü də bunu edib. Sarkisyan prezident səlahiyyətlərini təhvil verəndən sonra baş nazir olaraq ölkəni idarə etmək niyyətini gizlətmir. Fransa səfəri də onun “xaç suyuna salınmaq” istəyi, yəni Parisin dəstəyini almaq gedişinə hesablanıb”. Lakin erməni şərhçi Ermənistanı anarxiya günlərinin gözlədiyini də qeyd edib: “Sarkisyan səlahiyyətlərini 9 apreldə təhvil verəcək, baş nazir seçkiləri isə həmin ayın 17-də keçiriləcək. Arada qalan 8 gün anarxiya günləri olacaq. Doğrudur, parlament əvvəlcə prezidenti seçəcək, həmçinin, müvəqqəti baş nazir və spiker vəzifələrini icra edəcəklər, yəni de-yure vəzifələr boşalmayacaq, lakin de-fakto hər şey havadan asılı olacaq. Sarkisyan 9 apreldən sonrakı 8 gün ərzində yalnız Respublika Partiyasının və Şahmat Federasiyasının rəhbəri postunda qalacaq. Lakin onun üçün bu 8 gün dəhşətli dövr olacaq”. Qaqriyan bildirib ki, baş nazir olmağa hazırlaşan Sarkisyan bütün komandasını “döyüş hazırlığı vəziyyətinə” gətirib: “Çünki 9 apreldən 17 aprelə qədərki günlər ən təhlükəli dövrdür və çevriliş kabusu Sarkisyanın başının üzərini kəsdirib”. Bütün bunlar onu göstərir ki, Sarksiyanın baş nazir vəzifəsini tutması heç də asan olmayacaq və bu hal hətta Ermənistanda çevrilişlə də nəticələnə bilər. Çünki cəmiyyət Sarksiyanı artıq rəhbər vəzifədə görmək istəmir.
NAHID
