Elçin Mirzəbəyli: “Hesab edirəm ki, Müşahidə Şurası KİVDF ilə bağlı tamamilə doğru yanaşma sərgiləyib” Azər Həsrət: “Bütövlükdə, qurum jurnalistlər, medianın inkişafı üçün çalışır”
Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) Müşahidə Şurasının növbəti iclası keçirilib. Fondun Müşahidə Şurasının sədri Həsən Həsənov iclası açdıqdan sonra Fondun icraçı direktoru Vüqar Səfərli hesabat məruzəsi ilə çıxış edib.
İcraçı direktor 2017-ci ildə respublikanın ictimai-siyasi, sosial-iqtisadi və mədəni həyatında baş vermiş hadisələrin diqqət mərkəzində saxlandığını bildirib. O, mətbuatın maddi-texniki bazasının möhkəmləndirilməsi, jurnalistlərin peşəkarlıq səviyyəsinin yüksəldilməsi və sosial vəziyyətinin yaxşılaşdırılması istiqamətində həyata keçirilən çoxsaylı layihələr barədə məlumat verib.
Sonra hesabat ətrafında müzakirələr aparılıb. Müşahidə Şurasının sədr müavini İlqar Hüseynov, üzvlərdən - Cəmaləddin Quliyev, Ramiz Əsgər, Bəhruz Quliyev, İntiqam Hümbətov, Əvəz Rüstəmov və Ayaz Mirzəyev çıxış edərək Fondun 2017-ci ildəki fəaliyyətini qənaətbəxş dəyərləndiriblər və hesabat yekdilliklə qəbul edilib.
İclasda ikinci məsələ kimi Fondun 2018-ci il üçün tədbirlər planı müzakirə olunub. 2018-ci ilin respublikamızda “Azərbaycan Xalq Cumhuriyyəti İli” elan olunduğunu deyən Vüqar Səfərli hazırlanmış tədbirlər planında bunun nəzərə alındığını vurğulayıb. Tədbirlər planı Müşahidə Şurasının üzvləri tərəfindən irəli sürülmüş bir sıra səmərəli təkliflər nəzərə alınmaqla təsdiq edilib.
Bütövlükdə, Müşahidə Şurasının Fondun 2017-ci ildəki fəaliyyətini qənaətbəxş qiymətləndirməsini ekspertlər necə dəyərləndirirlər?
Məsələyə münasibət bildirən “Xalq Cəbhəsi” qəzetinin baş redaktoru Elçin Mirzəbəyli KİVDF-nin fəaliyyətinə müsbət prizmadan yanaşdı: “KİVDF-nin təkcə ötənilki fəaliyyətinə deyil, bütövlükdə, bu günə qədər fəaliyyətinə müsbət yanaşıram. Hesab edirəm ki, KİVDF yarandığı gündən bu günə qədər kifayət qədər böyük inkişaf yolu keçib. İldən-ilə təcrübəsini daha da artırıb və Azərbaycan mətbuatının inkişafına çox böyük töhfələr verib. Yəni bu prosesə sadəcə mətbuat layihələrinin maliyyələşdirilməsi, eyni zamanda jurnalistlər üçün müsabiqələrin keçirilməsi, onların sosial problemlərinin yaxşılaşdırılması istiqamətində Prezident sərəncamlarının yerinə yetirilməsi kontekstindən yanaşmıram. Eyni zamanda, KİVDF ötən müddət ərzində çoxsaylı layihələr həyata keçirib. Bu da media ilə icra strukturları arasında münasibətlərin tənzimlənməsinə, mətbuatda jurnalistlərin peşəkarlığının artmasına və media üçün vacib olan istiqamətlərə öz töhfəsin verib. Bu aspektdən də hesab edirəm ki, Müşahidə Şurası KİVDF ilə bağlı tamamilə doğru yanaşma sərgiləyib. Bu yanaşma, əslində, ölkənin peşəkar mediasının yanaşmasıdır”.
Media eksperti Azər Həsrət də hesab edir ki, cənab Prezidentin birbaşa nəzarəti altında olan bu qurum Azərbaycanda jurnalistikanın, xüsusən də müstəqil jurnalistikanın inkişafı üçün kifayət qədər dövlət dəstəyini təmin edir: “Hesab edirəm ki, sözügedən dövlət dəstəyi olduqca vacib amildir. Məsələ ondadır ki, qurum ölkənin ən aparıcı və gərəkli qəzetlərini maliyyələşdirir. Eyni zamanda, Azərbaycan jurnalistlərinin bu və ya digər şəkildə təcrübə toplamasını təmin etmək üçün işlər görür. Media təmsilçilərinin bir sıra xarici ölkələrə göndərilməsini buna misal göstərmək olar. Bütün bunlar, əlbəttə ki, jurnalistikanın inkişafına müsbət mənada töhfə verəcək amillərdir. Bütövlükdə, KİVDF jurnalistlər, medianın inkişafı üçün çalışır”.
Vidadi ORDAHALLI
