Elşən Mustafayev: “Hesab edirəm ki, ermənilərin bu kini heç də geopolitik narahatlıqdan irəli gəlmir”
Qazaxıstan prezidenti Nursultan Nazarbayevin ABŞ-a baş tutan səfəri və orada keçirdiyi məhsuldar görüşləri deyəsən daha çox Ermənistanı narahat edib. Çünki həmin səfərlə bağlı Ermənistan mətbuatının verdiyi şərhlərdə aqressivlik hiss edilir. Bu qəbildən olan məqalələrdən birində isə sanki Nazarbayevi xəyanətdə ittiham edirlər.
Bununla da iş bitmir, yazırlar ki, Nazarbayevin Rusiyanı ABŞ-a “satması” Moskva tərəfindən böyük xəyanət kimi dəyərləndirilib. Hətta erməni mətbuatı bir qədər də uzağa gedərək, bildirir ki, guya Moskva Nazarbayevi bu özfəaliyyətinə görə ciddi cəzalandırıb. Qazaxıstanın Aktyubinsk rayonunda Özbəkistandan Rusiyaya işləməyə gedən 52 nəfərlik avtobusun yanması da Rusiyanın bu qəbildən olan qisası kimi dəyərləndirilib. Hətta erməni KİV-lər aprel döyüşlərindən sonra İrəvanda partlayan avtobusla bu hadisə arasında paralellər aparıb və hər iki halı Moskvanın təxribatı kimi dəyərləndiriblər.
O da maraqlıdır ki, Nazarbayev Trampla 5 Orta Asiya dövlətinin adından danışıb və deyib ki, bir tərəfimiz Çin, bir tərəfimiz Rusiya, bir tərəfimiz isə İslam dünyasıdır, burada ABŞ nə üçün olmasın?! Bunlar da erməni mediasının yazdıqlarıdır.
Hələ ki, Rusiya Ermənistanda ictimailəşdirilən və Moskvanı açıq-aşkar terrorçu siyasət yürütməkdə ittiham edən məlumatlara heç bir reaksiya verməyib. Ermənilərin Nazarbayevlə bağlı keçirdiyi narahatlıq, hətta buna görə öz sahibləri olan Moskvanın üzərinə hücum çəkmələri nə ilə bağlıdır?
Politoloq Elşən Mustafayev qəzetimizə bildirdi ki, Orta Asiya ABŞ üçün geosiyasi və geoiqtisadi baxımdan mühüm əhəmiyyət kəsb edir: “Qazaxıstan böyük əraziyə malik, zəngin təbii ehtiyatları olan və olduqca əlverişli coğrafiyada yerləşən bir ölkədir. Təbii ki, onun dünyanın supergücləri sayılan Rusiya və Çinlə birbaşa sərhədə malik olması da çox mətləbləri aydın edir. Hər bir supergüc Nazarbayevi öz yanında görmək istəyir. Bu, təbiidir. Bu baxımdan da Qazaxıstan prezidenti Nursultan Nazarbayev Çin və Rusiya arasında manevr etmək və ABŞ-ın regionda təsirinin güclənməsində maraqlıdır. Onun ABŞ-da keçirdiyi görüşlərin açıqlanan mahiyyətindən də bu aydın sezilir. Nazarbayev yaxında olan güclərin təsirini azaltmaq üçün ABŞ-ın dəstəyinə çox ümid edir. Bununla yanaşı, Qazaxıstan Rusiyanın regional layihələrinin əsas iştirakçısıdır. Avrasiya İttifaqı və Kollektiv Təhlükəsizlik Müqaviləsi Təşkilatında yer alır. Təbiidir ki, Nazarbayevin sərt dönüşü ilk növbədə Rusiyanın marağına uyğun olmaya bilər. Ancaq biz hələ ki, Nazarbayevin addımlarında bu reveransı hiss etmirik. Təcrübəli siyasətçi özündən xeyli uzaqda olan ABŞ-a görə özünü zərbə altda qoymaqda maraqlı olmaz. Dilənçi günündə yaşayan Ermənistanın bundan niyə narahat olduğunu anlamaq çətindir. Hesab edirəm ki, ermənilərin bu kini heç də geopoltik narahatlıqdan irəli gəlmir. Onlar bilirlər ki, Nazarbayev daim Azərbaycanın milli maraqlarından çıxış edən siyasətçidir. Yadınızdadırsa, cənab Nazarbayev Ermənistanın Avrasiya İttifaqına üzvlüyünə yalnız bu ölkənin sərhədləri çərçivəsində qoşulmasına razılıq vermişdi. BMT-də daim Azərbaycanın ərazi bütövlüyünü dəstəkləyir. Ölkəmizlə sıx siyasi əlaqələrə önəm verir. Təbii ki, bu amil Ermənistanı ciddi narahat edir. İndi də sanki əllərinə fürsət düşmüş kimi, Nazarbayevə qarşı qarayaxma kampaniyasına girişiblər. Ən maraqlısı isə budur ki, rəsmi Moskvanı terror, təxribat törətməkdə ittiham edirlər. Rusiyanın məsələyə reaksiya verməməsi də təbiidir. Çünki KİV-lərdə səslənən fikirlərə münasibət adətən bildirilmir. Ermənistan da bu ittihamları dövlət səviyyəsində səsləndirməyib. Ancaq Rusiyanı da aldatmaq olmaz. Onlar bilirlər ki, belə yazılar birbaşa Sarkisyanın marağındadır”.
Məhəmmədəli QƏRİBLİ
