Günel Fərhadqızı: “Xalq bu uğurları əldə etməyi bacaran kursu yürüdən namizədə səs verməkdə maraqlı olacaq”
Məlum olduğu kimi, qədəm qoyduğumuz 2018-ci ildə ölkədə növbəti prezident seçkiləri keçiriləcək. Azərbaycanın son bir ildə iqtisadiyyatın bir çox sahələrində və demokratik müstəvidə uğurlar əldə etdiyinə dair həm rəsmi, həm də qeyri-rəsmi məlumatlar var. Xüsusilə də qeyri-neft sektoru sahələri sayılan turizm, kənd təsərrüfatında yaxşı nəticələrin əldə olunduğu bildirilir.
Diplomatik sahədə Azərbaycanın Ermənistanı üstələdiyi və ifşa etdiyinə dair saysız konkret mövzular var. İxracın genişlənməsi və diplomatik müstəvilərdə də vəziyyət qənaətbəxşdir. Sadalanan sahələrdə qazanılan bu uğurların ölkədə keçiriləcək seçkilərə hansı formada təsiri olacaq?
Ekspert Günel Fərhadqızının sözlərinə görə, Azərbaycan iqtisadiyyatı 2017-ci ildə sürətlə və uğurla inkişaf edib: “Təbiidir ki, bu nəticələr ölkənin ümumi inkişafına böyük töhfə verməklə yanaşı, həm də Azərbaycan xalqının 2017-ci ildə də sabitlik və təhlükəsizlik şəraitində yaşamasına səbəb olub. Bu amillərin birbaşa hökumətin apardığı siyasətlə əlaqəli olması heç kimdə şübhə doğurmur. Təsadüfi deyil ki, Prezident İlham Əliyev nitqində 2017-ci ilin Azərbaycanda dərin iqtisadi islahatlar ili olduğunu, həm Dünya Bankı, həm Avropa Yenidənqurma və İnkişaf Bankının Azərbaycanda gedən proseslərə yüksək qiymət verdiyini, Davos Ümumdünya İqtisadi Forumunun hesablamalarına əsasən, Azərbaycan iqtisadiyyatının rəqabətqabiliyyətliliyinə görə 2017-ci ildə iki pillə irəliləyərək dünya miqyasında 35-ci yerdə qərarlaşdığını, ölkənin MDB məkanında liderlik mövqeyini qoruyaraq möhkəmləndirdiyini qeyd edib.
2017-ci ildə Azərbaycanda iqtisadi sahədə çox böyük uğurlar əldə edilib, iqtisadiyyat artıb, xüsusilə də qeyri-neft sektorunda artım 2,5 faiz təşkil edib, valyuta ehtiyatları 4,5 milyard dollar artaraq 42 milyard dollar təşkil edib və adambaşına düşən valyuta ehtiyatlarının həcminə görə Azərbaycan dünya miqyasında ön yerlərdən birini tutub.
Ötən il Azərbaycan iqtisadiyyatına 14,6 milyard ABŞ dolları həcmində investisiya yatırılıb və bu da Azərbaycanın həm yerli, həm də xarici investorlar üçün cəlbedici ölkə olduğunun göstəricisidir. 2017-ci ildə ölkənin ixrac potensialı, o cümlədən ixrac 19 faiz, qeyri-neft ixracı isə 24 faiz artıb, ticarət balansında müsbət saldo 6,2 milyard dollar təşkil edib, xarici turistlərin gəlişi də rekord səviyyəyə çatıb. Bununla yanaşı, ölkəmiz demokratik dəyərlərin qorunub inkişaf etdirilməsi istiqamətində də ciddi irəliləyişlər əldə edib. Təbii ki, bütün bu amillərin hazırkı hakimiyyətin imicinin artmasına, xalq arasında nüfuzunun yüksəlməsinə böyük təsiri var. Ölkədə keçiriləcək prezident seçkilərində isə xalq bu uğurları əldə etməyi bacaran kursu yürüdən namizədə səs verməkdə maraqlı olacaq. Buna qətiyyən şübhə ola bilməz”.
Məhəmmədəli QƏRİBLİ
