Bir vaxtlar onunla çalışan məmurların böyük əksəriyyətini, o cümlədən sabiq müdafiə naziri Seyran Ohanyanı tutduğu vəzifədən kənarlaşdırdıqdan sonra Ermənistanın indiki prezidenti Serj Sarkisyanın özünün gələcək aqibəti də ciddi sual altındadır.
Çünki sabiq məmurların bir çoxu prezidentə qarşı müxalifətə keçməyi düşünür və bununla da Sarkisyanın tutduğu vəzifədən mümkün qədər tez kənarlaşdırılmasına maraq göstərirlər. Belə bir vaxtda isə bəlli olub ki, Sarkisyanın barışmaz düşmənlərindən biri olan "Çiçəklənən Ermənistan" Partiyasının qurucusu, Milli Olimpiya Komitəsinin sədri Qagik Tsarukyan da böyük siyasətə qayıda bilər. Belə ki, "Çiçəklənən Ermənistan" Partiyasının noyabrda növbədənkənar qurultayı keçiriləcək. Qurultayda partiyanın Şura sədri vəzifəsi təsis ediləcək və bu vəzifəni Tsarukyanın tutması gözlənir. Bununla o, siyasətə qayıtmağı və ilk olaraq parlament seçkilərinə qatılmağı düşünür. Xatırladaq ki, əvvəllər Sarksiyanla birlikdə olan Tsarukyan sonradan mövqeyini dəyişərək Ermənistanın əsas müxalif qüvvələrinin toplantısında ölkədə hakimiyyət dəyişikliyinin vaxtı çatdığını elan edib və Sarkisyanın hakimiyyətini kəskin tənqid edib. Buna cavab olaraq Sarkisyan hakim partiyanın toplantısını keçirərək Tsarukyanın ünvanına təhqiramiz çıxış edib, onun xalq arasında "tupoy Qaqo" kimi tanındığını, siyasətdən anlayışının olmadığını, üzündən güclə oxuduğunu deyib. Daha sonra elan edib ki, Tsarukyanın cinayət əməlləri araşdırımalı, onun korrupsiya yolu ilə əldə etdiyi gəlirləri yoxlanmalı, deputat mandatı əlindən alınmalıdır.
Tsarukyan isə Sarkisyana cavab olaraq onu "səviyyəsiz, küçə adamı" kimi ifadələrlə yad edib. Bundan sonra Tsarukyan digər müxalif qüvvələrlə birlikdə Sərkisyana qarşı mitinqlərə başlamaq qərarı verib. Ancaq gözlənilmədən vəziyyət dəyişib. Rusiya erməniləri diasporunun lideri, milyarder Samvel Karapetyanın vasitəçiliyi ilə Tsarukyanla Sarkisyan arasında xəlvəti görüş olub. Burada tərəflər anlaşma əldə edib, Tsarukyan hakim dairələrin hücumundan yayınmaq üçün siyasətdən birdəfəlik gedib. Əvəzində həbsdən xilas olub, biznesi əlindən alınmayıb. Lakin indi o, yenidən siyasətə qayıtmaq qərarına gəlib. Bu arada daha bir maraqlı məqam Kollektiv Təhlükəsizlik Müqaviləsi Təşkilatının (KTMT) İrəvanda keçirilən iclasına qatılan Belarus prezidenti Aleksandr Lukaşenkonun Tsarukyanla görüşüdür. "Qraparak" qəzeti yazır ki, təşkilatın iclasında Lukaşenko "xırda məsələlərə görə onu İrəvana gətirmələrinə" etiraz edib və KTMT-nin dünya səviyyəsində qəbul edilməməsindən şikayətlənib. Qəzet Lukaşenkonun iclas başa çatandan sonra Ermənistanı tərk etmədiyi haqda məlumat yayıb: "İclas başa çatandan sonra bütün prezidentlər Ermənistanı tərk etsə də, Lukaşenko İrəvanda qalıb və bir gün sonra ölkəsinə qayıdıb". Məlumata görə, Lukaşenkonun Ermənistanda bir gün artıq qalmasının səbəbi biznesmen Tsarukyanla görüşməsi olub: "Belarus prezidenti Tsarukyanla görüşüb, həmçinin, onun atasını da ziyarət edib".
Tsarukyanın mətbuat katibi İvet Tonoyan da təsdiq edir ki, Belarus prezidenti Tsarukyanın qonağı olub. Erməni mediası yazır ki, Sarkisyan Tsarukyanın kürəkəni olan keçmiş baş nazir Ovik Abramyanı vəzifəsindən uzaqlaşdırandan sonra aralarında ciddi narazılıq yaranıb. Hesab olunur ki, Tsarukyan xaricdən, o cümlədən Rusiya və Belarusdan dəstək almaqla Sarkisyanı devirmək istəyir. O, Moskvadan məhz Belarus vasitəsilə dəstək almağa çalışır. Belə vəziyyət isə Sarkisyan üçün müsbət heç nə vəd etmir.
Xatırladaq ki, bu günlərdə Ermənistan prezidentinin parlamentdəki daimi nümayəndəsi, Ermənistan Prezident Aparatı rəhbərinin müavini Viktor Dallakyan da istefa verib. Dallakyan hakim Respublika Partiyasından da çıxdığını və aktiv siyasətə qayıtdığını bildirib. O, 2017-ci ildə keçiriləcək parlament seçkilərində aktiv iştirak etmək niyyətində olduğunu açıqlayıb. Qeyd edək ki, Ermənistan mətbuatı bundan sonra Dallakyanın "Dönüş" adlı partiya yaradacağını, həmin partiyaya sabiq müdafiə naziri Seyran Ohanyanın rəhbərlik edəcəyinin gözlənildiyini yazıb. İndi gözlənir ki, bu qüvvələr də Tsarukyanla birləşməyə və beləliklə, böyük maliyyə dəstəyi əldə etməyə çalışsınlar. Bütün bunlar isə Sarkisyan üçün yaxşı heç nə vəd etmir.
Tahir TAĞIYEV
