“İŞİD terrorçuları İraqın Mosul şəhərindən çıxarılsa Avropa Birliyi yaraqlıların axınına hazır olmalıdır”. Baki-xeber.com xəbər verir ki, bunu AB-nin təhlükəsizlik məsələləri üzrə komissarı deyib.
Almaniyanın “Die Welt” qəzetinə müsahibə verən Avropa Komissiyasının təhlükəsizlik məsələləri üzrə nümayəndəsi Culian Kinq deyib ki, hətta kiçik yaraqlı qrupu belə ciddi təhlükə olacaq və buna hazır olmaq lazımdır.
Almaniyanın daxili işlər naziri Tomas de Meyzer isə hesab edir ki, İraq və Suriyada terrorçuluqla mübarizə Avropaya hücum risqini artırmayacaq, çünki, təhlükə onsuz da yüksəkdir.
Rusiyanın xarici işlər naziri Sergey Lavrov isə deyib ki, əgər İŞİD yaraqlıları İraqdan Suriyaya keçsə, Rusiya hərbi tədbirlərə əl atacaq. Onun sözlərinə görə, Mosul tam mühasirəyə alınmayıb, bu isə o deməkdir ki, dəhliz var və yaraqlılar oradan Suriyaya keçə bilərlər.
Qeyd edək ki, İraq ordusu, kürd doyüşçüləri, sünni və şiə qruplarından ibarəd 30 minlik qüvvə oktyabrın 17-də İŞİD-in nəzarətində olan bu İraqın ikinci böyük şəhəri Mosula hücuma keçib. Əməliyyatda ABŞ-ın rəhbərlik etdiyi beynəlxalq koalisiya qüvvələrinin hərbi təyyarələri də iştirak edir. Təxminlərə görə, İŞİD-nin istehkamı sayılan şəhərdə 4-8 min cihadçı var.
Pentaqon nümayəndəsi Peter Cook deyib ki, hərbi kampaniya mövcud cədvəli qabaqlayır. Onun sözlərinə görə, əməliyyat ilk mərhələsindədir və cihadçıların müqavimət göstərib-göstərməyəcəyi məlum deyil. Pentaqon sözçüsü xəbərdarlıq edib ki, görünüşə görə İŞİD müqavimət göstərib döyüşmək istəyir və buna görə Mosulu almaq zaman ala bilər: “Ekstremistlərin lideri olan Əbu Bəkir əl-Bağdadi xilafətin təməlinin qoyulmasını elan etmək üçün Mosul şəhərini seçib və buna görə də şəhərin geri alınması simvolik məna daşıyır”.
Britaniya Beynəlxalq İnkişaf təşkilatının katibi Priti Patel deyir ki, döyüşlər şəhərə daha çox yaxınlaşdıqca orda yaşayan dinc sakinlərin vəziyyəti böyük narahatlıq doğurmağa başlayıb: "Mosulun alınması İraqdakı İŞİD döyüşçülərinin geri çəkilməsində vacib bir addım olacaq və onların dinc sakinlər üzərindəki zülmünə son qoyacaq. Buna baxmayaraq bir milyondan çox insan hələ də bu şəhərdə yaşayır və aydındır ki, onların müdafiəsi və yaxşı vəziyyətdə olmasını təmin etmək böyük narahatlıqdır."
İraq hökuməti Mosula hücum zamanı sakinlərin nə etməli olması haqqında havadan onlara 17 min məlumat bukletləri atıb.
İŞİD İraqın ikinci, ən böyük şəhəri sayılan Mosulu 2014-cü ilin iyun ayında ələ keçirib. BMT xəbərdarlıq edib ki, hücuma görə 1 milyona yaxın adam ev-eşiyini tərk edə bilər. Humanitar agentliklər də Mosul əməliyyatı nəticəsində nəhəng qaçqın böhranının yarana biləcəyi barədə xəbərdarlıqla çıxış edirlər.
