Almaniyanın paytaxtı Berlin şəhərində Azərbaycan diaspor təşkilatlarının birgə aksiyası keçirilib. Diasporla İş üzrə Dövlət Komitəsindən "Trend"ə verilən məlumata görə, aksiya Berlin Azərbaycan Evi, Bilefeld Alman-Azərbaycan Mədəniyyət Mərkəzi, Almaniya Azərbaycanlılarının Koordinasiya Mərkəzi və Azərbaycan Tələbə Şəbəkəsinin təşkilatçılığı ilə baş tutub.
Aksiyanın əsas məqsədi Azərbaycan Prezidentinin ölkənin ərazi bütövlüyünün bərpasına istiqmətlənmiş siyasətinə Almaniyada yaşayan azərbaycanlıların dəstəyini ifadə etmək, ATƏT-in sədri kimi Almaniyanın Ermənistan-Azərbaycan, Dağlıq Qarabağ münaqişəsinin nizamlanması prosesində ədalətli mövqe tutmasını tələb etmək, Ermənistanın təcavüzkar siyasətinin bölgədə sülhə və təhlükəsizliyə təhdid olduğunu Almaniyanın rəsmi dairələrinin diqqətinə bir daha çatdırmaqdır.
Federal kansler Angela Merkelin ofisi qarşısında keçirilən aksiyada 200-dən çox həmvətənimiz iştirak edib. Aksiyada "Dünya Azərbaycanlıları sizi dəstəkləyir, cənab Prezident!", "Ermənistan, əlini Qarabağdan çək!", "BMT-nin qətnamələri yerinə yetirilməlidir", "Təcavazkarlığa son!", "Metsamor" region üçün təhlükədir!", "Xanım Merkel, biz Almaniyaya və ATƏT-ə inanırıq!" şüarları səsləndirilib. Aksiya iştirakçıları Ermənistan-Azərbaycan, Dağlıq Qarabağ münaqişəsinin ədalətli həllini, Ermənistanın işğalçılıq siyasətinə son qoyulmasını tələb edib.
Aksiya iştirakçıları Almaniyanı münaqişənin həlli prosesində obyektiv mövqe tutmağa çağıraraq, Prezident İlham Əliyevin ölkənin ərazi bütövlüyünün bərpasına yönəlmiş siyasətinə dəstək ifadə ediblər.
Dünən Almaniyanın paytaxtı Berlin şəhərində Azərbaycan diaspor təşkilatlarının birgə təşkil etdiyi aksiya ilə eyni vaxtda "Sərhədsiz Reportyorlar" təşkilatı Azərbaycan əleyhinə kiçik bir piket keçirməyə cəhd edib. Bu barədə APA-ya Diasporla İş üzrə Dövlət Komitəsinin mətbuat xidmətindən bildirilib.
Məlumata görə, "Sərhədsiz Reportyorlar"ın təşkil etdiyi aksiyada qondarma "Dağlıq Qarabağ Respublikası"nın "bayrağı" qaldırılıb. Azərbaycan diasporunun nümayəndələri təşkilatın üzvlərinə yaxınlaşaraq, separatçı rejimin "bayrağı"nını hansı məqsədlə bu aksiyaya gətirildiyinə dair izahat istəyiblər: ""Sərhədsiz Reportyorlar" təşkilatının üzvləri azərbaycanlıların təkidli sorğularına sükutla cavab veriblər. Yalnız soydaşlarımızın təkidli etirazlarından sonra təşkilat üzvləri "bayrağı" yığışdırıblar".
Qeyd olunub ki, Azərbaycan diaspor təşkilatları "Sərhədsiz Reportyorlar"ın təşkil etdiyi aksiyada baş verən bu insidentlə bağlı təşkilatın mərkəzi ofisinə xüsusi sorğu göndərməyi planlaşdırır. Sorğuda qurumun təşkil etdiyi bir aksiyada separatçı rejimə dəstək ifadə edilməsinə dair izahat verilməsi tələbi əksini tapacaq.
Baş verənləri pisləyən tarix üzrə fəlsəfə doktoru, Azərbaycan Turizm və Menicment Universitetinin dosenti Məhərrəm Zülfüqarlı "Bakı-Xəbər"ə bildirdi ki, "Sərhədsiz Reportyorların" Azərbaycan əleyhinə təşkil etdiyi aksiya təxribat xarakteri daşıyır: "Bilirsiz ki, bu, Qərb ölkələrində, Amerika kimi dövlətlərdə fəaliyyət göstərən təşkilatların işidir ki, Azərbaycanı gözdən salan tədbirlər keçirsin. Onlar insan haqlarını və müəyyən məsələlərdən sui-istifadə edərək Azərbaycana təzyiq göstərmək niyyəti güdürlər. "Sərhədsiz Reportyorlar"ın məlum aksiyası da bu qəbildəndir. Onlar ölkəmizə təzyiq göstərmək istəyirlər. Onu da qeyd edim ki, Qərbdə Azərbaycanı sevən, dəstəkləyən, onun haqq işini dəstəkləyən insanlar da çoxdur. Bizi istəyənlər az deyil. Düşünürəm ki, bu hadisəni pisləməklə kifayətlənməməliyik. Buna qarşı tədbir görməli, təbliğatımızı gücləndirməliyik. Azərbaycan haqqında, Dağlıq Qarabağ həqiqətləri barədə nə qədər təbliğat aparsaq bir o qədər yaxşıdır. "Dağlıq Qarabağ Respublikası"nın "bayrağı"nın aksiyada görünməsi Azərbaycana qarşı təxribatdır və mən bu təxribatı pisləyirəm. O aksiyalar erməniyə məhəbbətdən keçirilmir, bəzi qüvvələr həm qondarma Dağlıq Qarabağ Respublikasının "bayrağından", həm də qondarma erməni soyqırımından bəhs etməklə bizə təzyiq göstərmək istəyirlər. Bu təzyiqləri dəf etmək üçün birləşməli, daha geniş səviyyədə təbliğat həyata keçirməliyik".
Hadisələrin təhlili isə göstərir ki, "Sərhədsiz Reportyorlar"ın təşkil etdiyi aksiyada qondarma "DQR bayrağı"nı qaldıranlar, böyük ehtimalla, ermənilər və ya erməni lobbiçilərinin idarə etdiyi satın alınmış şəxslər olub.
Xəbər xidməti