Azərbaycan beynəlxalq ictimaiyyəti Ermənistandan Azərbaycan ərazilərinin qeyri-qanuni işğalını dayandırmağı tələb etməyə çağırır. Trend-in məlumatına görə, bunu Azərbaycanın xarici işlər naziri Elmar Məmmədyarov İstanbulda keçirilən İslam Əməkdaşlıq Təşkilatının (İƏT) Xarici İşlər Nazirləri Şurasının 13-cü Zirvə toplantısına hazırlıq iclasında çıxışı zamanı deyib.
Nazir qeyd edib ki, 2 aprel 2016-cı ildə Ermənistan atəşkəsi kobud surətdə pozaraq və Azərbaycan ordusunun mövqelərini və təmas xətti boyunca mülki əhalinin sıx məskunlaşdığı yaşayış məntəqələrini atəşə məruz qoymaqla Ermənistan-Azərbaycan münaqişəsinin nizamlanması üzrə danışıqlar prosesində destruktiv siyasətini bir daha ortaya qoydu: "Bu təxribat əməlinə Azərbaycan Ordusu tərəfindən əks-həmlə ilə adekvat cavab verildi və Erməni silahlı qüvvələrinin hücumu dəf edildi. Bu gün Ermənistan atəşkəs rejimini pozmaqda davam edir və diqqəti sülh prosesinə lazım olan əsas məsələlərdən yayındırmaqla dünyaya öz əsas niyyətini nümayiş etdirir".
E.Məmmədyarov bildirib ki, Azərbaycan beynəlxalq ictimaiyyəti Ermənistandan Azərbaycan ərazilərinin qeyri-qanuni işğalını dayandırmağı, öz qoşunlarını bütün işğal olunmuş ərazilərdən çıxartmağı və BMT TŞ-in müvafiq qətnamələrinin tələblərinə və beynəlxalq hüququn norma və prinsiplərinə uyğun olaraq münaqişənin nizamlanması prosesində konstruktivlik nümayiş etdirməyi tələb etməyə çağırır: "Fürsətdən istifadə edib, İƏT Baş katibinə və üzv dövlətlərə Azərbaycanın suverenliyinə və ərazi bütövlüyünə verdiyi dəstəyə, həmçinin Ermənistanın təcavüzünü və Azərbaycan torpaqlarının işğal edilməsini qınadığına görə təşəkkürümü çatdırmaq istəyirəm. Həmçinin Ermənistanın ölkəmizə qarşı təcavüzünə dair təmas qrupunun yaradılması barəsində bu konfransın qərarını təqdir etmək istərdim".
Elmar Məmmədyarov bildirib ki, Azərbaycan beynəlxalq sülhə ən ciddi təhlükələrdən biri olan terrorizmin bütün forma və təzahürlərini pisləyir.
E.Məmmədyarov qeyd edib: "Təəssüf ki, keçən görüşümüzdən bəri İslam dünyasında ümumi vəziyyətin əhəmiyyətli dərəcədə inkişaf etdiyini bəyan edə bilmərik. Əksinə, İslam dünyasının qarşılaşdığı təhdidlərin əhatə dairəsi artıb. Azərbaycan təkcə viran olmuş şəhərlərə və mülki şəxslərin qətlə yetirilməsinə görə deyil, eyni zamanda uzunmüddətli humanitar və qaçqın böhranlarının da daxil olduğu müharibələrin nəticələrinə və bir sıra ölkələrdə baş verən hərbi münaqişələrə görə dərin narahatlığını ifadə edir".
Nazir bildirib ki, Azərbaycan Fələstin məsələsinə dair İƏT-in baş katibi tərəfindən həyata keçirilən fəaliyyəti yüksək qiymətləndirir və qardaş Fələstin xalqına sülhün, sabitliyin əldə edilməsi və paytaxtı Şərqi Qüds olan müstəqil dövlətin yaradılması mübarizəsində özünün hərtərəfli dəstəyini bir daha vurğulayır: "Biz İƏT-in islamofobiyaya qarşı apardığı mübarizəsini təqdir edirik. Zorakı ekstremizm və terrorizmin vurduğu zərbələr bu cür neqativ tendensiyaların mövcudluğunun əsas səbəblərindən biridir. Bu qeyri-insani və pis niyyətli hərəkətlər sülhün və ədalətin düşmənləri tərəfindən həyata keçirilir. Yalnız birgə səylər və həmrəylik nəticəsində belə hallara qarşı səmərəli mübarizə aparıla bilər".
E.Məmmədyarov vurğulayıb ki, Azərbaycan beynəlxalq sülh və təhlükəsizliyə ən ciddi təhlükələrdən biri olan terrorizmin bütün forma və təzahürlərini pisləyir: "Azərbaycan İslam həmrəyliyini gücləndirən və İslam dəyərlərini təşviq edən ölkə kimi tanınır. Biz gələn il Bakıda İslam Həmrəyliyi Oyunlarına ev sahibliyi edəcəyik və ümid edirik ki, bu, müsəlmanlar arasında birlik halqalərının, dostluğun və qardaşlığın gücləndirilməsinə kömək edəcək".
Nazir əlavə edib ki, Azərbaycan hər zaman İƏT ilə əlaqələrin inkişafına böyük önəm verib: "Son illərdə Bakı İƏT-ə üzv dövlətlərin inkişafında qadınların rolu mövzusunda 5-ci Nazirlər toplantısı və İƏT Əmək Nazirlərinin ikinci toplantısı kimi bir sıra İƏT tədbirlərinə ev sahibliyi edib. Sonuncu hadisə ilə əlaqədar Azərbaycan Prezidentinin təklifi əsasında Bakıda İƏT Əmək mərkəzinin yaradılması təsdiq edilib. Biz fəxr edirik ki, BMT Təhlükəsizlik Şurasının qeyri-daimi üzvü kimi fəaliyyətimiz dövründə BMT-nin mənzil qərargahında BMT və İƏT arasında tərəfdaşlığın gücləndirilməsinə həsr edilmiş xüsusi iclas keçirilib. Biz qəti şəkildə inanırıq ki, bu təcrübə davam etdirilməlidir. Bu bizə İslam dünyasının üzləşdiyi hədə və təhdidlərin ifadə edilməsi üçün əlverişli fürsət yaradır".