Nyu Yorkda…
BMT-nin Nyu Yorkdakı mənzil qərargahı qarşısında etiraz mitinqi keçirilib. Diasporla İş üzrə Dövlət Komitəsindən Trend-ə verilən məlumata görə, Nyu York Assosiasiyasının təşkilatçılığı ilə baş tutan aksiya son günlər Ermənistan ordusunun cəbhə xəttində törətdiyi hərbi təxribatlara etiraz etmək məqsədilə təşkil edilib.
Xeyli sayda türk və azərbaycanlının iştirak etdiyi mitinqdə "Qarabağ bizimdir, bizim olacaq!", "Qarabağa ədalət!", "Vətən, biz səninləyik!", "Ermənistan işğalçıdır!" şüarları səsləndirilib.
Aksiyada çıxış edənlər 1-5 aprel tarixlərində Ermənistan Silahlı Qüvvələri tərəfindən atəşkəs rejiminin pozulmasını və dinc əhalinin öldürülməsini qətiyyətlə pisləyib, işğalçı Ermənistandan təcavüzkarlıq siyasətindən əl çəkməyi tələb ediblər.
Etiraz aksiyası ilə eyni vaxtda BMT-nin Nyu Yorkdakı mənzil qərargahı qarşısında erməni lobbisinin nümayəndələri tərəfindən müdaxiləyə cəhd edilsə də, nəticəsiz qalıb və mitinq dinc şəraitdə başa çatıb.
Sankt-Peterburqda…
Rusiyanın Sankt-Peterburq şəhərində də Azərbaycan diasporu tərəfindən Azərbaycana dəstək aksiyası və avtomobil yürüşü təşkil edilib. Əvvəlcə Azərbaycan konsulluğunda təmas xəttində həlak olmuş Azərbaycan şəhidlərinin xatirəsi bir dəqiqəlik sükutla anılıb. Qeyd olunub ki, Qarabağ qədim Azərbaycan torpağıdır və ərazilərimizi işğaldan azad etmək üçün hər kəs döyüşə hazırdır.
Sonra tədbir avtomobil yürüşü ilə başa çatıb. Peterburqun Mərkəzi rayonunun küçələrində hərəkət edən avtomobillərdə Azərbaycan bayraqları ucaldılıb.
Moldovada…
Moldovada da erməni təxribatına etiraz məqsədilə aksiya keçirilib. Azərbaycanın Moldovadakı səfirliyindən verilən məlumata görə, bu ölkədə təhsil alan tələbələr tərəfindən "Azərbaycan əsgərinə dəstək" kampaniyası adı altında "Şəhidlər ölməz, Vətən bölünməz", "Qarabağ bizimdir, bizim olacaq", "Stop Armenian Aggression", "Prosim Mejdunarodnıe orqanizaüii ostanovitğ armənskuö okkupaüiö territoriy Azerbaydjana", "Erməni zorakılığına son", "İşğala son", "Qarabağ Azərbaycanındır" və sair şüarlarla əvvəlcə paytaxt Kişinyov şəhərinin mərkəzində yerləşən "Ştefan çel Mare" parkında, daha sonra Ermənistanın fəxri konsulluğu qarşısında nümayiş keçirilib.
Azərbaycanlı tələbələrə dəstək məqsədilə nümayişə Türkiyə Tələbə Cəmiyyəti, moldovalı tələbələr və Moldovada yaşayan azərbaycanlılar da qatılıblar
İki saat davam edən bu nümayiş yerli əhali tərəfindən böyük maraqla qarşılanıb və dəstək alıb.
Ukraynada…
Aprelin 8-də Yerevanın yürütdüyü işğalçı siyasətin ifşa edilməsi məqsədilə Ermənistanın Ukraynadakı səfirliyinin qarşısında da etiraz aksiyası keçirilib.
Aksiyada Kiyev şəhəri ilə yanaşı, Ukraynanın əksər böyük şəhərlərində yaşayan Azərbaycan diasporunun üzvləri də iştirak ediblər. Aksiyada Ukraynada təhsil alan türkiyəli tələbələr və Krım tatarları da qatılıblar.
Ermənistan səfirliyinin qarşısında keçirilən aksiya Ukrayna kütləvi informasiya vasitələri tərəfindən geniş işıqlandırılıb.
Əllərində Ermənistanın işğalçı siyasətini ifşa edən plakatlar tutmuş aksiya iştirakçıları müxtəlif şüarlar səsləndiriblər ("Erməni əsgəri ölmək istəmirsənsə Qarabağdan rədd ol", "Qarabağ bizimdir bizim olacaq, işğalçılığa son" və s.).
Aksiyada Ukrayna Azərbaycanlıları Konqresinin (UAK) Ali Məclisinin sədri Akif Gülməmmədov, Ukrayna Azərbaycanlıları Gənclər Birliyinin sədri İlhamə Allahverdiyevə, UAK-ın Dnepropetrovsk şəhər təşkilatının sədri Qurban Abbasov, "İşıq" dini cəmiyyətinin sədri Əbülfəz Qasımov çıxış ediblər.
Çıxışlarda Ermənistanın işğalçı siyasətini sərt şəkildə tənqid edilib. Bununla yanaşı, rəsmi Yerevandan Ermənistan qoşunlarının qeyd-şərtsiz işğal olunmuş Azərbaycan torpaqlarından çıxarılması, qaçqın və məcburi köçkünlərimizin öz dədə-baba yurdlarına qaytarılması tələb edilib.
Ukrayna KİV-də işıqlandırılan məlumatlarda Ermənistanın dövlət terroru siyasəti yeritməsi və torpaqlarımızın işğalı mövzuları qabardılıb.
Aksiyada 400 nəfərə yaxın şəxs iştirak edib. Ermənistan səfirliyinin qarşısında keçirilən etiraz aksiyasında "Əhli-Beyt" təşkilatının sədri Əhməd Sabunçu, "Əhlül-Əl-Beyt" təşkilatının sədri Elçin Məmmədov və onların tərəfdarları da iştirak ediblər.
Qarabağ münaqişəsi Ukrayna mediasında…
Bundan başqa, Ukrayna ictimaiyyətinə Dağlıq Qarabağ münaqişəsi ilə bağlı məlumatların çatdırılması istiqamətində görülən işlər çərçivəsində Ukrayna Milli Jurnalistlər İttifaqının üzvü Əli Dəmirov tərəfindən aprel ayının 4-də Ukraynanın nüfuzlu "ICTV" televiziya kanalının "Faktı" proqramında Dağlıq Qarabağ münaqişəsi barədə reportaj efirə verilib.
Reportaj "ICTV"nin müxbiri Taras Karniyuk tərəfindən hazırlanıb.
T.Karniyuk reportaj zamanı Ermənistan dövlətini sərt tənqid edib. Reportajda Ermənistanın Rusiyanın marionetkası olması qeyd olunub və rəsmi Yerevanın Krım yarımadasının Rusiya tərəfindən işğal olunmasını dəstəkləməsi xüsusilə vurğulanıb.
Bununla yanaşı, televiziya izləyicilərinə Ermənistanın işğalçı dövlət olması faktı çatdırılıb. Ukraynada geniş izləyici kütləsinə malik "Faktı" proqramında yayımlanan reportaj vasitəsilə Ermənistanın yürütdüyü çirkin siyasət ifşa edilib.
"ICTV" televiziya kanalının rəhbərliyi yaxın zamanlarda T.Karniyuk daxil olmaqla, respublikamıza çəkiliş qrupunun göndərilməsi barədə qərar qəbul edib. T.Karniyukun Azərbaycanda hazırlayacağı reportajlar respublikamızın haqlı mövqeyinin Ukrayna ictimaiyyətinə çatdırılması işində əhəmiyyətli addım olacaq.
"ICTV" televiziya kanalının "Faktı" proqramında Dağlıq Qarabağ münaqişəsi barədə yayımlanmış reportajın videosu: http://fakty.ictv.ua/ua/index/view-media/id/128609?play=1