Qasım Hacıyev: “Hesab edirəm ki, bundan sonra Paşinyanın kilsəyə hücumları daha da şiddətlənəcək”
Avropa Şurası Parlament Assambleyasının (AŞPA) nümayəndə heyəti İrəvana səfərindən sonra Rusiyanın iyun ayında keçiriləcək parlament seçkilərindən əvvəl Ermənistanda ictimai rəyi formalaşdırmaq və geosiyasi təsirini qorumaq üçün istifadə etdiyi hibrid metodlardan danışıb. Avropa Şurası xəbərdarlıq edib ki, Ermənistanda iyun ayına planlaşdırılan parlament seçkilərinin azadlığı təhlükə altındadır. Seçki kampaniyasına xarici müdaxilə "getdikcə daha mürəkkəb və sistemli" hala gəlir və Ermənistanın siyasi və informasiya mühitinə təsir göstərir. Nümayəndə heyətinin sözlərinə görə, qarşıdan gələn seçkilərə müdaxilə yalnız dezinformasiya ilə məhdudlaşmır və qanunsuz siyasi maliyyələşdirmə, kiberhücumlar, iqtisadi məcburiyyət və seçki prosesini birbaşa manipulyasiya etmək cəhdlərini əhatə edir. AŞPA-nın hesabatında diqqət çəkən məqamlardan biri də orada erməni kilsəsinin anti-Paşinyan mövqeyi ilə bağlıdır. AŞPA həmçinin İrəvan hökumətinin siyasətinə qarşı çıxan və Rusiya ilə yaxınlaşmanı müdafiə edən Erməni Qriqoryan Kilsəsinin "misli görünməmiş müdaxiləsini" qeyd ediblər.
AŞPA açıq şəkildə bəyan edir ki, erməni kilsəsi artıq aşırı dərəcədə şəkildə siyasətə qarışır, müdaxilə edir.
Bu seçki ərəfəsində Paşinyanın kilsəsinin üzərinə daha ciddi hücumları üçün bir əsas ola bilərmi? Paşinyan bundan ruhlanıb kilsəyə qarşı hücumlarını daha da gücləndirə bilərmi və erməni cəmiyyətində bunun effekti olacaqmı?
Tarix elmləri doktoru, professor Qasım Hacıyev baki-xeber.com-a bildirdi ki, erməni kilsəsi bütün dövrlərdə mövcud olduğu regionlarda qarışıqlıq yaradıb, erməni xalqını faciələrə sürükləyib. Q.Hacıyevin sözlərinə görə, erməni kilsəsi zaman-zaman erməniləri öz ətrafında birləşdirsə də, amma onlarda normal dövlətçilik təfəkkürünün formalaşmasına mane olub. “Erməni kilsəsi Nikol Paşinyan hakimiyyətindən əvvəlki hökumətlərin siyasətinə yön verir, onları demək olar ki, müəyyən qədər idarə edirdi. Erməni kilsəsinin əsasən Rusiyanın maraqlarını müdafiə etdiyi məlumdur. Kilsənin siyasətə böyük müdaxiləsinə də o vaxt hakimiyyətdə olan Rusiyapərəstlər şərait yaradırdı. Amma 2018-ci ildə Paşinyan hakimiyyətə gələndən sonra kilsənin hakimiyyətin daxilinə qədər gedib çıxan əl-ayağı yığışdırılmağa başladı və bundan narazı qalan kilsə Paşinyana qarşı məlum addımları atdı. Kilsə ilə baş nazir arasında böyük bir gərginlik narazılıq var. Bu məsələnin bir tərəfi. Digər tərəfdən, iyunda Ermənistanda parlament seçkiləri keçiriləcək və kilsə də bu prosesdə aktiv iştirak etmək, Rusiyanın, onun daxildəki qüvvələrinin mövqeyinə dəstək olmaq istəyir. Amma kilsənin siyasətə, siyasi proseslərə müdaxiləsinin doğuracağı acı nəticəni erməni xalqı görməyə bilməz. Çünki uzun illər kilsə erməni xalqını işğala, separatizmə, revanşizmə səsləyib, dövlət quruculuğuna mane olub.
Ermənistanda keçiriləcək seçki prosesi həm Rusiyanın, həm də Avropanın, Qərbin maraq dairəsindədir və hər biri prosesə yaxından müdaxilə etmək niyyətini gizlətmir.
O ki, qaldı AŞPA-nın hesabatında kilsə ilə bağlı yer alan məsələlərə, bu reallığı əks etdirir. Avropa təşkilatlarının erməni kilsəsinin siyasətə, seçki prosesinə ciddi müdaxiləsindən narahat olması yaxşı haldır. Biz illərlə deyirdik, yazırdıq, amma erməni kilsəsi haqda bir tədbir görülmürdü, onun ziyanlı fəaliyyəti beynəlxalq təşkilatların hesabatlarında qeyd olunmurdu. Bu gün kilsəsinin addımları Avropa İttifaqının, ona üzv ölkələrin də maraqlarına toxunduğu üçün artıq qurum özü kilsəni ifşa edib”.
Q.Hacıyevin sözlərinə görə, son illər bir neçə keşişin həbs olunması, erməni kilsəsinə qarşı açıq hücumlar edilməsi məsələsində Paşinyan elə Avropa təşkilatlarından və dövlətlərindən güc alır. “Kilsənin siyasi proseslərə açıq müdaxiləsini Paşinyan özü bir neçə dəfə bəyan edib, din xadimlərini bu işdən çəkindirməyə çalışıb, amma nəticə olmayıb. AŞPA-nın bu hesabatı erməni kilsəsinə vurulan ağır bir zərbədir, çünki indiyə qədər beynəlxalq qurumlar bu kilsə barədə tənqiddən qaçırdı. İndi isə AŞPA-nın nümayəndələri gəlib hər şeyi gözləri ilə görüblər. Bu baxımdan hesab edirəm ki, bundan sonra Paşinyanın kilsəyə hücumları daha da şiddətlənəcək. Çünki əlində artıq sənəd var və bu sənəd erməni kilsəsinin siyasətdə müdaxiləsi də əks olunub. Paşinyan kilsənin üstünə daha sərt şəkildə gedərsə erməni xalqının mütləq əksəriyyəti ona dəstək verəcək. Kilsənin revanşist addımlarından insanlar da bezib”-deyə Q.Hacıyev qeyd etdi.
Q.Hacıyevin fikrincə, Paşinyan seçkidə qalib gələrsə qarşıda onun erməni kilsəsi ilə daha böyük mübarizəsi gözlənilir və Avropa qurumlarının da, xalqın da ona dəstək verəcəyi ehtimal olunur.
İradə SARIYEVA
