Əli Mustafa: “Paşinyan bütün sahələrdə olduğu kimi, bu sahədə də Rusiyanın söz sahibi olmasını istəmir”
Ermənistan dəmir yolları üçün Rusiya konsessiyasının satışı İrəvanda Qazaxıstan nümayəndə heyəti ilə müzakirə oluna bilər. Bunu Ermənistanın Baş naziri Nikol Paşinyan brifinqdə bildirib.
“Rusiyadan gizlin heç bir müzakirə aparıla bilməz. Bəli, bu məsələni Qazaxıstan nümayəndə heyəti ilə müzakirə etməyimiz mümkündür”, - deyə o, brifinqdə suala cavab olaraq bildirib.
Qeyd edək ki, Qazaxıstanın xarici işlər naziri Yermek Koşerbayev İrəvanda rəsmi səfərdədir. Nümayəndə heyətinin tərkibinə nəqliyyat naziri Nurlan Sauranbayev də daxildir. Belə görünür ki, Paşinyan dəmir yollarını Rusiyanın nəzarətindən çıxarmaqda qərarlıdır. Baxmayaraq ki, Rusiya bunu istəmir.
Sözügedən məsələni baki-xeber.com-a şərh edən siyasi ekspert Əli Mustafanın fikrincə, reallıq ondan ibarətdir ki, Ermənistan-Rusiya münasibətləri xoş olmayan bir istiqamətdə inkişaf edir: “Bir çox sahələrdə əməkdaşlığın zəifləməsini müşahidə edirik. Elə sahələr var ki, orada ümumiyyətlə, əməkdaşlığın dayanma perspektivləri var. Məsələ ondadır ki, Ermənistan KTMT-dən çıxmayıb, amma fəaliyyətini dayandırıb. Avrasiya İqtisadi İttifaqı ilə əməkdaşlığını davam etdirir, amma paralel olaraq Avropa İttifaqı ilə yaxınlaşma yolunu davam etdirir. Eyni zamanda Rusiyanın Ermənistandakı müəyyən aktivlərinə qarşı da müəyyən proseslər diqqəti cəlb edir. Çünki neçə illərdir Ermənistanda Rusiya hərbi kontingentinin sayı azalır. O mənada ki, Azərbaycanla sərhəd ərazilərdən Rusiya qüvvələri çıxarılıb. İrəvan hava limanında Rusiya sərhədçiləri fəaliyyət göstərmir. Ermənistanın İranla sərhədində keçid məntəqəsinə erməni tərəfi nəzarət edir. Halbuki, bundan əvvəl keçid məntəqəsində də Rusiya Federal Təhlükəsizlik Xidmətinin sərhəd qüvvələri dayanırdı. İndi də Ermənistanda dəmir yolu şəbəkəsinin Rusiyadan alınaraq Qazaxıstana verilməsi müzakirə edilir. Əvvəla, onu qeyd edim ki, Ermənistanın ağır iqtisadi vəziyyətindən istifadə edərək Rusiya 2008-ci ilin fevralında Ermənistan dəmir yollarının idarəçiliyini aldı. Ancaq problem ondadır ki, ötən müddət ərzində Rusiya ölkənin dəmir yol infrastrukturuna sərmayə qoymadı. Görünən odur ki, Paşinyan bütün sahələrdə olduğu kimi, bu sahədə də Rusiyanın söz sahibi olmasını istəmir. Odur ki, dəfələrlə bu mövzu ilə bağlı müzakirələr olub. Hətta Ermənistan bəzi dəmir yollarının tez bir zamanda Rusiya tərəfindən bərpasını istədi, amma bir nəticə olmadı. Ona görə də Ermənistan dəmir yollarını Rusiyadan almaqda qərarlıdır. O zaman bəs niyə Qazaxıstana üstünlük verilir? Birincisi, Qazaxıstan da Aİİ-də təmsil olunur. Yəni Rusiya narazılıq edə bilməz ki, dəmir yolları hansısa Avropa İttifaqı ölkəsinə verilir. İkincisi, Qazaxıstanın dəmir yolu çəkilişində çox yaxşı təcrübəsi var. Üçüncüsü, Qazaxıstanın sərmayə qoymağa imkanı da var. Bu isə o deməkdir ki, dəmir yollarının idarəçiliyi Qazaxıstana verilsə, nəticə daha səmərəli olacaq. Ən başlıcası isə Ermənistanın Rusiyadan asılılığı azalacaq”.
Vidadi ORDAHALLI
