Bəhruz Quliyev: “Belə hallarda məqsəd təkcə daxili sabitliyi pozmaq deyil, eyni zamanda qlobal ictimai rəyi formalaşdırmaq və gələcək siyasi və ya hərbi addımlar üçün legitimlik qazanmaqdır”
“The Washington Post” İsrailin Tehranda dəhşətli bir planının üstünü açıb. Nəşrin yazdığına görə, İsrailin baş naziri Benyamin Netanyahu “artıq İranda rəhbərlik yoxdur, hamısı ölüb” deyə Tehranda camaatı kütləvi şəkildə küçələrə tökülməyə çağırıb. “The Washington Post”un iddiasına görə, İsrail bu planı ona görə qurur ki, camaat küçələrə tökülsün və İran rejimi insanları kütləvi şəkildə küçələrdə qırsın, qətlə yetirsin. Bu baş verdikdən sonra isə hadisəni dünyada İranın öz xalqına genosid siyasəti kimi qələmə versin və İran rejiminin üstünə dünya dövlətlərinin kollektiv yürüşünü təşkil etsin.
Mövzu ilə əlaqədar “Səs” qəzetinin baş redaktoru, siyasi ekspert Bəhruz Quliyev baki-xeber.com-a bildirdi ki, “The Washington Post”-a istinadən yayılan iddialar bir daha müasir dövrdə müharibə anlayışı köklü şəkildə dəyişdiyini təsdiq edir: “Artıq qarşıdurmalar yalnız cəbhə xəttində deyil, paralel olaraq informasiya və psixoloji müstəvidə də aparılır.
Bu kontekstdə Benyamin Netanyahu ilə bağlı səsləndirilən ssenarilər, təsdiqlənib-təsdiqlənməməsindən asılı olmayaraq, informasiya müharibəsinin klassik elementlərini özündə əks etdirir. Münaqişə tərəfləri qarşı tərəfin cəmiyyətinə təsir göstərmək üçün müxtəlif üsullardan istifadə edir. Dezinformasiya yaymaq, qorxu və panika yaratmaq, hakimiyyətə inamı sarsıtmaq və insanları emosional qərarlar verməyə sövq etmək və sair."
B.Quliyev qeyd etdi ki, xüsusilə, Tehran kimi iri və həssas mərkəzlərdə bu tip psixoloji təsir cəhdləri daha təhlükəli nəticələr doğura bilər. “Kütlələrin küçələrə yönləndirilməsi, idarəolunan xaosun yaradılması və sonradan bu hadisələrin beynəlxalq ictimaiyyətə fərqli formada təqdim olunması informasiya müharibəsinin əsas ssenarilərindən biridir.
Tarixi təcrübə də göstərir ki, belə hallarda məqsəd təkcə daxili sabitliyi pozmaq deyil, eyni zamanda qlobal ictimai rəyi formalaşdırmaq və gələcək siyasi və ya hərbi addımlar üçün legitimlik qazanmaqdır. İnformasiya üstünlüyü əldə edən tərəf çox zaman real hərbi üstünlük qədər ciddi strateji qazanc əldə edir.
Hesab edirəm ki, bu kimi iddialar müasir münaqişələrin, müharibələrin mahiyyətini açıq şəkildə ortaya qoyur. Deməli, bu gün müharibələr yalnız silahla deyil, informasiya, psixologiya və ictimai rəy üzərindən aparılır. Bu isə dövlətlər üçün informasiya təhlükəsizliyinin artıq milli təhlükəsizliyin ayrılmaz hissəsinə çevrildiyini göstərir,"- deyə, ekspert bildirib.
İradə SARIYEVA
