Bəhruz Quliyev: “Ərazilərimizin azad edilməsi uzunmüddətli və məqsədyönlü dövlət strategiyasının nəticəsidir”
Prezident İlham Əliyev Xocalı rayon ictimaiyyətinin nümayəndələri ilə görüşdə ərazi bütövlüyümüzün tam bərpa edilməsi ilə əlaqədar hazırlıq dövrünün çox çəkməsinin səbəblərini açıqladı:
“Çünki güc yığmalı idik, güc toplamalı idik. Öz haqq işimizi beynəlxalq müstəvidə təsdiqləməli idik, o cümlədən Ermənistan dövlətinin hərbi cinayətləri haqqında məlumatı çatdırmalı idik. Xocalı soyqırımı ilə bağlı həqiqətləri çatdırmalı idik və çatdırmışıq. Son illər ərzində bir çox beynəlxalq təşkilatlar məcburiyyət qarşısında bizim mövqeyimizi, ədalətli mövqeyimizi dəstəkləyən qərar və qətnamələr qəbul etmişdir. Bu, Ermənistan-Azərbaycan münaqişəsinin hüquqi əsasını təşkil etmişdir. Biz bir çox ölkələrlə sıx ikitərəfli münasibətlər, bir çox ölkələrlə strateji tərəfdaşlıq münasibətləri qurduq. Bu da beynəlxalq müstəvidə Azərbaycan həqiqətlərini, Qarabağ münaqişəsi həqiqətlərini çatdırmaq üçün imkan yaratmışdır. Heç kimdən asılı olmayan güclü iqtisadiyyat qurduq. Güclü ordu qurduq - həm Ordumuzun peşəkarlığını artırdıq, eyni zamanda, əldə edilən gəlirlər hesabına silah-sursat, texnika aldıq”.
Sözügedən məsələni baki-xeber.com-a şərh edən “SƏS” qəzetinin baş redaktoru, politoloq Bəhruz Quliyevin fikrincə, ərazilərimizin işğaldan azad edilməsi uzunmüddətli və məqsədyönlü dövlət strategiyasının nəticəsidir: “Prezident İlham Əliyevin Xocalı rayon ictimaiyyətinin nümayəndələri ilə görüşdə səsləndirdiyi fikirlər bir daha təsdiq edir ki, Azərbaycanın ərazi bütövlüyünün bərpası ani qərar deyil, uzunmüddətli və məqsədyönlü dövlət strategiyasının nəticəsidir. Bu proses emosiyalar üzərində deyil, siyasi uzaqgörənlik, diplomatik fəaliyyət və hərbi güc balansının düzgün qurulması əsasında həyata keçirilib. Prezidentin vurğuladığı kimi, Azərbaycan ilk növbədə beynəlxalq müstəvidə öz haqlı mövqeyini təsdiqləməyə nail oldu. Ermənistanın işğalçılıq siyasəti, mülki əhaliyə qarşı törədilmiş hərbi cinayətlər və xüsusilə Xocalıda baş vermiş soyqırım faktları ardıcıl şəkildə dünya ictimaiyyətinə çatdırıldı. Bu istiqamətdə aparılan sistemli informasiya siyasəti nəticəsində bir sıra beynəlxalq təşkilatlar Azərbaycanın ədalətli mövqeyini dəstəkləyən qərarlar qəbul etməyə məcbur oldular”.
Politoloq hesab edir ki, eyni zamanda, ölkə rəhbərliyi paralel olaraq güclü iqtisadi baza formalaşdırdı: “Heç bir xarici təsirdən asılı olmayan iqtisadi model Azərbaycanın müstəqil siyasi qərarlar qəbul etməsinə imkan verdi. İqtisadi güc isə öz növbəsində müasir və peşəkar ordu quruculuğuna yönəldildi. Ordunun texniki təchizatı gücləndirildi, döyüş qabiliyyəti artırıldı və hərbi potensial real gücə çevrildi. Bununla yanaşı, Azərbaycan beynəlxalq münasibətlər sistemində də mövqeyini əhəmiyyətli dərəcədə gücləndirdi. Bir çox ölkələrlə qurulan strateji tərəfdaşlıq əlaqələri Azərbaycanın haqlı mövqeyinin qlobal səviyyədə daha geniş qəbul olunmasına şərait yaratdı. Bu isə siyasi-diplomatik müstəvidə mühüm üstünlük qazandırdı. Bir sözlə, Prezident İlham Əliyevin qeyd etdiyi kimi, gücün toplanması, hüquqi əsasların möhkəmləndirilməsi və beynəlxalq dəstəyin təmin olunması Azərbaycanın ərazi bütövlüyünün bərpasını təmin edən əsas amillər oldu. Bu, müasir Azərbaycanın düşünülmüş və ardıcıl siyasətinin real nəticəsi kimi tarixə düşdü”.
Vidadi ORDAHALLI
