İlyas Hüseynov: “8 avqust tarixi Azərbaycan-ABŞ münasibətlərində bir dönüş nöqtəsi hesab oluna bilər”
Prezident İlham Əliyev yanvarın 5-də yerli televiziya kanallarına müsahibəsində deyib ki, Azərbaycan-Amerika münasibətlərinin kontekstində də 2025-ci il tarixi il sayıla bilər.
Amerikadakı anti-Azərbaycan qüvvələrin, erməni lobbisinin fəaliyyəti nəticəsində qəbul olunan 907-ci düzəlişin ABŞ ilə Azərbaycan arasında genişmiqyaslı münasibətlərin qurulmasına imkan vermədiyini qeyd edən Prezident İlham Əliyev artıq bu məhdudiyyətin aradan qaldırıldığını vurğulayaraq deyib: “Bunun təbii ki, iki əsas səbəbi var: Birincisi, Azərbaycan-Ermənistan müharibəsinin rəsmən sona çatması, ikincisi, Amerikada Prezident Tramp administrasiyasının hakimiyyətdə olması. Bu administrasiya çox praqmatik, çox peşəkar və Amerikanın milli maraqlarının nə olduğunu çox yaxşı bilən üzvlərdən ibarətdir, Prezident başda olmaq şərti ilə”.
Prezident İlham Əliyev özünün də iştirakı ilə Ağ Evdə keçirilən mərasimdə Prezident Donald Trampın 907-ci düzəlişə son qoymasının rəmzi məna daşıdığını ifadə edib.
Prezident İlham Əliyevin ABŞ-a səfəri Azərbaycan-ABŞ əlaqələrinin möhkəmlənməsində mühüm rol oynadı. 2025-ci ilin müharibədən sülhə keçid fonunda Azərbaycan-ABŞ əlaqələrinin strateji tərəfdaşlıq səviyyəsinə yüksəldiyi tarixi dönüş ili olması xüsusi qeyd olunmalıdır.
907-ci düzəlişin faktiki olaraq aradan qaldırılması, ABŞ–Azərbaycan Strateji İşçi Qrupunun yaradılması, Azərbaycanın hərbi Qələbəsini qlobal siyasi müstəvidə təsdiqlətməsidir.
Eyni zamanda Prezidenti Donald Tramp administrasiyasının praqmatik, milli maraqlara əsaslanan siyasət yürütməsi, Zəngəzur dəhlizinin açılmasının ABŞ Prezidenti tərəfindən təsdiqlənməsi məsələsi də xüsusi önəm daşıyır.
Məlum olduğu kimi, 8 avqust 2025-ci ildə Prezident İlham Əliyev Ağ Evdə Prezident Donald Trampla görüşüb. Görüş zamanı ABŞ–Azərbaycan Strateji Tərəfdaşlıq Xartiyasının hazırlanması üçün Strateji İşçi Qrupun yaradılmasına dair Memorandum imzalanıb. Sənəd enerji, ticarət, tranzit, rəqəmsal sahə, sərmayələr, müdafiə və təhlükəsizliyi əhatə edir.
Prezident Tramp 907-ci düzəlişin tətbiqini dayandıran sərəncam imzalayıb. ABŞ Prezidentinin şahidliyi ilə Azərbaycan–Ermənistan Birgə Bəyannaməsi imzalanıb, sülh sazişi layihəsi paraflanıb və ATƏT-in Minsk Qrupu ləğv edilib.
Vaşinqton Sammitinin mühüm nəticələrindən biri Azərbaycan–Naxçıvan arasında maneəsiz bağlantını nəzərdə tutan TRIPP marşrutudur. Strateji Tərəfdaşlıq Xartiyası üzrə işlər yekun mərhələdədir və imzalanması gözlənilir...
Azərbaycan və ABŞ əlaqələrinin strateji əməkdaşlıq səviyyəsinə çatdığını deyən politoloq İlyas Hüseynov baki-xeber.com-a bildirdi ki, Prezident İlham Əliyev yerli televiziya kanallarına müsahibəsində keçən ilin avqustunda ABŞ-a səfəri və Ağ Evdə imzalanan sənədlər, ABŞ-Azərbaycan münasibətlərinə də toxundu. “Şübhəsiz ki, 8 avqust tarixi Azərbaycan-ABŞ münasibətlərində bir dönüş nöqtəsi hesab oluna bilər. Bunu münasibətlərin formatlanması, yenidən transformasiyası kimi də qiymətləndirə bilərik. Çünki ABŞ-Azərbaycan münasibətlərində Bayden-Blinken dövründə bir çox mühüm məsələlər açıq qalırdı. Azərbaycanın ABŞ-a çoxsaylı sualları vardı. Sanki ABŞ administrasiyası erməni lobbisinin girovuna çevrilmişdi, 907-ci düzəliş tətbiq olundu, onun hüquqi qüvvəsi saxlanıldı. Lakin Ağ Evdə imzalanan sənədlərlə həm ABŞ-Azərbaycan Strateji Xartiyasının hazırlanması üçün İşçi Qrupu təsis edildi, 907-ci düzəliş aradan qaldırıldı. Biz Azərbaycan-ABŞ münasibətlərində yeni bir başlanğıcı görürük”.
İ.Hüseynov vurğuladı ki, bu münasibətlər ticarət, tranzit, logistika, təhlükəsizlik, hərbi əməkdaşlıq, süni intellekt sahəsini əhatə edir. “Göründüyü kimi siyasi gündəlik çox genişdir, əhatəlidir. Əlbəttə ki, yola saldığımız ildə Azərbaycan-ABŞ münasibətlərində yüksəlişi müşahidə edirik. Ümid edirəm ki, 2026-cı ildə də münasibətlər pozitiv dalğa ilə dərinləşəcək, intensiv inkişaf dinamikasını görəcəyik. Çünki həm də ABŞ-Azərbaycan strateji tərəfdaşlığı ilə bağlı Xartiya da imzalanacaq. Onun müəyyən işartılarını, konturlarını, hansı sahələri əhatə edəcəyini artıq söylədim. Amma təbii ki, burada hərbi əməkdaşlıq və təhlükəsizlik məsələləri hər iki tərəfin daha çox xeyrinədir”-deyə İ.Hüseynov qeyd etdi.
İradə SARIYEVA
