Xəyal Bəşirov: “Beynəlxalq hüququn nə qədər korroziyaya, iflasa uğradığını Azərbaycan Prezidenti dəqiqliklə vurğuladı”
Müasir dünyada beynəlxalq hüquq daha işlək vəziyyətdə olmalı olduğu halda təəssüf ki, biz beynəlxalq hüququn inkişaf etdiyini yox, çökdüyünü görürük. Bir sözlə, beynəlxalq hüquq bütün istiqamətlərdə işləkliyini itirib.
Azərbaycan Prezidenti İlham Əliyev yanvarın 5-də yerli televiziya kanallarına müsahibəsində bildirib ki, bugünkü dünyada beynəlxalq hüquq deyilən məsələ yoxdur.
Prezident İlham Əliyev bildirib: “...Bir daha dediklərimə qayıdaraq qeyd edirəm ki, beynəlxalq hüquq, Birləşmiş Millətlər Təşkilatı - onların hamısı artıq rudimentə çevrilib...”
Prezident İlham Əliyev vurğulayıb ki, Azərbaycan beynəlxalq hüququn işləməməsinin ilk qurbanlarından biri olub. “Bildirdiyim kimi, təəssüf ki, beynəlxalq hüququn norma və prinsipləri faktiki olaraq işləmir. Azərbaycan isə beynəlxalq hüququn işləməməsinin ilk qurbanlarından biri olmuşdur. Torpaqlarımız işğal edildikdən sonra Birləşmiş Millətlər Təşkilatının Təhlükəsizlik Şurası Ermənistan qoşunlarının ərazilərimizdən çıxarılmasını tələb edən dörd qətnamə qəbul etdi. Lakin bu qətnamələr 27 il ərzində kağız üzərində qaldı və əgər biz öz torpaqlarımızı güc yolu ilə azad etməsəydik, onlar əbədi olaraq icrasız qalacaqdı”-deyə Prezident Əliyev bildirib.
İkinci Qarabağ müharibəsindən ötən beş ildə yeni reallıqların bütün dünya, beynəlxalq ictimaiyyət, o cümlədən aparıcı ölkələr və nüfuzlu beynəlxalq təşkilatlar tərəfindən qəbul olunduğunu xatırladan Azərbaycan Prezidenti qeyd edib: “Biz kağız – BMT Nizamnaməsi üzərində olan dünyada yaşamırıq, torpaq üzərində yaşayırıq. Ona görə də, güclü olmalıyıq, biz də bunu etməyə çalışırıq. Mən hər bir ölkəyə bunu tövsiyə edirəm”.
Siyasi və Hüquqi Araşdırmalar Mərkəzinin rəhbəri Xəyal Bəşirov baki-xeber.com-a bildirdi ki, Azərbaycan Prezidenti öz çıxışında beynəlxalq hüququn iflasa uğradığını olduqca dəqiqliklə ifadə edib. “Dünyada baş verən qarşıdurmalar, kataklizimlər fonunda beynəlxalq hüququn nə qədər korroziyaya, iflasa uğradığını Azərbaycan Prezidenti dəqiqliklə vurğuladı. Ölkə başçısı BMT başda olmaqla beynəlxalq təsisatların beynəlxalq hüququn təmin edilməsi istiqamətində nə qədər dişsiz olduğunu detallı şəkildə əsaslandırdı. Beynəlxalq hüququn işləməməsi, BMT-nin, Avropa İttifaqının, Avropa Parlamenti, Avropa Şurası və digər bu qəbildən olan saysız təşkilatların baş verən prosesə münasibətdə heç bir təsir imkanlarının olmaması Azərbaycan xalqı üçün də narahatedici məqamları ortaya qoyur. Çünki biz müstəqil Azərbaycan dövləti olaraq beynəlxalq hüququn subeyktlərindən, beynəlxalq hüququn işləməsini ən çox istəyən tərəflərdən biriyik”.
X.Bəşirov qeyd etdi ki, İkinci Qarabağ Müharibəsinə qədər keçən 27-30 illik müddət ərzində ərazilərimizin işğaldan azad edilməsi, ərazi bütövlüyümüzün və suverenliyimizin təmin edilməsi istiqamətində beynəlxalq hüququn bir gün işləyəcəyini böyük səbrsizliklə gözləyirdik. “Bunu Prezident İlham Əliyev də dəfələrlə çıxışlarında qeyd edib. Amma günlərin birində biz anladıq ki, çox təəssüflər olsun, beynəlxalq işləmir. Beynəlxalq hüquq sadəcə onun sükanı arxasında duran o güclərin maraqlarına uyğun olanda bu mexanizmin işlədiyi barədə görüntü yaradılır və bu sadəcə dar çərçivədə həmin o güclərin maraqlarına xidmət edir.
Biz bunu torpaqlarımız işğal altında olan dövrlərdə, İkinci Qarabağ Müharibəsinə qədərki proseslərdə çox aydın şəkildə gördük, hiss etdik. İkinci Qarabağ Mübaribəsi əslində beynəlxalq hüququn işləməməsi səbəbindən gerçəkləşdi. Əgər BMT qəbul etdiyi qətnamələri icra etsəydi və bu müharibə baş verməyəcəkdi. 23 saatlıq antiterror tədbirlərinin özü də beynəlxalq hüququn işləməməsi səbəbindən oldu. Ümumiyyətlə, Azərbaycan heç vaxt müharibənin, güc tətbiq etməyin tərəfdarı olmayıb. Amma sülh, ərazi bütövlüyünün, suverenliyinin təmin edilməsi, Cənubi Qafqazda təhlükəsizliyin təmin olunması üçün müharibə etmək zərurəti yarandı və Azərbaycan bunu etmək məcburiyyətində qaldı, torpaqlarımızı işğaldan azad edib ərazi bütövlüyümüzü və suverenliyimizi öz gücünə bərpa etdi. Əslində beynəlxalq hüquq işləsəydi bunlar baş verməzdi. Beynəlxalq hüququn işləmədiyənə görə 3 mindən artıq şəhid verdik, qazilərimiz oldu. Beynəlxalq hüququn işləməməsini biz ayrı-ayrı dövlətlərə münasibətdə də görürük. Dövlətlər öz güclərinə güvənərək bir-birinə qarşı ərazi iddiaları irəli sürürlər. Dövlət başçılarına münasibətdə də bunu görürük”.
X.Bəşirovun sözlərinə görə, Prezident İlham Əliyev haqlı olaraq beynəlxalq hüquqla bağlı fikirlər səsləndirib. “Prezident İlham Əliyev güc amilinin beynəlxalq hüquqdan öndə olduğunu öz çıxışlarında qeyd edib. Bu gün bizim çıxış yolumuz odur ki, güclü olaq. Təkcə Cənubi Qafqazda deyil, ümumiyyətlə dünyada baş verən proseslərə münasibətdə Prezidentin də dediyi kimi müdafiə qabiliyyətimizi, Silahlı Qüvvələrimizi, texnikamızı, silahlarımızı, hərbi arsenalımızı, elmimizi, kadr potensialını, dövlətin siyasətini, iqtisadiyyatını, diplomatiyamızı gücləndirməliyik...
Beynəlxalq hüququ həyata keçirmək, ona riayət etmək üçün yaradılan bütün beynəlxalq təsisatlar işləmir. Bu halda güclü olmalıyıq”-deyə X.Bəşirov qeyd etdi.
X.Bəşirov qeyd etdi ki, bu gün dünyada gedən müharibələrdən, qarşı durmalardan əziyyət çəkən, hüququ pozulan xalqlar və dövlətlər hüquqlarının müdafiə edilməsi, təmin olunması üçün kimə, hara müraciət edəcəklərini bilmirlər. “Beynəlxalq hüquqdan yararlanmalı olan, lakin yararlana bilməyən tərəflər, xalqlar kimə, hansı təşkilata şikayət etməlidirlər? BMT-yə, Avropa Şurasına, yaxud digər beynəlxalq təsisata müraciət etməlidirlər? Bu qurumlara müraciət etməyin heç bir mənası yoxdur. Burada ancaq güclü olub, gücünə arxalanmaq, lazım olanda gücündən istifadə etmək formulu işləyir ki, Azərbaycan Prezidenti də fikirlərini bu istiqamətdə açıqladı...”-deyə X.Bəşirov qeyd etdi.
İradə SARIYEVA
