Məhəmməd Əsədullazadə: “Güman edirəm ki, Moskva üzərinə düşən öhdəlikləri yerinə yetirəcək, kompensasiya ödəyəcək”
Azərbaycan Düşənbədə Rusiyadan 2024-cü ilin dekabrında AZAL aviaşirkətinin Qroznı üzərində vurulan təyyarəsi ilə bağlı suallarına cavab alıb.
Bunu Prezidentin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Brüsseldə "EU Today" və bir qrup jurnalistə müsahibəsində bildirib.
H.Hacıyev qeyd edib ki, hadisədən dərhal sonra müəyyən anlaşılmazlıq və emosiyalar yaranıb, lakin Bakının narahatlıqları Duşənbədə növbəti görüşdə (Azərbaycan və Rusiya liderləri) müzakirə edilib. "Azərbaycan Rusiyadan AZAL aviaşirkətinin vurulan təyyarəsinə görə rəsmi olaraq üzr istənilməsini, hərtərəfli araşdırmanın aparılmasını, günahkarların məsuliyyətə cəlb edilməsini və kompensasiya ödənilməsini gözləyirdi. Hazırda biz anlaşılmazlıqlar səhifəsini çevirmişik və iki ölkə arasında normal qonşuluq münasibətlərini davam etdirəcəyik", - o əlavə edib.
Bütün bunların fonunda Rusiya üzərinə düşən bütün öhdəlikləri yerinə yetirəcəkmi?
“Çünki prezident verdiyi sözü tutmasa, bu, Rusiya kimi böyük bir dövlətə hörmət gətirməyəcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Azərbaycanla Rusiya arasında mülki təyyarəmizin vurulması ilə bağlı yaranan böhran müəyyən dərəcədə yoluna düşüb: “Çünki Tacikistanın paytaxtı Düşənbədə Prezident İlham Əliyevlə Prezident Putin arasında görüş keçirildi. Putin söz verdi ki, Rusiya üzərinə düşən işləri yerinə yetirəcək. Cənab Hikmət Hacıyev də qeyd edir ki, qarşı tərəfdən müsbət cavablar almışıq. Görünür ki, ortada müsbət cavablar var. Belə olmasaydı Prezident köməkçisi Hikmət Hacıyev belə əminliklə danışmazdı. Deməli, ortada hansısa nəticə var. Rusiya rəsmi səviyyədə Azərbaycanın tələblərini yerinə yetirməlidir. Əgər Putin bununla bağlı söz veribsə, bu, yerinə yetirilməlidir. Çünki prezident verdiyi sözü tutmasa, bu, Rusiya kimi böyük bir dövlətə hörmət gətirməyəcək. Mənfi bir prosesin başlanmasına səbəb ola bilər. Necə deyərlər, Rusiya barəsində mənfi imic formalaşa bilər. Onsuz da Ukraynada gedən müharibə Rusiyanın beynəlxalq miqyasda imicinə güclü zərbə vurub. Hər halda Rusiya maraqlı olmaz ki, növbəti bənzər vəziyyətlə üzləşsin. O üzdən, güman edirəm ki, Moskva üzərinə düşən öhdəlikləri yerinə yetirəcək, kompensasiya ödəyəcək. Eyni zamanda, təyyarəni vuran şəxslər də cəzalandırılmalıdır. Azərbaycanın Rusiyadan tələb etdikləri bunlardır. Rusiya Azərbaycanla normal tərəfdaşlıq müstəvisində əməkdaşlıqda maraqlıdırsa, rəsmi Bakının tələblərini yerinə yetirməlidir. Yəni bu, adi beynəlxalq hüquq səviyyəsində Azərbaycanın tələbidir. Rusiya gərəkən cavabı veribsə, deməli, problem olmamalıdır”.
Vidadi ORDAHALLI
