Məhəmməd Əsədullazadə: “Moskva istəyir ki, zəif iqtisadi əlaqələr üzündən ölkədə sosial narazılıq artsın”
Ermənistanın xarici işlər naziri Ararat Mirzoyan Almaniyanın “Deutsche Welle” kanalına müsahibəsində Rusiya mediasında, deputatlar və siyasətçilər arasında Ermənistana, onun hökumətinə, demokratik dəyərlərinə və suveren qərarlarına qarşı yönələn sərt tənqidləri kəskin şəkildə pisləyib.
Nazirin sözlərinə görə, bu cür addımlar İrəvanla Moskva arasında mövcud olan gərginliyi daha da artırır: “Əlbəttə, bu cür yanaşmalar anlaşılmazlığı, hətta münasibətlərdə parçalanmanı və fikir ayrılıqlarını dərinləşdirir. Biz bu məsələni dəfələrlə rusiyalı həmkarlarımızın diqqətinə çatdırmışıq - xüsusilə də Ermənistan rəhbərliyinə və dövlət siyasətinə qarşı yönələn media və təbliğat hücumları ilə bağlı”.
Maraqlı məqam odur ki, Ermənistanda keçiriləcək parlament seçkiləri yaxınlaşdıqca, bu ölkə ilə Rusiyanın ticarət dövriyyəsi kəskin azalır. Halbuki, Ermənistan sanksiyalardan yayınmaya görə milyardlar qazanırdı. Bu arada Rusiya erməni sürücüləri üçün məhdudiyyətləri artırıb. Eyni zamanda Rusiya mediasında Paşinyan hakimiyyətinə qarşı tənqidlərin dozası getdikcə daha da artır.
“Bunun bəlli bir mərhələdən sonra Ermənistanla Rusiya arasında siyasi böhrana gətirib çıxaracağı istisna deyil”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Ermənistanda Rusiyaya qarşı isteriyanın yüksəlməsi müşahidə edilir: “O cümlədən, Rusiya siyasi dairələrində, mediasında da Ermənistana qarşı bənzər prosesin getdiyini görürük. Rusiya telekanallarında, yazılı mətbuatda xüsusən Paşinyana qarşı tənqidlər nəzərə çarpacaq qədər artıb. Təbii ki, bütün bunlar təsadüfü deyil və bu, gələn il Ermənistanda keçiriləcək parlament seçkiləri ilə əlaqədardır. Hakimiyyət də bütün bunların fərqindədir. Bunun bəlli bir mərhələdən sonra Ermənistanla Rusiya arasında siyasi böhrana gətirib çıxaracağı da istisna deyil. Əgər Ararat Mirzoyan Almaniyanın aparıcı telekanalına müsahibəsində Rusiyanın Ermənistanda gedən proseslərə müdaxiləsinə toxunursa, deməli məsələ ciddidir. Yəni Paşinyan Rusiyadan gələn təhdidlərlə üzləşir. Belə olmasaydı Mirzoyan diplomatik ifadələr işlədərək verilən sualdan yayınardı. Məsələnin digər tərəfi ondan ibarətdir ki, Paşinyan Rusiyaya bağlı müxalifəti neytrallaşdırır. Bununla bağlı qətiyyətli addımlar atır. Bütün bunları Moskva qıcıqla qarşılayır. Ritorikanın sərtləşməsi həm də bununla bağlıdır. Rusiya sanki qarşıdan gələn seçkilərə ölüm-qalım məsələsi kimi baxırlar. Moskva hesab edir ki, Paşinyan bu dəfə də qalib gəlsə, Ermənistanın Rusiyadan uzaqlaşması, Qərbə inteqrasiya daha da sürətlənə bilər. Rusiya xeyli maliyyə vəsaiti sərf etsə də, Moldovada keçirilən seçkilərdə məğlub oldu. Parlament seçkilərində Qərbə yaxın olan qüvvələr qalib gəldilər. Moldovadan fərqli olaraq Ermənistan Rusiyanın yaratdığı qurumlarda təmsil olunur. Ona görə də Kreml çox narahatdır. Mirzoyan həm də Qərbə mesaj verir ki, Rusiya Ermənistana qarşı kirli informasiya müharibəsi aparır. Bütün bu baş verənlər Ermənistanla Rusiya arasında iqtisadi əlaqələrə də təsirsiz ötüşmür. Moskva istəyir ki, zəif iqtisadi əlaqələr üzündən Ermənistanda sosial narazılıq artsın. Nəticədə seçkilərdə bu amil Rusiyapərəst siyasi qüvvələrin xeyrinə işləsin. Ona görə Paşinyan çalışır ki, Ermənistan-Türkiyə sərhədi açılsın”.
Vidadi ORDAHALLI
