İlyas Hüseynov: “Onun hər iki tərəfi qalib elan etməklə bağlı çağırışı bir qədər müəmmalı görünür”
Baki-xeber.com xəbər verir ki, ABŞ prezidenti Donald Tramp Ukrayna prezidenti Volodimir Zelenski ilə görüşündən sonra “Social Truth” hesabında hər iki tərəfi müharibəni dayandırmağa çağırıb. “Hazırda olduqları yerdə durmalıdırlar. İkisi də qələbəsini elan etsin, qoy qərarı tarix versin!" Trampın mesajında bildirib.
Tramp daha sonra yazır: “Ukrayna prezidenti Vladimir Zelenski ilə görüşüm çox maraqlı və mehriban keçdi. Prezident Putinə tövsiyə etdiyim kimi, ona da dedim ki, bu qətllər dayandırılmalı və sövdələşmə aparılmalıdır! Kifayət qədər qan töküldü, sərhədlər indi müharibə və cəsarətlə müəyyən edilir.
Olduqları yerdə dayanmalıdırlar. Hər ikisi də qələbəsini elan etsin, qoy qərarı tarix versin! Artıq atəş, ölüm bitsin, böyük pullar xərclənməsin”.
Trampın bu planı haqda ekspertlər nə düşünür? Bu nə dərəcədə real plandır?
“Yalnız bir çağırışla müharibəni həll etmək mümkün olmayacaq”
Politoloq İlyas Hüseynov “Bakı-Xəbər”ə bildirdi ki, Tramp dünyada sülhü bərqərar etmək, sülh ehtimallarını gücləndirmək və vasitəçilik rolunu möhkəmləndirmək niyyətindədir: “Ona görə də müxtəlif münaqişələri həll etmək öhdəliyini özündə görür. Yaxın Şərqdə sülhün təmin olunması üçün Misirdə qurulan barış masasından sonra artıq bütün diqqətlər Rusiya-Ukrayna müharibəsinə yönəlib. Elə vaxt itirmədən ABŞ prezidenti Donald Tramp danlşıqlar həyata keçirdi. Lakin onun hər iki tərəfi qalib elan etməklə bağlı çağırışı bir qədər müəmmalı görünür. Çünki Ukrayna ərazilərini itirib, infrastruktur məhv olub, insanlar qaçqın düşüb köç ediblər. Bu ciddi problemlərə yol açır, daxildə də böyük narazılıqlar yaranmaqdadır. Lakin insanların qələbə əzmi, qələbə ruhu da xüsusi diqqət çəkir”.
İ.Hüseynovun fikrincə, bu cür şəraitdə, ərazilərin itkisi hesabına sülhün yaradılması Zelenskinin planlarına daxil deyil. “Burda Rusiya sülhdən qazanclı ayrıla bilər, bu həm də Vladimir Putinin reytinqinə müsbət təsir göstərəcək. Amma bu və digər formada müharibəni həll etmək dönəmidir. Qalib mesajının verilməsi, qoşunların hazırkı sərhəddə dayanaraq mübahisəni həll etmək niyyəti müsbət qiymətləndirilə bilər. Lakin burda çoxsaylı hərbi-siyasi məsələlər yaranır, suallar çoxalmaqdadır. Ona görə də düşünürəm ki, çox rahatlıqla, yalnız bir çağırışla müharibəni həll etmək mümkün olmayacaq”-deyə İ.Hüseynov qeyd etdi.
İradə SARIYEVA
