Elşad Həsənov: “O, əməli iş görmək üçün Bakıya gəlib”
Məlum olduğu kimi, Prezident İlham Əliyev ABŞ Mərkəzi Komandanlığının komandanı və Hərbi Dəniz Qüvvələrinin admiralı Bred Kuperi qəbul edib.
Qonaq Vaşinqtonda ABŞ prezidentinin şahidliyi ilə Azərbaycanla Ermənistan arasında sülh gündəliyinin irəli aparılmasına dair əldə edilmiş nailiyyətlər münasibətilə Əliyevə təbriklərini çatdırıb. Vaşinqtonda imzalanmış sənədlərin regionun inkişafı üçün geniş imkanlar yaratdığını vurğulayan Prezident İlham Əliyev Azərbaycanla Ermənistanın artıq sülh şəraitində yaşamağa uyğunlaşdıqlarını deyib. Söhbət zamanı son dövrlərdə Azərbaycan-ABŞ ikitərəfli münasibətlərinin inkişafı məmnunluqla qeyd edilib, hərbi və hərbi-texniki sahələrdə əməkdaşlığın perspektivləri ilə bağlı fikir mübadiləsi aparılıb.
Maraqlıdır, ABŞ komandanı Bred Kuper Bakıya niyə gəlib? Xəzər donanmasını ABŞ texnologiyası ilə gücləndirmək gündəmdə ola bilər? O cümlədən, Azərbaycana ABŞ silah və texnikasının satılması gündəmdə ola bilər?
“Çox güman ki, Xəzər dənizində Azərbaycan hərbi donanmasının modernləşdirilməsinə ABŞ kömək edəcək”
Sözügedən məsələyə aydınlıq gətirən siyasi ekspert Elşad Həsənov bununla bağlı “Bakı-Xəbər”ə açıqlamasında bir sıra məqamlara toxundu: “Azərbaycanla ABŞ arasında münasibətlərin yaxşılaşması Donald Trampın növbəti dəfə prezident seçilməsindən sonra başladı. Məsələ ondadır ki, ABŞ-ın 46-cı prezidenti Cozef Bayden ermənilərin maraqlarından çıxış edərək iki ölkə arasında münasibətlərin pozulması yolunu tutdu. Nəticədə Azərbaycan-ABŞ münasibətlərində bir gərginlik var idi. Bayden administrasiyası Azərbaycanın öz suverenliyini təmin etməsini həzm edə bilmirdi. Gərginliyin kökündə əsasən bu dayanırdı. Çünki Bayden bütün siyasi karyerası boyu erməni lobbisinə yaxın olub, onların maraqlarından çıxış edib. Bilavasitə Baydenin iştirakı ilə 1992-ci ildə ABŞ Konqresi Azərbaycana dövlət yardımını qadağan edən bədnam 907-ci düzəlişi qəbul edib. O zaman Bayden Konqresdə təmsil olunurdu və çox fəal senatorlardan biri idi. Deməyim odur ki, Bayden prezident olanda ABŞ-ın milli və dövlət maraqlarını nəzərə almadı. Halbuki, Cənubi Qafqazın ən önəmli dövləti Azərbaycan idi. Tramp 2024-cü ilin noyabrında prezident seçkilərində qalib gələndən sonra vəziyyət dəyişdi. Tramp Prezident İlham Əliyevə böyük hörmət bəsləyir. Elə bunun nəticəsidir ki, 8 avqustda Vaşinqtonda Trampın şahidliyi ilə Azərbaycanla Ermənistan dövlət başçıları sülh sazişinin bəndlərini parafladılar. ABŞ-la Azərbaycan arasında Strateji Tərəfdaşlıq Xartiyasının hazırlanması üçün Strateji İşçi Qrupu yaradıldı. Əldə olunmuş razılaşma siyasi, iqtisadi, enerji, müdafiə, təhlükəsizlik və rəqəmsal transformasiya kimi sahələrdə əməkdaşlığın dərinləşməsini nəzərdə tutur. Bu, Azərbaycan-ABŞ əlaqələrinin yeni səviyyəyə yüksəldiyinin göstəricisidir. Prezident İlham Əliyev Yaxın Şərq Sülh Sammitinə dəvət edildi. O baxımdan ABŞ Mərkəzi Komandanlığının komandanı və Hərbi Dəniz Qüvvələrinin admiralı Bred Kuperin Bakıya gəlməsi sıradan bir səfər deyil. O, əməli iş görmək üçün Bakıya gəlib. Məqsəd ölkəmizlə hərbi əməkdaşlığı gücləndirməkdir. Çox güman ki, Xəzər dənizində Azərbaycan hərbi donanmasının modernləşdirilməsinə ABŞ kömək edəcək. Yeni katerlər verilə bilər. Nəzərə almalıyıq ki, bu sahədə əməkdaşlıq yeni deyil. Üstəlik, Tramp 907-ci düzəlişi dondurub. Bir sözlə, bu səfər çərçivəsində Azərbaycanla bağlı çox önəmli məsələlərin həll edildiyini güman edirəm”.
Vidadi ORDAHALLI
