Əli Orucov: "Əgər müharibə bitibsə, o zaman Ermənistanın hərbi xərclərini artırmağa hansı zərurət var?"
2023-cü ildə Ermənistanın müdafiə xərcləri 795 milyon dollardan 1.33 milyard dollara yüksəlib. Bu barədə Stokholm Beynəlxalq Sülhün Öyrənilməsi İnstitutunun (SİRPİ) yaydığı hesabatda qeyd olunub.
Bildirilib ki, ÜDM-ə nisbətdə hərbi xərclər 4.1 faizdən 5.5 faizə çatıb. Qeyd edək ki, Ermənistan büdcə qaydalarına görə, hərbi xərclər ÜDM-in 4 faizini keçməməlidir.
SİRPİ-nin hesabatında qeyd olunub ki, Azərbaycanın hərbi xərcləri 2 milyard 991 milyon dollardan 3 milyard 561 milyon dollara, ÜDM-ə nisbətdə 3.8 faizdən 4.6 faizə çatıb. İran və qardaş Türkiyənin də hərbi xərcləri, demək olar ki, 1.5 dəfə artıb. İranın hərbi xərcləri 6.8 milyard dollardan 10.3 milyard dollara, Türkiyənin isə 10.6 milyard dollardan 15.8 milyard dollara çatıb. Dünyanın müdafiə xərclərinə ən çox pul ayıran ölkəsi isə 906 milyard dollarla ABŞ olub. İkinci yerdə 296 milyard dollarlıq hərbi xərclə Çin qərarlaşıb. Üçüncü yerdə olan Rusiya isə 2022-ci ilə nisbətən hərbi xərclərini kəskin artırıb. Ötən il Rusiyanın hərbi xərcləri 86.4 milyard dollardan 109 milyard dollara yüksəlib.
Göründüyü kimi, Ermənistan hərbi xərclərini iki dəfəyə yaxın artırıb. Bu, Ermənistan kimi kiçik ölkə üçün böyük rəqəmdir.
"İndi olmasa da, bir neçə ildən sonra İrəvan növbəti dəfə təcavüzkar mövqedən çıxış edə bilər"
Sözügedən məsələni "Bakı-Xəbər"ə şərh edən AMİP funksioneri Əli Orucovun fikrincə, bütün bunlara ciddi yanaşmaq lazımdır: "Bəzən deyirlər ki, müharibə bitib, Azərbaycan öz ərazi bütövlüyünü təmin edib və Ermənistandan ciddi təhdid gözlənilmir. Bunu həm də onunla əlaqələndirirlər ki, Ermənistanın hərbi gücünü artırmağa iqtisadi imkanı yoxdur. O zaman sual yaranır: iqtisadi imkanları zəif olan Ermənistan nəyin hesabına müdafiə xərclərini 795 milyon dollardan 1.33 milyard dollara yüksəlib? Əgər müharibə bitibsə, Azərbaycan Qarabağa nəzarəti tam təmin edibsə, o zaman Ermənistanın hərbi xərclərini artırmağa hansı zərurət var? Məgər Azərbaycan Ermənistana hücum etməyə hazırlaşır? Təbii ki, yox. Belə görünür ki, Fransa başda olmaqla, müəyyən dövlətlər Ermənistanı silahlandırır. Məqsəd 44 günlük Vətən müharibəsi zamanı məhv edilən hərbi texnika və sursatın yerini doldurmaqdır. İstisna deyil ki, 5 apreldə Brüsseldə keçirilən Ermənistan-Avropa İttifaqı-ABŞ üçtərəfli görüşündə də erməni tərəfinə gizli hərbi dəstəyin verilməsi öz əksini tapıb. Görüşdən sonra mətbuatda yayılan 20 bəndlik sənəd Ermənistanın silahlandırılmasının gündəmdə olduğunu göstərir. İndi olmasa da, bir neçə ildən sonra İrəvan növbəti dəfə təcavüzkar mövqedən çıxış edə bilər. Ona görə də baş verənlərə ciddi yanaşmaq lazımdır".
Vidadi ORDAHALLI
