Xəyal Bəşirov: "Azərbaycanı "etnik təmizləmə", "irqi ayrıseçkilik"də və sairdə ittiham edib bu barədə "araşdırma" aparmaları görüntü xarakteri daşıyır"
İrqi ayrıseçkilik, başqa millətlərə və dinlərə qarşı ögey münasibət formasının təzahürlərü özünü Ermənistanın siyasətində hər zaman göstərib. Bu birmənalı olaraq belədir. Amma təəssüflər olsun ki, Ermənistan və onun ideoloqları bu yoldan çəkinmək əvəzinə Azərbaycanı şərləməkdə davam edir.
Bildiyiniz kimi, aprelin 15-də Beynəlxalq Ədalət Məhkəməsində İrqi Ayrıseçkiliyin Aradan Qaldırılması üzrə Komitənin (CERD) Ermənistanın Azərbaycana qarşı müraciəti ilə bağlı iş üzrə Azərbaycan tərəfindən qaldırılan ilkin etirazlar üzrə ictimai dinləmələr keçirilib. Azərbaycanın rəsmi təmsilçiləri də Ermənistanın bu əsassız iddiaları ilə bağlı məhkəmə qarşısında tutarlı arqumentlərlə çıxış edib.
Lakin Ermənistan yenə də dayanmaq, durmaq bilmir.
Belə ki, "Armenpress"in mətbuat zalında keçirilən mətbuat konfransında qondarma Erməni Soyqırımı Muzey-İnstitutunun direktoru Edita Qzoyan bir sıra əsassız ittihamlar səsləndirib. Azərbaycanı irqi ayrı-seçkilikdə itiham edən institut rəhbəri deyib ki, guya Azərbaycan son illərdə "Qarabağın dinc sakinlərinə qarşı düşmənçilik ritorikası" yürüdüb, Qarabağda "etnik təmizləmə" aparıb, erməniləri "məcburi köçkünə" çevirib, onları tam şəkildə deportasiya edib, institut da bu "məsələləri" tədqiq edəcək (?).
Qondarma Erməni Soyqırımı Muzeyinin elmi işçilərinin diqqətinin "Azərbaycan tərəfindən həyata keçirilən mədəni soyqırıma və erməni mədəni sərvətlərinin məhv edilməsi məsələlərinə" yönəldiyini deyən E.Qzoyan bildirib ki, institut əməkdaşları 2023-cü ildə Qarabağdan guya "məcburi köçkün" düşmüş ermənilər arasında "faktların" toplanması missiyasına cəlb olunublar. Ermənilərin guya "deportasiyası", onlara qarşı "zorakılıq, nifrətin qızışdırılması və digər təzahürlər" barədə materialların toplanması və arxivləşdirilməsi işləri aparılır. Guya Azərbaycanda "ermənifobiya" var.
Ermənistanın saxta genosid İnstitutunun direktorunun "Qarabağ əhalisinə qarşı Azərbaycanın irqi ayrıseçkilik, etnik təmizləmə siyasəti" ilə bağlı tədqiqatlar aparıldığını deməsinin özü gülünc bir haldır. Bunların bu cür "müzakirələrinin" , "təhlillərinin", "tədqiqatlarlarının" əslində bir məqsədi var. Guya Avropa məhkəməsində Ermənistanın Azərbaycana qarşı qaldırdığı irqi ayrıseçkiliyin nəticələrinin aradan qaldırılması konvensiyasına uyğun iddianı gücləndirmək istəyirlər. Axı hələ orada proses gedir, Azərbaycan XİN rəhbərinin müavini Elnur Məmmədov bu iddialara qarşı əsaslı arqumentlər gətirib, dünyanın diqqətinə çatdırıb ki, irqi ayrıseçkiliklə biz yox, Ermənistan məşğul olub. Ermənilər isə vəziyyəti öz xeyirlərinə dəyişmək üçün içəridə belə "təhlillər" aparmağa başlayıblar. Bəlkə sabah Ermənistan Milli Elmlər Akademiyasını da bu şərləmə kampaniyasına qoşacaqlar, onlar da hansısa uydurma "tədiqiqatlar" aparacaqlar. Dünyada erməni yalanı, erməni saxtakarlığı heç zaman bitməz.
Təbii, məqsədləri Qarabağda həqiqəti ortaya çıxarmaq yox, Avropa məhkəməsində öz vəziyyətlərini yüngülləşdirmək, iddialarını gücləndirməkdir.
"Bu, beynəlxalq ictimaiyyətin aldadılmasına, Azərbaycanı qabaqlamağa xidmət edir"
Siyasi və Hüquqi Araşdırmalar Mərkəzinin rəhbəri Xəyal Bəşirov "Bakı-Xəbər"ə "Ermənistanın bu addımı növbəti dəfə "oğru elə bağırdı ki, doğrunun bağrı çatladı" məsəlinə bənzəyir. Qeyd etdiyiniz kimi, bu onların Azərbaycanı bu prosesdə qabaqlamaq məqsədinə xidmət edir. Ermənistan onilliklər boyudur ki, saxta erməni "soyqırımı" uydurmasını beynəlxalq ictimaiyyətin diqqətinə çatdırmağa, qəbul olunmasına, Türkiyəyə qarşı ərazi və kompensasiya iddiaları irəli sürməyə cəhd göstərir. Amma bugünə qədər bununla bağlı uğur əldə etməyib. Təbii ki, bəzi dövlətlər Türkiyəyə qarşı təzyiq siyasətini ortaya qoyarkən bu "soyqırım" faktorundan istifadə etməyə cəhd göstərir. Bu da əslində ermənilər və onların havadarları tərəfindən uydurulan "soyqırım" məsələsinə inamdan irəli gəlmir, bundan öz niyyətlərini gerçəkləşdirmək üçün istifadə edirlər.
Ermənistan indi də Azərbaycana qarşı bu əsassız ittihamları ortaya qoyub. Halbuki, Ermənistan daim Azərbaycana qarşı bu cinayətləri törədib, ötən əsrdə dəfələrlə azərbaycanlıları deportasiya edib, soydaşlarımızı etnik təmizləməyə məruz qoyub. 1905, 1918, 1948-ci illərdə, ondan əvvəl və sonra bu cinayətləri törədib. İndiki Ermənistan ərazisində öz tarixi dədə-baba yurdlarında yaşayan azərbaycanlılara qarşı soyqırım cinayətləri, etnik təmizləmə, təcavüz cinayətləri törədib. Bu proses keçən əsrin 80-ci illərinin sonlarından Ermənistan tərəfindən artıq real müstəviyə və konkret olaraq mütəşəkkil səvəiyyəyə keçirildi. Bu da Azərbaycan ərazisinin işğal edilməsi ilə nəticələnib. Söhbət 1987-1988-ci illərdə başlayan və Azərbaycanın 20 faiz ərazisinin işğalı ilə bitən prosesdən gedir ki, Azərbaycan xalqına qarşı bu cinayətləri törədən tərəf Ermənistan, Ermənistanın rəhbərliyində təmsil olunan cinayətkar ünsürlər olub. Prezident İlham Əliyevin də qeyd etdiyi kimi, işğaldan azad edilən ərazilərimizdə mötəbər sübutlara və dəlillərə əsasən deyə bilərik ki, onlar Azərbaycan dövlətinə və xalqına qarşı genosid, ekologiyamıza qarşı ekosid, mədəniyyətimizə, tarixi abidələrimizə qarşı kultsid, şəhərlərmizə və kəndlərimizə qarşı urbasid cinayətləri törədiblər. Bütün bu cinayətləri törədən tərəfin 19-20 sentyabr tarixində terrorçuların zərərsizləşdirilməsi ilə bağlı antiterror tədbirlərinin keçirilməsi prosesinə münasibətdə hay-küy qaldırmaları, Azərbaycanı "etnik təmizləmə", "irqi ayrıseçkilik"də və sairdə ittiham edib bu barədə "araşdırma" aparmaları görüntü xarakteri daşıyır. Bu, beynəlxalq ictimaiyyətin aldadılmasına, Azərbaycanı qabaqlamağa xidmət edir. Bu, Ermənistan təmsilçilərinin beynəlxalq hüquqi müstəvilərdə Azərbaycanın Ermənistana qarşı qaldırdığı və bundan sonra qaldıracağı iddialarla bağlı prosesdə çaşqınlıq yaratmaq, eyni zamanda özlərini "zərərçəkmiş" tərəf kimi qələmə vermək məqsədlərini ortaya qoymaqdan ibarətdir. Bunlar hamısı əsassız və absurddur"-deyə X.Bəşirov vurğuladı.
Ermənistanın heç cür bununla beynəlxalq məhkəməyə təsir etmək etmək gücündə olmadığını deyən X.Bəşirov qeyd etdi ki, əvvəlcə Ermənistan Türkiyənin tələbinə uyğun olaraq arxivləri açsın və qondarma 24 aprel iddiaları ilə bağlı arxiv materiallarını ortaya qoysun. O hesab edir ki, o arxivlərdə qondarma erməni "soyqırımı" haqda heç bir məlumat yoxdur, burada onların azərbaycanlılara, türk xalqına qarşı törətdikləri soyqırım cinayətlərinin izləri ortaya çıxacaq. Müsahibimiz vurğuladı ki, N.Paşinyan bu barədə araşdırma aparılcağını bəyan etsə də, ona bununla bağlı imkan veriləcəyi inandırıcı görsənmir. "Bu aradırmaların aparılması Ermənistanın bir cinayətkar dövlət kimi məsuliyyətə cəlb edilməsinə gətirib çıxaraq. Ona görə də inanmıram ki, erməni diasporu, lobbi təşkilatları, Ermənistan dövlətinə təsir edən dövlətlər buna imkan versinlər. Bu, gözdən pərdə asmaq üçün növbəti dəfə Ermənistanın ortaya atdığı bir oyundur. Bilirik ki, Azərbaycan Ermənistana qarşı irqi ayrıseçkiliyin bütün nəticələrinin aradan qaldırılması konvensiyasına uyğun olaraq proses başladıb, həmin o proseslə bağlı Ermənistan öz xeyrinə "sübutlar" toplamaq yönündə addımlar atır. Yaxud da ən azı həmin proseslərin getdiyi dövrdə yeni "proseslərin" baş verdiyindən dəm vura bilərlər ki, bu da hər bir halda, onların düşüncəsinə görə, prosesdə xeyirlərinə dönüş yarada bilər. Amma düşünürəm ki, bu absurddur. Əskinə, Ermənistan hər bir cəhdində uğursuzluğa düçardır. Bu uğursuzluğa düçar olma əksinə, gələcəkdə bizim Ermənistana qarşı arqumntlərimizin güclənməsinə gətirib çıxaracaq. Ona görə də biz, Siyasi və Hüquqi Araşdırmalar Mərkəzi olaraq, Ermənistanın Azərbaycana qarşı əsassız ittihamlarını, eyni zamanda Azərbaycanın Ermənistana qarşı beynəlxalq hüquq müstəvilərində - Beynəlxalq Ədalət Məhkəməsində, Beynəlxalq Cinayət Məhkəməsində, İnsan Haqları Məhkəməsində qaldırdığı iddilarla bağlı araşdırmalar aparırıq. Həmin araşdırmaları aparan mərkəzin rəhbəri kimi sizin diqqətinizə çatdıra bilərəm ki, artıq Ermənistan tərəf hüquqi müstəvidə də Azərbaycana məğlub olacaqlarını çox gözəl anlayır. Böyük hesabla, Ermənistan Azərbaycanın ona qarşı qaldıracağı böyük miqyaslı, yüz milyardlarla dollar həcmində təzminatın qarşısını almaq deyil, prosesi uzatmaq üçün bu addımı atır. Onlar çox gözəl anlayırlar ki, bu prosesin qarşsısını ala bilməzlər. Çünki Azərbaycan Prezidenti İlham Əliyevin də dəfələrlə qeyd etdiyi kimi, biz prosesi də yarımçıq qoymayacağıq. Azərbaycan dövlətinə qarşı törədilmiş bütün addımların məsuliyyəti olmalıdır, biz döyüş meydanında onların məsuliyyət məsələsini həll etdik, onları kapitulyasiyaya uğratdıq və 6 milyard dollar həcmində Ermənistandan hərbi qənimətlər əldə etdik, orduları darmadağın edildi, işğala son qoyuldu, Azərbaycan ərazi bütövlüyünü təmin etdi, suverenliyimiz bərpa olundu. Daha sonra siyasi və diplomatik müstəvidə də biz həm Ermənistana, həm də onun havadarlarına böyük hesabla qalib gəlmişik. Bu proses bu gün də davam edir. Düşünürəm ki, bu prosesin davamı kimi, hüquqi müstəvidə də Azərbaycan Ermənistana qarşı uğurlu addımlarını atacaq, Ermənistanın Azərbaycan dövlətinə ilk gündən bugünə qədər vurduğu bütün zərər təzminatlaşdırılacaq və bu ölkə tərəfindən ödənilməsinə nail olunacaq"-deyə X.Bəşirov əlavə etdi.
İradə SARIYEVA
