Faiq Ələkbərli: "I Vazgenin gedib Türkiyənin iç məsələlərini həll etməsi, Konstantinopol Patriarxının seçilməsinə təsir göstərməsi barədə iddialar tamamilə absurddur, uydurmadır"
Ermənilərin antitürkiyə təbliğat maşını gecə-gündüz dayanmadan işləyir, hər dəfə "arxivin" küncündən yeni "faktlar" tapıb onu qardaş ölkənin əleyhinə istifadə etməyə çalışırlar. Antitürkiyə kampaniyasında son dövrlər yetişdirilən "türkoloqlar" xüsusi canfəşanlıq edir.
Bu "türkoloqlar" elə ağlasığmaq iddialar irəli sürürlər ki, adam məəttəl qalır. Olmayan, baş verməyən, yaşanmayan hadisələr düzüb-qoşurlar və onu erməni cəmiyyətinə ixrac edirlər.
Ermənistanda indiyə qədər Türkiyə ilə bağlı dezinformasiyalardan ibarət çoxlu sayda kitablar, "tədqiqat əsərləri" yazılıb. Bu nəşrlərdən biri də aprelin 22-də İrəvanda təqdimatı keçirilən "Türkiyə tarixi: 100 illik dövlətin siyasi konturları" kitabıdır ki, onu kitab yox, cızmaqara, şər, böhtan, yalan toplusu adlandırmaq daha doğru olar.
Bu üzdəniraq kitabın həmmüəllifi "türkoloq" Ruben Melkonyandır və o bildirib ki, bu, "erməni mütəxəssislərin" yazdığı ilk kitabdır.
Guya "əsər" "faktlar və arxiv materialları" əsasında yazılıb. "Emosiyalardan yan keçərək Türkiyəni olduğu kimi təqdim etməyə cəhd edilib. Kitabda Ermənistan-Türkiyə münasibətlərinə aid hadisələr, Türkiyədəki erməni faktoru, Türkiyədə erməni kilsəsinin problemləri və digər məsələlər öz əksini tapıb".
Yazırlar ki, kitabda Ermənistan-Türkiyə münasibətləri və Ərdoğandan sonra Türkiyənin necə olacağı, onun xələfinin kim olacağı ilə bağlı da proqnozlar var."Ermənistan cəmiyyəti Türkiyənin əslində necə olduğunu bilməlidir ki, həqiqətə uyğun gəlməyən yalan hadisələrdən qaçsın. Bundan əlavə, tələbələrin Türkiyəni tanıması və bu ölkə haqqında obyektiv biliyə sahib olması da vacibdir", - deyə müəllif əlavə edib.
Burada diqqətçəkən iddialardan biri odur ki, guya 1961-ci ildə Erməni Apostol Kilsəsinin Konstantinopol Patriarxı vəzifəsinə ermənipərəst din xadiminin seçilməsinə nail olmaq üçün bütün ermənilərin katolikosu I Vazgen Türkiyəyə səfər edib və Türkiyədə prezident səviyyəsində qəbul edilib.
Digər həmmüəllif, türkoloq Vahram Ter-Matevosyan isə "Türkiyənin 20-ci əsr tarixi göstərdi ki, Mustafa Kamalın siyasi sistemin "yuxarıdan" dünyəviləşdirilməsini tətbiq etmək siyasəti uzunömürlü ola bilməz. Siyasi ideologiyada 1980-ci illərdə dövlət ideologiyasına çevrilən islamçılıq və türk millətçiliyinin sintezinin yaranması buna sübutdur. Ərdoğanın Türkiyəsi bu ideologiyanın davamıdır" deyə iddia edib.
Kitabın yazılmasında iştirak edən digər türkoloq Varujan Geqamyan "Türkiyənin 20-ci əsrdəki bütün tarixi göstərir ki, bu və ya digər hakimiyyət demokratik şüarlarla gəlsə belə, bu ölkə həmişə avtoritarizmə can atır"-deyə sərsəmləyib.
Göründüyü kimi, ermənilər yeni iddialarda bulunurlar və iddia edirlər ki, guya 1961-ci ildə erməni katolikosu ilk dəfə Türkiyəyə səfər edib, gedib orada Konstontinapol patriarxının seçilməsinə təsir göstərib, onu seçdirib gəlib. Yaxud iddia edirlər ki, Kamalizm, yəni Atatürkçülük ideologiyası heç vaxt özünü doğrulda bilməz. Guya Türkiyə cəmiyyətinə yuxarıdan dünyəvilik gətirmək baş tutan məsələyə oxşamır, o uzun müddət davam edə bilməz. Guya Türkiyə cəmiyyətinə "avtaritarizm, diktatura, faşizm və sair xasdır". Ermənilər bunu iddia edir ki, Atatürkçülük ideologiyası guya o ölkədə uzun müddət yaşaya bilməz. Sözügedən absurd nəşrdə belə iddiallar irəli sürüb tarixi saxtalaşdırırlar, I Vazgeni elə qələmə verirlər ki, guya Türkiyənin iç məsələsini həll edib. Bu doğrudan da absurd bir iddiadır.
"Türkiyəyə böhtan atmaqla, mövcud siyasi quruluş barədə absurd iddialar irəli sürməklə ermənilər qardaş ölkəyə heç bir təsir göstərə bilməz"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi ekspert Faiq Ələkbərli "Bakı-Xəbər"ə şərhində bildirdi ki, bu cür əsassız məsələlərin ermənilər tərəfindən ortaya atılması təxribat xarakteri daşıyır. "Ermənilər və onların havadarları zaman-zaman Türkiyəyə qarşı bu cür əsası, kökü olmayan iddialarda bulunublar. Erməniləri bu cür saxta kitablar yazmağa vadar edən daha çox onların arxasında dayanan böyük güclərdir. Ayrı-ayrı dövrlərdə o qüvvələr dəyişsə də, məqsədləri dəyişməyib. Təəssüf ki, xristian kimliyinə bürünmüş bir çox xalqlar - ingilislər, almanlar, fransızlar və başqaları erməniləri daim türklərə qarşı qoymağa çalışıb, bu gün də o tendensiya davam etdirilir. Əlbəttə, erməni "türkoloqların" irəli sürdükləri onların öz "kəşfləri" deyil, onları qızışdırıb ortaya salan antitürk dairələrin, qüvvələrin fikirləridir. Yəni I Vazgenin gedib Türkiyənin iç məsələlərini həll etməsi, Konstantinopol Patriarxının seçilməsinə təsir göstərməsi barədə iddialar tamamilə absurddur, uydurmadır. Bu, Türkiyənin, türklüyün böyüklüyünə, əzəmətinə kölgə salmağa xidmət edir. I Vazgenin hansı qlobal səlahiyyəti ola bilərdi ki, gedib Türkiyədə də hansısa iş görsün?. Bu tamamilə saxta və uydurmadır. Ermənilərin rolunu böyütmək istəyirlər, amma faydasızdır"-deyə F.Ələkbərli bildirdi.
F.Ələkbərli qeyd etdi ki, erməni "türkoloqların" kitabında Atatürkçülük, Türkiyə cəmiyyəti, onun dünyəvilikdən uzaq olması barədə yazılanlar da yalandan və xülyadan başqa bir şey deyil, bu onların öz xəyallarıdır. "Tarixən mövcud olan bütün türk dövlətləri demokratik, ədalətli dövlətlər olub. Bunun bariz nümunəsi kimi Osmanlıları, Səfəviləri, Səlcuqları və başqalarını göstərə bilərik. Türk dövlətlərində daim ədalətlilik, sosial bərabərlik, humanizm olub. Erməni müəlliflərin Atatürkçülüklə bağlı dedikləri də, Türkiyənin dünyəvikdən uzaq olmasını iddia etmələri də, "fazizm, diktatura" kimi əsassız fikirlər söylmələri də onların əsl məqsədini ortaya qoyur. Sözdə erməni "soyqırımı"nın "ildönümü" ərəfəsində belə bir kitabın ortaya çıxması onların əsl niyyətlərini açıb göstərir. Onlar Türkiyəyə qarşı belə böhtanlar atmaqla bir növ özlərinə təsəlli verməyə çalışırlar. Türkiyəyə böhtan atmaqla, mövcud siyasi quruluş barədə absurd iddialar irəli sürməklə ermənilər qardaş ölkəyə heç bir təsir göstərə bilməz. Türkiyə cəmiyyəti kifayət qədər savadlı, müdrik cəmiyyətdir, dünyəviliyə də, Atatürkçülüyə də, mövcud hakimiyyətinə də sahib çıxmağı bacarır"-deyə F.Ələkbərli bildirdi.
Erməni müəlliflərin suyu bulandırmaqla, tarixi saxtalaşdırmaqla məşğul olduğunu deyən F.Ələkbərli hesab edir ki, bunun zərbəsi də daha çox ermənilərin özlərinə dəyəcək.
İradə SARIYEVA
