Rus-Azərbaycan münasibətlərindən “hərbi komponent” çıxarıldı - yeni mərhələ gəldi...
Bəhruz Quliyev: "Sülhməramlıların Qarabağı tərk etməsi iki ölkə arasında qarşılıqlı etimadı artıracaq"
Məlum olduğu kimi, Rusiya sülhməramlıları Qarabağı tərk edir. Sülhməramlıların 2025-ci ilə qədər orada qalmasına zərurət yox idi. Bu isə o deməkdir ki, Azərbaycan-Rusiya münasibətlərində hərbi komponent ortadan qalxdı.
İki ölkə münasibətləri ilə bağlı indiyə qədər müəyyən ehtiyatlanmalar, şərhlər və rəylər var idi ki, hərbi kontingent Azərbaycanda qalacaq. Bu isə münasibətlərin inkişafına müəyyən qədər maneçilik törədirdi. O baxımdan sülhməramlıların çıxarılması Azərbaycanla Rusiya arasında münasibətləri zəiflədən yox, gücləndirən faktor olacaq.
İki ölkə arasında münasibətlər onsuz da yaxşı idi, sülhməramlıların çıxarılmasından sonra ikitərəfli dostluq münasibətləri daha da güclənəcək. Çünki Qarabağ mövzusu artıq bağlanıb və bu səbəbdən ikitərəfli münasibətlərdə hərbi və sülhməramlı komponenti yoxdur. Münaqişənin həllindən sonra Rusiya anladı ki, burada qoşunlarını saxlamaq mənasızdır. Artıq münasibətlərdən hərbi komponentin çıxarılması daha yaxşı əməkdaşlıq üçün imkanlar açır.
Bütün bi deyilənlərin fonunda, sülhməramlıların çıxarılması və hərbi kontingentin olmaması artıq iki ölkə münasibətlərinin inkişafında yeni bir mərhələni necə açacaq?
"Cənubi Qafqazda münaqişə ocağı yaratmaq istəyən qüvvələrə xəbərdarlıqdır ki, sülh yalnız bölgədə həll olunmalıdır"
Sözügedən məsələ ilə bağlı fikirlərini "Bakı-Xəbər"lə bölüşən "SƏS" Media Qrupunun rəhbəri, politoloq Bəhruz Quliyev hesab edir ki, sülhməramlıların Qarabağı tərk etməsi iki ölkə arasında qarşılıqlı etimadı artıracaq: "Halbuki, əvvəllər bununla bağlı bir inamsızlıq və qeyri-müəyyənlik var idi. Artıq bu ortadan qalxdı. Rusiya sülhməramlılarının Qarabağı tərk etməsi Cənubi Qafqazda Rusiyanın sülhün tərəfdarı olduğunu göstərir. Bu o deməkdir ki, Azərbaycan və Ermənistan arasında artıq hərbi dildə və ya sülhməramlıların hansısa missiyanı həyata keçirməsi ilə deyil, məhz danışıqlar formatında məsələnin sülh fazasını davam etdirmək olar. Bunun özü Rusiyanın bölgədə sülhün vacib olduğunu hiss etməsinin göstəricisidir. Rusiya hər iki tərəfin biri-birilə müxtəlif formatlarda danışığa getməsinə, hətta sərhədlərin delimitasiya və demarkasiyasında belə razılığa gəlməyə hazır olduğunu anlayıb və üçüncü qüvvəyə ehtiyac olmadığını bilir. Bu səbəbdən də Rusiya, sülhməramlıların 2025-ci ilə qədər bölgədə olmasının nəzərdə tutulmasına baxmayaraq, daha tez bir zamanda qoşunlarını çıxartdı. Hesab edirəm ki, bu addım Rusiya-Azərbaycan münasibətlərinə də öz müsbət təsirini göstərəcək. Qoşunun geri çağırılması ilə Rusiya həm də bu məsələdə hər iki dövlətin öz qərarlarının vacib olduğunu, üçüncü qüvvəyə ehtiyac olmadığını göstərdi. Həm də bu addım Cənubi Qafqazda münaqişə ocağı yaratmaq istəyən qüvvələrə xəbərdarlıqdır ki, sülh yalnız bölgədə həll olunmalıdır. Bu, eyni zamanda, Azərbaycanın apardığı siyasətin düzgün olduğu və "nəyi necə, nə zaman etməyin" ən düzgün formasını Azərbaycanın dövlət başçısının etdiyinin nümunəsidir".
Vidadi ORDAHALLI
