Qulamhüseyn Əlibəyli: "Yaxşı bilirlər ki, göstərdikləri rəqəmlər havadan götürülüb və reallıqla heç bir əlaqəsi yoxdur"
Ermənistanda hakimiyyətyönlü deputat Andranik Koçaryanın qondarma "soyqırım" qurbanlarının 1,5 milyonluq siyahısını müəyyən etmək təşəbbüsü ölkəni qarışdırıb. Həm qarışdırıb, həm də parçalayıb. Müxtəlif dairələrdə, eləcə də parlamentdə bu məsələlər geniş müzakirə olunur.
Erməni siyasətçi Edmon Marukyan da öz növbəsində bildirib ki, "Türkiyə bu məsələnin müzakirə olunmasını istəyir. Odur ki, ayıq olaq, hakimiyyətdən tutmuş ictimai dairələrə qədər bütün tərəfləri "erməni soyqırımı"nı şübhə altına alan bu çirkin diskursa son qoymağa çağırıram".
Xüsusən də Fransadakı erməni diasporu buna qarşıdır. Fransadakı Erməni Təşkilatlarının Koordinasiya Şurasının həmsədri Murad Papazyan siyahı məsələsindən narahatdır və bunun onların əleyhinə işlədiyi qənaətindədir: "1,5 milyon erməni soyqırımı qurbanının adını bilmək istəyi anti-erməni addımdır. Paşinyan bununla erməni soyqırımı faktını şübhə altına alır".
Əslində məsələnin məzmunu budur ki, siyahı məsələsi ermənilərin 100 illik qondarma "soyqırım" yalanını ifşa edəcək. Çünki bununla bağlı fakt yoxdu. Məsələn, yəhudilərin İkinci Dünya müharibəsində soyqırıma məruz qalmaları barədə konkret faktlar var. Ermənilərlə bağlı bu yoxdur. Siyahı da fakt və arxiv məlumatı tələb edir. Bunlar olmadığı üçün Ermənistanda müəyyən dairələr, Fransadakı erməni lobbisi qəti şəkildə qondarma "soyqırım"ın siyahısına qarşı çıxırlar. Yaxşı bilirlər ki, bu qədər "soyqırıma" məruz qalmış erməninin siyahısını ortaya qoya bilməyəcəklər.
"Fransadakı erməni lobbisi siyahı məsələsinin qondarma "soyqırım" yalanını tez bir zamanda ifşa edəcəyindən qorxur"
Məsələ ilə bağlı "Bakı-Xəbər"ə açıqlama verən sabiq millət vəkili, hüquqşünas Qulamhüseyn Əlibəyli hesab edir ki, Fransadakı lobbi erməni yalanlarının ortaya çıxmasından çox narahatdır: "Məsələ ondadır ki, "erməni soyqırımı" uydurma olduğu kimi, guya 1,5 milyon nəfər erməninin də qırğına məruz qalması məsələsi uydurmadır. Bunu hamıdan çox erməni rəsmiləri və lobbisi yaxşı bilir. O cümlədən, Erməni Kilsəsi də bütün bu yalanların fərqindədir. Ona görə də hər vasitə ilə tarixi həqiqətlərin aşkara çıxmasına mane olmağa çalışırlar. Həqiqətin cəmiyyətə, beynəlxalq ictimaiyyətə çatdırılmasına mane olmağa çalışırlar. Türkiyə Osmanlı İmperiyasının varisi kimi dəfələrlə təklif edib ki, arxivlərin açılmasına hazırdır. Beynəlxalq təşkilatların egidası altında tam müstəqil mütəxəssislərdən ibarət komissiya yaradılsın. Həmin komissiya həm Osmanlı, həm də Erməni Kilsısi arxivində araşdırma aparıb obyektiv həqiqətləri üzə çıxarsın. Erməni tərəfi hər zaman bundan imtina edib. Çünki yaxşı bilirlər ki, göstərdikləri rəqəmlər havadan götürülüb və reallıqla heç bir əlaqəsi yoxdur. Ən azından 100 il əvvəl Osmanlıda heç o qədər erməni yaşamayıb. Fransadakı erməni lobbisi siyahı məsələsinin qondarma "soyqırım" yalanını tez bir zamanda ifşa edəcəyindən qorxur. Çünki Osmanlıda vaxtaşırı olaraq əhalinin siyahıyaalınması prosesi gedirdi. Özü də bu, heyətlər üzrə həyata keçirilirdi. Yəni söhbət vergi ödəyiciləri kimi əhalinin siyahıya alınmasından gedir. Birinci Dünya müharibəsi ərəfəsində Osmanlıda erməni əhalinin sayı heç 1 milyon nəfər olmayıb. Ermənilər 1915-ci ildən başlayaraq köçürüləndə onların bir qismi Rusiya İmperiyasına, Yaxın Şərqə və digər yerlərə köçürülüb. Bu səbəbdən ermənilər hər vəchlə çalışırlar ki, arxiv məlumatları açılmasın. Çünki onların dediklərinin yalan olduğu hamıya məlum olacaq. Nəticədə nəinki ermənilərin özləri, onlardan alət kimi istifadə edən Fransa və digər ölkələr gülünc duruma düşərlər. Bu səbəbdən Murad Papazyan və onun kimi digər "yan"lar belə narahatdılar".
Vidadi ORDAHALLI
