Elşad Həsənov: "Onun yanaşması reallıqdan uzaqdır və obyektivliyə söykənmir"
ABŞ Dövlət Departamentinin sözçüsü Vedant Patel Rusiya sülhməramlı kontingentinin Qarabağdan çıxarılmasını şərh edərək qeyd edib ki, bu, Rusiyanın etibarsız müttəfiq olduğunun göstəricisidir.
V.Patel ABŞ-ın 2020-ci ildə Qarabağda döyüşlərin başa çatması və Rusiya qoşunlarının bölgəyə gətirildiyi üçtərəfli sazişin tərəfi olmadığını qeyd edib: "Biz Rusiya ordusunun daha dinc və sabit Cənubi Qafqaz regionuna sərmayə qoyduğunu göstərən heç bir şey görmədik və ötən payızda Qarabağda baş verən hadisələr bunun göstəricisidir. Bu, Rusiyanın etibarlı müttəfiq və ya tərəfdaş olmadığının başqa bir nümunəsidir".
O əlavə edib ki, ABŞ Ermənistan və Azərbaycanın sülhə nail olmaq səylərini qətiyyətlə dəstəkləyir və bu prosesin asanlaşdırılmasına kömək etməyə hazırdır.
Bu nə riyakar yanaşmadır? ABŞ rəsmisi demir ki, bu, Azərbaycanın suverenliyinə hörmətdir. Yəni suveren dövlət kimi mənə hörmət qoyursansa burada xarici qoşunun qalmasına nə ehtiyac var? Bunu demək əvəzinə, Patel deyir ki, Rusiya etibarlı partniyor deyil. Belə çıxır ki, Qarabağdan sülhməramlılar çıxmasaydı Rusiya etibarlı partniyor olardı? Bəs o zaman bizim suverenliyimizi pozan qüvvə olmayacaqdı? Bu nə məntiqsizlikdir?
"Patel elə mövqe sərgiləyir ki, sanki ABŞ sülhməramıların oranı tərk etməsindən məyus olub"
Sözügedən məsələni "Bakı-Xəbər"ə şərh edən siyasi ekspert Elşad Həsənovun fikrincə, Patelin yanaşması erməni şovinistlərinin fikirlərinə bənzəyir: "Rusiya sülhməramlıları Qarabağda nə etməli idilər? Məgər rus qoşunları Ermənistan tərəfində Azərbaycana qarşı vuruşmalıydılar? Patel bunumu demək istəyir? Ona görə də Patelin yanaşması tamamilə səhv və reallıqdan uzaq fikirlərdir. Rusiya sülhməramlılarının Qarabağa daxil olması 10 noyabr 2020-ci il tarixli üçtərəfli bəyannaməyə əsaslanırdı. Sülhməramlılar gələndən sonra da bu, müəyyən mənada münaqişənin tənzimlənməsində rol oynadı. Ancaq bir həqiqəti də demək lazımdır ki, o zaman Rusiya müdaxilə etməsəydi ordumuz 2020-ci ilin noyabrında Xankəndiyə daxil olurdu. Patel elə mövqe sərgiləyir ki, sanki ABŞ sülhməramıların oranı tərk etməsindən məyus olub. Əgər orada etnik ermənilər yoxdursa, Azərbaycan suverenliyini tam bərqərar edibsə, o zaman məsələyə bu cür ikibaşlı yanaşmaq nə deməkdir? Sülhməramlılar ilk dövrlərdə səlahiyyətlərindən kənara çıxıb Andrey Saxarova heykəl qoyanda, məktəb tikəndə Vaşinqton narahat olmurdu. İndi isə Azərbaycanın suverenliyinə birmənalı dəstək vermək əvəzinə, baş verənlərdən məyus kimi davranırlar. Bu da qəbuledilməz bir mövqedir. Patel biməlidir ki, erməni tərəfi 10 noyabr razılaşmasına əməl etmirdi. Qarabağa qanunsuz silah daşınmasını həyata keçirirdi. Ermənistan silahlı birləşmələri oranı tərk etmirdilər. Bunun nəticəsində 19-20 sentyabr 2023-cü ildə Azərbaycan Ordusu Qarabağda antiterror əməliyyatları keçirib. Xankəndi və digər yaşayış məntəqələrində suverenliyimiz tam təmin edildi. Halbuki, sülhməramlılar 2020-ci ilin noyabrında Qarabağa daxil olanda erməni silahlı birləşmələri buraxılmalı idi. Ancaq onlar buna getmədilər. Sülhməramlıların Qarabağda qalmasına zərurət olmadığı üçün onların çıxarılmasına qərar verilib. O üzdən, hesab edirəm ki, Patelin dedikləri reallıqdan uzaqdır və obyektivliyə söykənmir".
Vidadi ORDAHALLI
