Elşad Musayev: "Rəsmi Bakı Serbiyanın ərazi bütövlüyünün təmin olunmasının tərəfdarıdır"
Məlum olduğu kimi, Serbiya Prezidenti Aleksandr Vuçiç Prezident İlham Əliyevə zəng edib və son dövrlərdə Serbiyanın məruz qaldığı təzyiqlər haqqında məlumat verərək dost Azərbaycan xalqının dəstəyini xahiş edib.
Prezident İlham Əliyev Azərbaycan və Serbiyanın qarşılıqlı surətdə həmişə bir-birinin ərazi bütövlüyünü və suverenliyini dəstəklədiklərini bildirərək, bundan sonra da bu mövqenin davam etdiriləcəyini vurğulayıb. Bu xüsusda, iki ölkənin beynəlxalq təşkilatlar çərçivəsində uğurlu əməkdaşlığı qeyd olunub.
Yeri gəlmişkən, Azərbaycanla Serbiya arasında çox yaxın əlaqələr var. Hətta Vuçiç 2022-ci ilin noyabrında Belqradda Prezident İlham Əliyevlə görüşdən və ikitərəfli sənədlərin imzalanmasından sonra mətbuata bəyanatında Əliyevin Avropada sevildiyini xüsusi qeyd etdi: "Prezident İlham Əliyevi sevirlər və sevdiklərinə görə ona zəng vururlar. Onlar ondan hər şeyi xahiş edirlər. Mən həqiqətən şadam ki, mənim böyük dostum və Serbiyanın böyük dostu necə uğur qazanıb və dəyişməyib, o hər zaman öz ölkəsinin təhlükəsizliyini təmin edib".
Maraqlıdır, Azərbaycan Serbiyaya nə yardım edə bilər? Həm də bu danışıqdan az əvvəl Vuçiç Parisdə Makronla görüşüb. Hadisələr arasında bir bağlılıq ola bilərmi?
"Vuçiç Azərbaycana etibar etdiyi üçün ölkə başçısına zəng edib və dəstək istəyib"
Sözügedən məsələyə aydınlıq gətirən Böyük Azərbaycan Partiyasının sədri Elşad Musayev "Bakı-Xəbər"ə açıqlamasında bununla bağlı bir sıra məqamlara toxundu: "Məlum olduğu kimi, Azərbaycan və Serbiya prezidentləri arasında xoş, işgüzar münasibətlər var. Aleksandr Vuçiç dəfələrlə Azərbaycanla bağlı xoş münasibətini ifadə edib. Azərbaycanın Avropanın enerji təhlükəsizliyində roluna xüsusi qiymət verib. Nəzərə almaq lazımdır ki, Serbiya da Azərbaycan kimi öz ərazi bütövlüyünün təmin olunması üçün cəhdlər göstərir, buna çalışır. Azərbaycan da beynəlxalq hüquqa uyğun olaraq bütün ölkələrin, o cümlədən, Serbiyanın ərazi bütövlüyünün təmin olunmasının tərəfdarıdır. Ona görə də hesab edirəm ki, bizim mövqeyimiz benəlxalq hüquqa uyğun olmalıdır. Serbiyanın ərazi bütövlüyü ilə bağlı mövqeyimiz ortadadır və bundan sonra da siyasət bu yöndə olmalıdır. Onu da qeyd edim ki, bu ölkə eyni zamanda Qoşulmama Hərakatının da üzvüdür. Bu təşkilat çərçivəsində bizim əməkdaşlığımız olub. Vuçiç Azərbaycana etibar etdiyi üçün ölkə başçısına zəng edib və dəstək istəyib. Digər tərəfdən, biz çalışmalıyıq ki, Azərbaycanla xoş münasibətdə olan ölkələr vasitəsilə Fransaya təsir edək və bundan yararlanaq".
Vidadi ORDAHALLI
