Məhərrəm Zülfüqarlı: "Baş verənlər göstərir ki, Azərbaycanın Ermənistanla normallaşma prosesində Fransanın vasitəçiliyindən imtina etməsi doğru qərar olub"
Get-gedə Fransanın iç üzü tamamilə ifşa olunur, son baş verənlər isə onun əsl simasını bütün dünyaya göstərdi. Azərbaycana qarşı düşmənçilik siyasəti yürüdən Makron hakimiyyəti artıq düşdüyü biabırçı vəziyyəti ört-basdır edə bilmir.
Cənubi Qafqazda bütün proseslərdən kənarda qalan rəsmi Paris çalışır ki, müxtəlif təxribatlarla özünü buralarda göz soxsun, amma alınmır ki, alınmır. Özünü daim "bitərəf, qərəzsiz" kimi qələmə verməyə çalışan Makron hökuməti əslində Azərbaycan düşməni olduğunu sübut edir. Öz səfirini müxtəlif bəhanələrlə geri çağırması da bu ölkənin Azərbaycana bəslədiyi münasibətin göstəricisidir. Makron hökuməti çalışırdı ki, Qarabağ probleminin həlli məsələsində, eləcə də Ermənistan-Azərbaycan münasibətlərinin normallaşdırması prosesinə özünü yamaq etsin. Amma Azərbaycan buna qəti etiraz etdi və birmənalı olaraq bildirdi ki, Makron hökuməti yalnız və yalnız normallaşmaya mane ola bilər, onun ziyankar mövqeyi özünə qalsın.
Azərbaycan 2022-ci ildə Fransanın Qarabağ məsələsində, Ermənistanla münasibətlərin normallaşdırılması sahəsində vasitəçiliyindən imtina etdi. Artıq baş verənlər göstərir ki, Azərbaycan il yarım, iki il əvvəl rəsmi Parisin vasitəçiliyindən imtina etməkdə düzgün mövqe tutub. Bildiyiniz kimi, 2022-ci ildə Makronun vasitəçiliyi ilə görüşlərin keçirilməsindən Azərbaycan imtina etdi.
Fransanın Azərbaycan-Ermənistan münasibətlərinin normallaşdırılmasında ədalətli vasitəçi ola bilməyəcəyi ilə bağlı il yarım, iki il əvvəl ortaya qoyduğu mövqe özünü bir daha təsdiqlədi. Deməli, Azərbaycan düz yolda imiş. 2 il əvvəl Azərbaycan bəyan edirdi ki, Fransa bu gedişlə ədalətli vasitəçi ola bilməz. Fransanın öz səfirini geri çağırması bir daha sübut etdi ki, həqiqətən də Azərbaycanın dediyi kimi Fransa Ermənistanla normallaşma məsələsində ədalətli vasitəçi rolunu oynaya bilməz, çünki qərəzlidir, Fransanın sonuncu addımı da bunu sübut etdi.
"Belə bir qeyri-obyektiv ölkə yalnız normallaşmaya əngəl ola bilərdi, necə ki, prosesdən kənarda qalmasına baxmayaraq pozuculuğunu davam etdirir"
Məsələyə mövqe bildirən AVCİYA-nın vitse-prezidenti, professor Məhərrəm Zülfüqarlı "Bakı-Xəbər"ə bildirdi ki, Fransanın hazırkı davranışı yeritdiyi siyasətin davamıdır. O qeyd etdi ki, keçmişdə Azərbaycan nisbətən zəif olanda bu məsələ qabardılmırdı, amma Azərbaycanın güclənməsi nəticəsində Fransanın qərəzli münasibəti daha qabarıq şəkildə önə çıxarıldı. M.Zülfüqarlı bildirdi ki, Fransa uzun müddət ATƏT-in Minsk Qrupunun həmsədrlərindən biri olmasına baxmayaraq, Ermənistanın işğalçılıq siyasəti ilə bağlı heç vaxt beynəlxalq hüquqa əsaslanan mövqe nümayiş etdirməyib, o zaman da qərəzli olub, indi də qərəzlidir. "Azərbaycan hər zaman Makron hökumətinin qərəzli münasibətini gördüyü üçün hələ iki il əvvəl doğru qərar qəbul edib. Bəli, baş verənlər göstərir ki, Azərbaycanın Ermənistanla normallaşma prosesində Fransanın vasitəçiliyindən imtina etməsi doğru qərar olub. Çünki Fransa heç zaman bu məsələdə bitərəf, ədalətli, qərəzsiz mövqe tuta bilməz, hər an antiazərbaycan mövqeyini büruzə verir. Belə bir qeyri-obyektiv ölkə yalnız normallaşmaya əngəl ola bilərdi, necə ki, prosesdən kənarda qalmasına baxmayaraq pozuculuğunu davam etdirir. Keçmişdə də qərəzli olublar, indi də qərzəlidirlər. 44 günlük Vətən müharibəsində, 23 saatlıq antiterror tədbirləri zamanı, eləcə də sonrakı proseslərdə Makron hökumətinin tutduğu qərəzli, ermənipərəst mövqe onun bütün Qafqaz üçün təhlükə olduğunu ortaya qoydu"-deyə M.Zülfüqarlı qeyd etdi.
O bildirdi ki, Fransa ATƏT-in Minsk qrupunda təmsil olunanda Azərbaycanı tənqid etmək imkanı elə də geniş olmasa da, indi əlinə fürsət keçib. "Azərbaycanın qalibiyyəti Fransanı ciddi narahat edir. Biz qalib dövlət kimi Fransanın əvvəlki və indiki fəaliyyətinə də qiymət verə bilirik, bud da rəsmi Parisi qıcıqlandırır"-deyə professor bildirdi.
M.Zülfüqarlının sözlərinə görə, tarixə baxsaq, Fransa həmişə müsəlman, xüsusən də türk xalqlarına düşmən münasibətilə fərqlənib. O qeyd etdi ki, Osmanlı dövlətinin parçalanmasında, devilməsində, Osmanlıya qarşı şər-böhtan kampaniyasında həmişə onlar iştirak edib. Fransanın Avropada ən qatı millətçi dövlət olduğunu deyən M.Zülfüqarlının sözlərinə görə, millətçilik anlayışı 1789-cu ildə Fransa burjua inqilabı ilə başlayıb. "Yəni fransızlarda da erməni kimi qatı millətçilik, başqalarına düşmən münasibət həmişə olub. Ermənilərin Fransanın müəyyən şəhərlərində kompakt yaşaması, seçkilərdə elektorat kimi iştirak etməsi də Fransanın siyasətinə təsir edir. Həm prezident, həm parlament üzvləri seçicilərin səsini qazanmaq üçün bu cür variantlardan istifadə edirlər. Prezident İlham Əliyev də bir dəfə yaxşı dedi ki, əgər Fransa bu cür erməni təəssübü çəkirsə, elə Marseldə ermənilərə ikinci dövlət yaratsın, çünki Marselin əhalisinin çoxu ermənilərdən ibarətdir".
M.Zülfüqarlı qeyd etdi ki, artıq ABŞ başda olmaqla Qərb ölkələri də Fransadan üz çeviriblər.
Afrika ölkələrində Fransanın həyata keçirdiyi çoxsaylı cinayətlərin də onu gözdən saldığını deyən M.Zülfüqarlı hesab edir ki, Azərbaycanın da onun bu cinayətlərini ifşa etməsi Makron hökumətini qıcıqlandırır. "Azərbaycan rəsmi Parisin iç üzünü ifşa edir. Təbii ki, Azərbaycan bu məsələdə haqlıdır"-deyə professor qeyd etdi.
İradə SARIYEVA
