Arzuxan Əlizadə: "Avroittifaq bununla növbəti dəfə Ermənistanın maraqlarına oynadığını sübut edir"
"Ermənistan və Azərbaycan arasında demarkasiya və delimitasiya prosesində bizim üçün əsas hər iki ölkənin imzaladığı Almatı Bəyannaməsidir". Bu barədə Avropa İttifaqının Ermənistandakı nümayəndəliyindən "Joxovurd" qəzetinin sualına cavab olaraq məlumat verilib.
Qəzetin sualına cavab olaraq Aİ-nin Ermənistandakı nümayəndəliyi belə cavab verib: "Ermənistan və Azərbaycan 1991-ci ildə Almatı Bəyannaməsini imzalayıb. Ona əsasən 11 sovet respublikası onların inzibati sərhədlərinin həm də beynəlxalq sərhədləri ola biləcəyini bəyan edib. Bu öhdəlik 2022-ci ildə Praqada baş nazir Paşinyan və prezident Əliyev tərəfindən təsdiqlənib. Bu, həm də bu ölkələrin hər birinin Aİ tərəfindən tanınması üçün əsasdır. İnzibati sərhəd heç vaxt beynəlxalq sərhəd olmayıb, ona görə də onun düzgün demarkasiyası və delimitasiyası lazımdır, lakin bizim üçün əsas hər iki ölkənin imzaladığı Almatı Bəyannaməsidir".
Ümumilikdə, Almatı Bəyannaməsinin təstiqlənməsi bizim Avropadan gözlədiyimiz deyil. Bizim Avropadan gözləntimiz odur ki, Almatı Bəyannaməsindən Ermənistanın sui-istifadə etməsi hallarının qarşısını alsın. Paşinyan buna söykənərək iddia edir ki, sərhədlərin delimitasiyası Almatı Bəyannaməsi imzalandığı vaxt qüvvədə olan xəritələrin əsasında aparılmalıdır. Niyə? Sərhədlərin delimitasiyası və demarkasiyasının Almatı Bəyannaməsi əsasında aparılması qəti şəkildə yolverilməzdir. O baxımdan yaxşı olardı ki, Aİ Ermənistanın Almatı Bəyannaməsindən sui-istifadə hallarının və cəhdlərinin qarşısını alaydı, buna qarşı bəyanatlar səsləndirəydi, nəinki məlum olan şeyi təkrarlamaq.
"Məsələnin mahiyyəti odur ki, Almatı Bəyannaməsi adı altında rəsmi İrəvan ərazilərimizə sahiblənmək istəyir"
Məsələ ilə bağlı "Bakı-Xəbər"ə açıqlama verən AMİP sədri Arzuxan Əlizadə hesab edir ki, Avroittifaq bununla növbəti dəfə Ermənistanın maraqlarına oynadığını sübut edir: "Əvvəla, ərazilərimiz işğal altında olan dövrdə bu qədər narahat deyildi. Halbuki, dünyanın gözü qarşısında beynəlxalq hüquq pozulmuşdu, suverenliyimizə qəsd edilmişdi. SSRİ dönəmində müxtəlif dövrlərdə Azərbaycan əraziləri qoparılaraq qanunsuz olaraq Ermənistana verilib. Yaylaq, örüş sahələri və digər adlar altında bu işlər həyata keçirilib. Bu zaman Azərbaycan ictimaiyyətinin rəyi nəzərə alınmayıb. Hətta 1984-cü ildə Qazax rayonuna məxsus ərazi Ermənistana veriləndə qarşıdurma baş verib. Camaat qəti şəkildə buna etiraz edib. Məsələnin mahiyyəti odur ki, Almatı Bəyannaməsi adı altında rəsmi İrəvan ərazilərimizə sahiblənmək istəyir. Bu da Azərbaycanın maraqlarına qətiyyən uyğun ola bilməz. Avroittifaq da Ermənistanın maraqlarından çıxış edərək belə mövqe sərgiləyir. Tarixi Azərbaycan ərazilərində süni Ermənistan yaratmaları azmış kimi, indidə digər ərazilərimizi ilhaq etmək istəyirlər. Özü də Almatı Bəyannaməsinin arxasında gizlənərək bunu etməyə çalışırlar. Ona görə də qəti şəkildə buna yol vermək olmaz. Qanunsuz olaraq Ermənistana peşkəş edilən ərazilər geri qaytarılmalıdır. Yaxşı olardı ki, Avroittifaq Ermənistanı beynəlxalq hüquqa əməl etməyə məcbur etsin".
Vidadi ORDAHALLI
