Sahil Kərimli: "Fransa bu cür gedişlərlə bizə təzyiq edə bilməyəcək"
Fransa Azərbaycandakı səfiri Ann Buayonu məsləhətləşmələr üçün geri çağırıb. Bu barədə Fransanın Avropa və Xarici İşlər Nazirliyi məlumat yayıb.
Nazirlik bildirir ki, Fransa prezidenti Emmanuel Makron aprelin 16-da səfir Buayonu qəbul edərək Azərbaycanın hərəkətlərindən təəssüfləndiyini bildirib və Azərbaycan tərəfinin niyyətlərinə aydınlıq gətirməsini istəyib. Azərbaycan-Fransa münasibətləri Azərbaycanın Qarabağda 2023-cü ilin sentyabrında apardığı əməliyyatlardan sonra gərginləşib. Ötən ilin oktyabrında Fransanın Ermənistanla hərbi əməkdaşlığın dərinləşdirilməsi, o cümlədən İrəvanın silah və hərbi texnika ilə təchiz olunmasına dair sənədlər imzalaması fonunda Azərbaycan-Fransa münasibətləri daha da pisləşib.
Ötən il dekabrın 26-da Azərbaycan Fransanın Bakıdakı səfirliyində fəaliyyət göstərən iki diplomatı "persona non grata" elan edərək, onların ölkəni tərk etməsini istəyib. Azərbaycan Xarici İşlər Nazirliyi fransalı diplomatları "diplomatik statuslarına uyğun olmayan" fəaliyyətdə ittiham edib. Fransanın Azərbaycandakı casus şəbəkəsinin ifşa edilməsinə dair xəbərlər yayılıb. Daha sonra isə Bakıda biznes fəaliyyəti ilə məşğul olan Fransa vətəndaşının dekabr ayının əvvəlində casusluq ittihamı ilə həbs edildiyi məlum olub.
Göründüyü kimi, Fransa Azərbaycanla münasibətləri korlamaq üçün mümkün olan bütün addımları atıb. Fransa parlamenti qondarma "arsax"ı tanıyıb, eyni zamanda Ermənistanı silahlandıraraq revanşa hazırlamaq istəyir. Bir sözlə, münasibətlərin pozulmasına yönəlmiş bütün addımlar Bakıdan yox, Parisdən atılıb, amma bütün bunlardan sonra Fransa indi "küskün" obrazı yaratmaq cəhdi göstərməyə çalışır. Azərbaycan bütün dövlətlərlə münasibətlərin qarışılıqlı hörmət və beynəlxalq hüquq prinsipləri çərçivəsində qurulmasına tərəfdardır, amma hansısa ölkə bunun əksini edirsə, bu o ölkənin öz problemidir. Fransa səfirin çağırılmasını lazım bilirsə, Azərbaycan da eyni addımı ata bilər.
Siyasi şərhçi Sahil Kərimli "Bakı-Xəbər"ə açıqlamasında bildirdi ki, son günlər Fransa ilə Azərbaycan arasındakı münasibıtlərin daha da gərginləşdiyi hiss edilir: "Baş verənlərdə birbaşa günahkar rəsmi Parisdir. İkinci tərəf axtarmaq absurd olardı. Fransa haqsız yerə münasibıtlərin korlanmasında rəsmi Bakını günahlandırmaq istəyir. Ancaq Fransa ardıcıl şəkildə atdığı qərəzli addımları ilə münasibətləri bu həddə çatdırdı. Biz Fransanın Azərbaycana qarşı olan düşmənçilik siyasətini tam ifşa etmişik. 30 illik işğal dönəmində də Fransa daim Ermənistanın işğalçı addımlarını dəstəkləyib. Biz 44 günlük Vətən müharibəsi və ondan sonrakı dönəmdə Fransanın açıq-aşkar hiddətinin şahidi olduq. Belə olduğu halda, öz səfirini geri çağırmaqla Fransa bizi qabaqlamaq, borclu çıxarmaq istəyir. Görünən budur ki, Fransa münasibətləri bundan sonra da gərginləşdirməkdə maraqlı olacaq. Ermənistanı revanşa hazırlamaqda davam edəcək. Artıq bunun əlamətləri var. Fransa siyasi dəstəklə yanaşı, həm də ölkəyə silah verir. Ola bilər ki, Fransa Ermənistsn vasitəsilə Azərbaycana qarşı hərbi təxribatlar törətmək fikirinə düşsün. Azərbaycan daim təmkinli siyasət həyata keçirir. Fransa bu cür gedişlərlə bizə təzyiq edə bilməyəcək. Ölkəmizə qarşı qarayaxma kampaniyasına baxmayaraq, tərəfimizdən hər zaman dialoq qapıları açıq saxlanılıb. Fransa, xüsusilə son 3 il yarım müddətdə atdığı addımlarla Azərbaycanla Ermənistan arasında suverenlik və ərazi bütövlüyü əsasında əlaqələrin normallaşdırılması səylərini ciddi şəkildə sual altına qoyub və vəziyyətin gərginləşməsinə rəvac verib".
Məhəmmədəli QƏRİBLİ
