Yadigar Məmmədli: "Erməni tərəfi buna getməklə, Ankara-İrəvan münasibətlərinin düzəlməsini tormozlayır"
"Ermənistanda soyqırıma məruz qalanların siyahısı dəqiqləşdirilir". Bu barədə hakim "Mülki Müqavilə" partiyasından olan deputat Andranik Koçaryan məlumat verib.
"İndiyə qədər bu siyahını toplaya bilməmişik. Əsaslı şəkildə onu toplamağa diqqət yetirməliyik. Bizim Soyqırım Muzeyimiz var, onunla bağlı elmi konfranslar, kitablar, doktorluq işləri mövcuddur. Amma ən əsası bu bir milyon yarım erməninin adlarını bilməkdir. Biz onilliklərdir ki, bu məsələni həll etmirik. Bir milyon yarım erməninin qətlindən danışırıqsa, o zaman biz bəzi arxivlərdən həmin şəxslərin adlarını tapıb çıxarmalıyıq. Soyqırım Muzeyinin divarında bu adlar yazılmalıdır", - deyə Koçaryan fikrini yekunlaşdırıb.
Burada diqqəti çəkən məqam odur ki, Ermənistan bir tərəfdən Türkiyə ilə sərhədləri açmaq, münasibətləri yoluna qoymaq istəyir, bununla bağlı Qərbin Ankaranı yola gətirməsini istəyir, o biri tərəfdən rəsmi səviyyədə qondarma "soyqırımla" bağlı siyahı məsələsini qaldırır. Halbuki, belə addımlar iki ölkə münasibətlərinin düzəlməsini baltalayır.
"Bu, Qərbin Ermənistana son vaxtlar verdiyi xüsusi dəstəyin göstəricisidir"
Sözügedən məsələni "Bakı-Xəbər"ə şərh edən media eksperti Yadigar Məmmədlinin fikrincə, Ermənistanın bu addımları Türkiyə ilə münasibətlərin kəskinləşdirilməsinə xidmət edir: "Ermənistan, hər zaman olduğu kimi, yenə ziddiyətli və revanşist mövqe sərgiləyir. Əvvəla, Türkiyədə ermənilər "soyqırıma" məruz qalmayıblar. O zaman ermənilər Osmanlı dövlətinə xəyanət ediblər. Osmanlını Rusiyaya, Avropa dövlətlərinə satıblar. Buna cavab olaraq ermənilərin köçürülməsinə qərar verilib. Ancaq zaman-zaman erməni tərəfi qondarma "soyqırım" iddiaları ilə çıxış edərək rəqəmləri şişirdirdi. Əvvəl iddia edirdilər ki, guya 500 min nəfər erməni "genosidə" məruz qalıb. Sonra bunu 1 milyon nəfərə qaldırdılar. İndi də 1,5 milyon erməninin "soyqırıma" məruz qalması yalanını ortaya atıblar. Bir müddət keçəndən sonra 2 milyondan dəm vuracaqlar. Çünki ermənilərdən nə desən gözləmək olar. Erməni tərəfinin saxta "genosid qurbanları" siyahısı ilə çıxış etməsi təkcə qarşıdan gələn 24 aprellə bağlı olan məsələ deyil. Bu, Qərbin Ermənistana son vaxtlar verdiyi xüsusi dəstəyin göstəricisidir. Söhbət 5 aprel Brüssel görüşü və digər məsələlərdən gedir. Ona görə də Paşinyan hakimiyyəti rəsmiləri belə həyasız iddialarla çıxış edirlər. Ancaq erməni tərəfi buna getməklə, Ankara-İrəvan münasibətlərinin düzəlməsini tormozlayır. Bir il əvvəl İrəvanda erməni terrorçularına aid "Nemezis" abidəsini qoydular və bu, Türkiyənin etirazına səbəb oldu. İndi də qondarma "genosid qurbanları" siyahısı tərəflər arasında münasibətləri daha da gərginləşdirəcək".
Vidadi ORDAHALLI
