Emin Həsənli: "Məqsədli şəkildə bu mövzunu qızışdırır ki, Rusiya ilə aramızda fikir ayrılığı yaranmış olsun"
Rusiya Dövlət Dumasının MDB işləri üzrə komitəsi sədrinin birinci müavini, ermənipərəst deputat Konstantin Zatulin deyib ki, bu gün Qarabağda sülhməramlıların olması Rusiya ilə Azərbaycan arasındakı münasibətlərlə bağlıdır:
"Əslində, Qarabağda erməni əhalisi olmadığından sual yaranır: bizim sülhməramlılarımızın orada nə işi var? Azərbaycan rəhbərliyi sülhməramlıların geri çəkilməsi ilə bağlı məsələni ona görə qaldırmayıb ki, bu, Rusiyada məğlubiyyət, güzəşt, hərbçilərimizin Rusiyadan kənarda ölkəyə vurduğu ziyan kimi qəbul olunmasın. Amma əslində sülhməramlılarımızın Qarabağda olmasının səbəbləri daha da azalıb".
Bəllidir ki, imzalanan sənədə görə, Rusiya sülhməramlılarının mandatının müddəti 2025-ci ildə bitir. Zatulinin açıqlaması ona dəlalət edirmi ki, 2025-ci ildə vaxtları çatanda sülhməramlılar sakitcə Qarabağı tərk edəcək? Digər tərəfdən isə, Zatulin "bizim sülhməramlıların orada nə işi var" deməklə, faktiki olaraq Putinin mövqeyinə zidd getmiş olur.
Hərbi-siyasi ekspert Emin Həsənli "Bakı-Xəbər"ə açıqlamasında bildirdi ki, bütün proseslər Azərbaycanın bir çox proseslərdə doğru addımlar atdığını təsdiqləmiş olur: "Ölkəmiz milli maraqlarımızı qorumaq istiqamətində olduqca praqmatik düşünür. Vaxt vardı, biz Qəbələ RLS-ə status verəndə çoxları bu mövqeni tənqid edirdi. Sonda nə oldu? Stansiyanı təhvil verib getdilər. Xəzərin hüquqi statusu ilə bağlı məsələdə də biz prinsipiallıq göstərdik və həmin məsələ də öz həllini tapdı. Qarabağ məsələsini həll edəndə, çoxları deyirdi ki, Xankəndi və Xocalı niyə alınmadı? Zaman sübut etdi ki, çox doğru addım atılıb. Hazırda ermənilərin özləri də etiraf edir ki, Qarabağdan könüllü gediblər. Sülhməramlıların olması ermənilərin təhlükəsizliyi üçün idi. Rusiya necə ki, Qəbələdə hərbi bazanı saxlamadı, burada da elə olacaq. Bir müddət sonra sağollaşıb burdan gedəcək. Artıq imzalanan üçtərəfli müqavilənin də əhəmiyyəti yoxdur. Paşinyan həmin müqavilənin heç bir şərtinə əməl etmədi. Zamanında erməni qoşunlarını Qarabağdan çıxarmadı. Sonda Azərbaycan məcbur qalıb BMT qətnamələrinin icrasını öz gücünə təmin etmiş oldu. Hesab edirəm ki, zamanla sülhməramlılarla bağlı məsələ də öz həllini tapmış olacaq. Mən əvvəl sadaladığım ziddiyyətli məsələlərin necə həllini tapmasını təsadüfən xatırlatmadım. Heç bir məsələdə Azərbaycan dövləti milli və dövləti maraqlardan geri çəkilməyib. Bu məsələ də Azərbaycanın milli və dövləti maraqlarına uyğun həllini tapacaq. Biz Qoşulmama Hərəkatına rəhbərlik edirik. Bizim ərazimizdə nə NATO bazası, nə də başqa ölkənin hərbçiləri ola bilər. Görünən budur ki, Rusiya sülhməramlıların ölkəmizdə daimi qərar tutması ilə bağlı heç bir gizli plan həyata keçirmir. Bizim mövüeyimiz də aydındır ki, ölkəmiz heç bir xarici ölkənin hərbi bazasına qucaq açmaq niyyətində deyil. Zatulin kimi ermənipərəstlərin bizə canı yana bilməz. O istəyər ki, sülhməramlılar daima orada qalsın. Amma özünü elə göstərir ki, güya bundan narahatdır. Zatulinin bütün fəaliyyəti Azərbaycanın əleyhinə yönəlibsə, ondan hansı müsbət addımı gözləmək olar? Məqsədli şəkildə bu mövzunu qızışdırır ki, Rusiya ilə aramızda fikir ayrılığı yaranmış olsun. Bunu bacara bilməyəcək".
Məhəmmədəli QƏRİBLİ
