"İran hakimiyyətinin Azərbaycanın Tehrandakı səfirliyinin açıqlamasına dair verdiyi açıqlamanı ciddi və məqbul hesab etmək olmaz"
Azərbaycanın Tehrandakı səfirliyinin yenidən fəaliyyətə başlaması istiqamətində hazırlıq işləri görülür. Bunu İranın Xarici İşlər Nazirliyinin mətbuat katibi Nasir Kənani 15 apreldə Tehranda keçirilən mətbuat konfransında deyib.
Onun sözlərinə görə, Azərbaycanın Tehrandakı diplomatik fəaliyyətinin yenidən başlaması üçün ilkin müsbət addımlar atılıb, xarici işlər nazirləri səviyyəsində müsbət danışıqlar aparılıb.
İran XİN rəsmisi qeyd edib ki, bir müddət öncə Azərbaycanın diplomatik heyəti ilkin hazırlıq işlərinin həyata keçirilməsi üçün Tehrana gəlib.
"İran və Azərbaycan arasında yekdil rəy yaranıb ki, iqtisadiyyat və digər sahələrdə olduğu kimi, iki ölkə arasında siyasi əməkdaşlıqlar da başqa sahələrlə birlikdə hərəkət etməlidir", - deyə o bildirib.
Xatırladaq ki, 27 yanvar 2023-cü il tarixində Azərbaycanın İrandakı səfirliyinə qarşı terror aktı törədilib. Terror aktı nəticəsində Səfirliyin bir diplomatı şəhid olub, 2 diplomatı isə yaralanıb. Bununla da Azərbaycanın İrandakı səfirliyi fəaliyyətini dayandırıb.
Qeyd edək ki, bundan əvvəl də bir sıra İran rəsmiləri analoji açıqlamalar verib.
İran tərəfi deyə bilər ki, Azərbaycan səfirliyi işini bərpa edəcək. Səfirliyin işinin bərpa olunması səfirliyə qarşı həyata keçirilən məlum terrorun bütün arxa görüntülərinin, pərdəarxası məqamların aşkar edilməsi, onun arxasındakı bütün gizlinlərin üzə çıxması ilə bağlıdır. Azərbaycanın mövqeyi budur.
Məsələn, terrorun sifarişçisinin kimliyi bəlli oldumu? Terrorun motivi aydınlaşdımı, məlum oldumu?
Halbuki, İran məhkəməsi bunu araşdırmayıb. O terroru törədəni ölümə məhkum ediblər. Amma bu bizə nə verir? Bizə terrorun motivinin, mahiyyətinin aydınlaşdırılması vacibdir. O niyə bunu həyata keçirib, bir də onun sifrişçiləri kim olub? Terror sifarişsiz olmur. İndi bunun aydınlaşdırılmadığı bir şəraitdə Azərbycan səfirliyi İranda necə fəaliyyətə başlaya bilər?
"Bu da Tehran hakimiyyətinin hadisəyə təxribatçı yanaşması ola bilər"
Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan "Bakı-Xəbər"ə şərhində "İran hakimiyyəti artıq ikinci dəfədir ki, rəsmi Bakı ilə razılaşdırmadan informasiyanı birtərəfli qaydada yayır. Bir müddət əvvəl İranın Azərbaycandakı səfiri Musəvi Azərbaycan Prezidenti İlham Əliyevlə İranın hökumət başçısı İbrahim Rəisinin Xudafərində görüşəcəyinə dair xəbər yaymışdı. Bu görüş baş tutmadı. İkinci bir xəbəri isə aprelin 15-də İran Xarici İşlər Nazirliyinin sözçüsü Nasir Kənani yayıb və bildirib ki, tezliklə Azərbaycanın Tehrandakı səfirliyi açılacaq. Rəsmi Bakının bu məsələlərlə bağlı heç bir açıqlaması indiyə qədər yoxdur. Bu o deməkdir ki, İran hakimiyyəti bu sayaq xəbərləri birmənalı şəkildə, bəlkə də bilərəkdən təhrikedici formada gündəliyə gətirir" - deyə bildirdi.
S.Soltanın sözlərinə görə, İran hələ də Azərbaycana hücum edən şəxslə bağlı hökm çıxarmayıb, Tehran hakimiyyəti hələ də bu cinayəti sifariş edənləri, yaxud təşkilatçılarını cəzalandırmayıb. "İran hakimiyyəti bu məsələyə adi məişət hadisəsi kimi yanaşır. İranın uyğun qurumları Azərbaycanın bu ölkədəki diplomatik missiyasının binasının, onun diplomatlarının və əməkdaşlarının fəaliyyətinin təhlükəsizliyinə təminat vermir. Bundan başqa, Tehran hakimiyyəti həm də Ermənistanı silahlandırmaqla münasibətlərə ciddi şəkildə zərbə vurur. İndiki həssas məqamda İran hakimiyyətinin Ermənistanda hərbi texniki sahədə əməkdaşlığı regionda, Cənubi Qafqazda tarazlığın pozulmasına xidmət edir. Tehran İrəvan-Bakı danışıqlarına mənfi təsir göstərir. Odur ki, İran hakimiyyətinin Azərbaycanın Tehrandakı səfirliyinin açılmasına dair verdiyi açıqlamanı ciddi və məqbul hesab etmək olmaz. Ola bilər ki, Tehran hakimiyyəti, İran rəsmiləri bu xəbəri İranın İsrailə hücumu fonunda yayır və bildirmək istəyir ki, İranın İsrailə hücum etməsinə baxmayraq, rəsmi Bakı İranla diplomatik münasibəti bərpa edir. Bu da Tehran hakimiyyətinin hadisəyə təxribatçı yanaşması ola bilər" - deyə S.Soltan vurğuladı.
İradə SARIYEVA
