Faiq Ələkbərli: "Ermənistanın Azərbaycana qarşı belə bir ittiham irəli sürməsi heç bir məntiqə, beynəlxalq hüquq çərçivəsinə sığmır"
Aprelin 15-də Beynəlxalq Ədalət Məhkəməsində İrqi Ayrıseçkiliyin Aradan Qaldırılması üzrə Komitənin (CERD) Ermənistanın Azərbaycana qarşı müraciəti ilə bağlı iş üzrə Azərbaycan tərəfindən qaldırılan ilkin etirazlar üzrə ictimai dinləmələr keçirilib.
Azərbaycanın xarici işlər nazirinin müavini Elnur Məmmədov dinləmələrdə "Azərbaycan beynəlxalq humanitar hüququn və digər beynəlxalq insan hüquqları normalarının iddia edilən pozuntularını heç bir şəkildə qəbul etmir"-deyə bildirib.
Nazir müavini həmçinin qeyd edib ki, Ermənistan məhkəmənin yurisdiksiyasına istinad etməzdən əvvəl Azərbaycanla məsələləri danışıqlar yolu ilə həll etmək öhdəliyindən yayınmağa çalışır.
E.Məmmədov Ermənistanın daha əvvəl işğal etdiyi ərazilərdə Azərbaycan əhalisini etnik təmizləməyə məruz qoyduğunu vurğulayıb: "Azərbaycan əraziləri 1991-1994-cü illər ərzində işğal edilib və 30 il işğal altında qalıb. Bu, monoetnik Ermənistan dövləti çərçivəsində birləşməyi nəzərdə tutan irqçi və milliyyətçi ideologiyanın nəticəsi olub".
Azərbaycanı irqi ayrıseçkilikdə ittiham etmək nə qədər doğrudur?
"...Bu cür əsassız iddia ilə heç nə əldə edə bilməyəcək, bu onun növbəti uğursuzluğu olacaq"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli "Bakı-Xəbər"ə bildirdi ki, Azərbaycan tərəfin tutduğu mövqe və irəli sürdüyü tələb tamamilə beynəlxalq hüquqa uyğundur.
Ermənistan tərəfinin Azərbaycana qarşı belə bir iddia ilə sözügedən məhkəməyə müraciət etməsinin əsassız olduğunu deyən F.Ələkbərli hesab edir ki, Ermənistanın bu iddiası, Azərbaycanın rəsmən bəyan etdiyi kimi, irqi ayrıseçkiliyin bütün formalarının ləğvi haqqında Beynəlxalq Konvensiyaya aid deyil. "Ermənistanın Azərbaycanı irqi ayrıseçkilikdə ittiham etməsinin heç bir əsası yoxdur, çünki bizim ölkəmizə bu məsələ tamamilə yaddır. Azərbaycanda heç zaman irqi, milli, dini ayrıseçkilik olmayıb, indi də yoxdur. Azərbaycan çoxmillətli dövlətdir, burada müxtəlif xalqların və dinlərin təmsilçiləri yaşayır, fəaliyyət göstərir"-deyə F.Ələkbərli bildirdi.
F.Ələkbərli qeyd etdi ki, Azərbaycan 44 günlük müharibədə də, 23 saat çəkən lokal antiterror tədbirləri zamanı da ermənilərə qarşı heç bir etnik təmizləmə, soyqırım həyata keçirməyib. "Bu proseslər beynəlxalq hüquq və hərb qanunları çərçivəsində gerçəkləşdirilib. Azərbaycanı bu cür ittihamlarla suçlayanlar dönüb öz keçmişlərinə baxmalıdırlar. Biz bilirik ki, Ermənistan vaxtilə öz himayədarlarının dəstəyi ilə 1991-1994-cü illərdə bir sıra şəhər və rayonlarımızda etnik soyqırım həyata keçirib. Demək olar ki, Qərb, Avropa Ermənistanın azərbaycanlılara qarşı həyata keçirdiyi etnik təmizləmə, soyqırım cinayətlərinə göz yumdu, bir-iki bəyanat verməklə kifayətləndilər. Hətta onu da müşahidə etdik ki, azərbaycanlılara qarşı törədilən bu soyqırımları ermənilər təhrif edərək, onu guya "azərbaycanlıların ermənilərə qarşı belə bir soyqırım cinayəti" törətdiyi kimi qələmə verməyə çalışdılar. Belə mülahizələr, əsassız ittihamlar irəli sürdülər. Söhbət 1991-1994-cü illərdən gedir.
Əlbəttə, 44 günlük Vətən müharibəsi dövründə də, 23 saatlıq antiterror tədbirləri zamanı Azərbayanın hədəfi heç zaman mülki əhali olmayıb, heç bir sivil erməniyə güllə atılmayıb.
Bütün baş verənlər Ermənistanın və Qarabağda qanunsuz məskunlaşan separatçıların öz günahıdır. Vaxtında Azərbaycnın tələblərinə əməl etsəydilər heç nə baş verməzdi. Ermənistan öz qanunsuz hərbi birləşmələrini Azərbaycan ərazilərindən çıxarmalı idi, separatçılar "dövlət" oyununa son verib, öz ziyanlı fəaliyyətlərini dayandırıb təslim olmalı idilər. Amma onlar bunun əksini etdilər. Burada bir məqam da odur ki, sepratçılar qəsdən mülki obyektlərdə yerləşirdilər, uşaq bağçalarına, xəstəxanaya, məktəblərə sığınırdılar, oralardan hərbi məqsədlərlə istifadə edirdilər. Bunu hər kəs bilir. Qarabağdan ermənilər könüllü köçüb getdilər, onların birinin də burnu qanamadı. Qarabağda ermənilərə qarşı heç bir etnik təmizləmə baş verməyib. Özlərinin saysız müsahibələri var, o müsahibələrə baxsınlar. Bu mənada Ermənistanın Azərbaycana qarşı irəli sürdüyü bu ittihamın heç bir anlamı yoxdur. Azərbaycan monoetnik dövlət deyil. Bu gün ölkəmizdə ermənilər də, başqa azsaylı xalqlar, etnik qruplar də yaşayır. Əgər Azərbaycan etnik təmizləmə həyata keçiribsə, onda nə üçün Azərbaycanda öz milli və dini kimliyini qoruyan bu qədər etnos, etnik qrup yaşayır? Bizim ölkədə nə qədər erməni yaşayır. Kim onlara nə deyir?
Monoetnik ölkə Ermənistandır ki, orada ermənilər, bir də onlara yaxın olan bir-iki etnik qrup yaşayır, onların da dini və milli kimliyi dəyişdirilib, erməniləşdirilib. Orada əhalinin 99 faizi haylardan ibarətdir. Azərbaycanlılara qarşı törətdikləri etnik təmizləmə və soyqırım siyasəti nəticəsində orada bir nəfər də olsa azərbaycanlı qalmayıb. İrqi, milli, dini ayrıseçkiliyin ünvanı Ermənistandır, orada insanlar milliyyətinə, dininə, irqinə görə hər cür faciəyə düçar olub. Bu baxımdan Ermənistanın Azərbaycana qarşı belə bir ittiham irəli sürməsi heç bir məntiqə, beynəlxalq hüquq çərçivəsinə sığmır. Ermənistan bu cür əsassız iddia ilə heç nə əldə edə bilməyəcək, bu onun növbəti uğursuzluğu olacaq. Ola bilsin, yalnız bəzi Qərb dövlətlərindən və təşkilatlarından maddi yardım, ianə ala bildi, qalan məsələlərdə əli boşa çıxacaq"-deyə F.Ələkbərli əlavə etdi.
İradə SARIYEVA
