Elşad Həsənov: "Həmin təşkilatın üzvləri Fransada təlimlər keçdilər və sonra dünyanın başqa yerlərində türklərə, azərbaycanlılara qarşı terror hadisələri törətdilər"
Fransanın beynəlxalq terrorizmlə əlaqələri üzə çıxır. Artıq belə iddialar rəsmi şəxslərin dilindən səslənməyə başlayıb. Rusiya Təhlükəsizlik Şurası rəhbərinin müavini D.Medvedev bəyan edib ki, Moskvadakı terror aktının arxasında Fransa və Makron durur.
D.Medvedevin dedikləri təsadüfi deyil və Rusiyanın aidiyyəti strukturlarının bunun barəsində daha dərin məlumatları var və bu mövzuda araşdırmalar davam edir. Fransa xüsusi xidmət orqanları tərəfindən Azərbaycan əsilli iş adamlarına məxsus "Krokus siti" konsert zalında bu terrorun törədilməsi də təsadüfi deyildi. Məqsəd Azərbaycan və Rusiya arasında əlaqələrə xələl gətirmək, Rusiyada dini və etnik zəmində nifaq yaratmaq idi.
Fransanın beynəlxalq terrorizmlə əlaqələri yenilik deyil. Fransanın Lafarge şirkətinə aid olan və Suriya ərazisində fəaliyyət göstərən sement zavodu və onun İŞİD-lə əlaqələri, İŞİD-i maliyyələşdirməsi də üzə çıxıb. Fransanın erməni terrorizminə dəstəyi və ASALA-nın əsas ocaqlarından biri olması da faktdır. Hətta Fransanın Qarabağ ermənilərindən ibarət legion hazırlaması və onları Ukrayna cəbhəsinə göndərməyə çalışmasına dair də faktlar mövcuddur.
Bütün bunlar Fransanın terrora birbaşa dəstək verən ölkə olduğunu təsdiqləmiş olurmu?
Təhlükəsizlik orqanlarının vetetanı, siyasi şərhçi Elşad Həsənov "Bakı-Xəbər"ə açıqlamasında bildirdi ki, Medvedyevin dediklərini istisna etmək olmaz: "Bu versiya həqiqətə uyğundur və bu həqiqətə uyğunluq nədən ibarətdir? Bu ondan ibarətdir ki, Fransanın son illər apardığı siyasət terroru dəstəkləmək deməkdir. Ermənistanın terrorçu təşkilatlarını dəstəkləyərək, Azərbaycana hücumlarına bəraət qazandırırdı. Bu gün Azərbaycan öz torpaqlarını azad edəndən sonra kəskin etirazını bildirir, Azərbaycanı hər yerdə qaralamağa çalışır. Əsas da Makrona təsir edən Azərbaycanın xüsusi xidmət orqanları tərəfindən Fransa kəşfiyyatının başına dəmir yumruğun vurulması oldu. Fransanın Azərbaycanda olan agentura şəbəkəsi ifşa olundu. Eyni zamanda tək Azərbaycanda yox, Gürcüstan, Ukrayna, Moldova, Afrika ölkələrində onların agentura şəbəkəsi ifşa olundu. Bu, dünya kəşfiyyat tarixində bir ilk və görünməmiş hadisə oldu. Doğrudan da Makron hökumətinə çox böyük zərbə oldu. Bunun nəticəsində Fransanın xarici kəşfiyyat idarəsinin rəisi istefaya göndərildi və sonra da Fransanın baş naziri istefaya getdi. Əslində isə Makron özü istefaya getməli idi. Ona görə də, Makronun fikri Azərbaycana ziyan vurmaq, beynəlxalq imicini ləkələmək, Azərbaycanla normal münasibətdə olan ölkələrlə arasını vurmaqdan ibarətdir. Bizim Rusiya ilə normal münasibətimiz var. Onlarla strateji tərəfdaşlıq bəyənnaməsi imzalamışıq. Bütün bunlara görə də belə bir versiyanın olması ağlabatandır. Medvedyev də elə-belə adam deyil. Rusiyanın prezidenti olub, indi də Rusiya Təhlükəsizlik Şurasının sədr müavinidir. Yəni onların əlində təsdiqini tapmış faktlar olmasa, belə bəyənatla çıxış etməzlər. Bu da çox doğrudur ki, Makron ona dəyən zərbənin əvəzini çıxmaq istəyir. Ona görə də, hər şeyə getməyə hazırdır. Məhz İŞİD təşkilatı vasitəsilə belə bir planın hazırlanmasına dəstək verməsi inandırıcıdır. Bu isə Azərbaycana zərbə və Azərbaycanla Rusiyanın münasibətlərini korlamaq deməkdir. Mən inanıram ki, Rusiyanın Federal Təhlükəsizlik Xidməti və müvafiq qurumları bu məsələnin axırına çıxacaqlar. Doğrudan da, Rusiyada törədilmiş bu terror aktının daxildə olan narazı qüvvələrin yox, beynəlxalq terrorizmə dəstək verən qüvvələrin işi olduğu sübut olunur. Bu günlərdə mətbuatda xəbər verildi ki, aprel ayının 12-də Amerikanın Kaliforniya ştatında Ararat erməni qəbiristanlığında yanğın törədilib, həmin qəbiristanlıqda da erməni terroristlərinin bir neçəsinin qəbri var. Eyni zamanda terrorist Saqamon Terleryanın da orda qəbri var. Sonradan deyildi ki, onun sümükləri Fransaya gətirilib və Parisdə dəfn olunub. Həmin bu Terleryan 15 mart 1921-ci ildə Parisdə günorta vaxtı Tələt Paşanı qətlə yetirmişdi. Arvadını isə yaralamışdı. Bundan əlavə, Parisdə 1934-cü ildə Fransanın baş naziri terroristlər tərəfindən qətlə yetirildi. Türklərə qarşı qəddarlığı ilə seçilən tayqulaq Andranikin sümükləri Amerikadan qəbirstanlıqdan gətirələrək, hörmətlə Parisin ən məşhur qəbirstanlığında dəfn olundu. Bütün bunlar onu göstərir ki, Fransa dövləti terroristləri dəstəkləyir, himayə edir. ASALA təşkilatını da nə qədər dəstəklədilər. Həmin təşkilatın üzvləri Fransada təlimlər keçdilər və sonra dünyanın başqa yerlərində türklərə, azərbaycanlılara qarşı terror hadisələri törətdilər. Bütün bunlar onu deməyə əsas verir ki, bu versiyanın doğruluğu mümkündür. Mən inanıram ki, Rusiyanın istintaq, təhlükəsizlik orqanları bu məsələyə aydınlıq gətirəcəklər".
Məhəmmədəli QƏRİBLİ
